Rey Darío nichulho gobernador laka carta
1Tä mälhyejtso, rey Darío ne'tek õt'ukwe n'olesaynhay tä õt'amajej tä ihi lew'et tä ihi Babilonia. 2Wet õhw'en p'ante n'olhämet lehi tä õ'käfwelche tä ihi niyat lewukwe tä ihi hupuy tä lhey Ekbatana tä ihi honhat tä lhey Media. Wet n'olesaynek tä ihi yok:
“M'ak tä is chik n'ochowej inuhlä:
3“Häp nekchäm tä ichun tä Ciro häpe rey, lham ne'tek õ'lesayen lhämetna tä yok:
“Häpet Dios Lew'et tä ihi Jerusalén: Is chik õyenlhi lefwetes wet õ'nech'aynhi tä õyenlhi hup, häpkhilek õ'tihipej chik õ'länhen itshätäy tä õyen n'okhayajayej Dios. Is chik hiw'en veintisiete metros tä atojphä wet veintisiete metros tä tsajo. 4Häte is chik iche tres tuntey tä wus chik õ'fwahatchehchä tä õ'tiche letape, wet elh hal'ä tä nech'ayek. Wet is chik õtiskanejpe chinaj t'äj tä ihi oniyatyaj. 5Wet häp m'ayhay tä oro lhäy'e tä plata tä pajche ihi Dios Lew'et tä ihi Jerusalén tä Nabucodonosor itonphä p'ante wet ihäne Babilonia, is chik õyachaje Jerusalén, wet is chik õ'tihi Dios Lew'et tsi lew'et t'at.”
6Tä mälhyejtso, rey Darío yenlhi lhämet tä ichene gobernador Tatnay tä ihi tewokitaj Éufrates lhip elh, lhäy'e Setar-boznay, lhäy'e leniyatfwas tä ihi honhattso. Wet yok:
“Mäyaych'oye Jerusalén. 7Ch'anlhaye Judío lhayis laka gobernador lhäy'e niyatey tä iyej, tä lhamel yenlhi Dios Lew'et tä inech'aynhi tä itihi lew'et tä pajche lew'et. 8Wet woyaye olhämet, ch'otaye Judío lhayis tä yenlhi Dios Lew'et. Oyok, chinaj t'äj tä ihi oniyatyaj tä õtiskanejpe impuestos tä ihi honhat tä tumej tewokitaj Éufrates lhip elh, häp tä is chik lew'enho häp hin'ol tä yenlhi Dios Lew'et. Wet yej pantej tä lewoye, häpkhilek nitkasita n'ochumetna. 9Wet is chik nilhokej ifwalas õhw'enho t'at sacerdotes tä ihi Jerusalén häp m'ayhay tä lhamel iwatlä: häp w'asetas wok tson'atas yämthilek õ'länhen wet õ'wunhomche tä õyen n'okhayajayej Dios tä pule Lewuk, lhäy'e trigo, nisoy, hat'es, wok aceite. 10Nilhokej m'ayhaytso is chik õyen Dios tä pule Lewuk t'awayhata wet ikänitlhi lham. Wet is chik lhamel y'alhyen n'oye yämthilek t'amaj n'oyej, lhäy'e oles.
11“Häte elh chik niwoyaye olhämetna, is chik õ'lanhi elh hal'äy tä yen lewukweya wet õ'tshänejo häp lham. Wet lewukwe is chik õ'wasthi wet õ'hutwek. 12Wet Dios tä tatshupiye Jerusalén wet yen lew'eta, is chik itäyhat niyat at chik häpe wok wichi chik fwetajla iwo elha wok iwasthi Dios Lew'ettso.
“Olham tä ohäpe rey Darío olhämet täja. Wet iwohiyet'ak õkniwoyaye nilhokej.”
Wak'alh Dios Lew'et
13Tä mälhyejtso, Tatnay, gobernador tä ihi honhat tä tumej tewokitaj Éufrates lhipna, lhäy'e Setar-boznay, lhäy'e leniyatfwas, lhamel iwoye nilhokej rey Darío lhämet. 14Wet Judío lhayis tä lhayen lewosayej iyhäj, lhamel tujlhache t'at lechumet tä inech'aynhi Dios Lew'et, wet isej t'at profeta Hageo lhäy'e elh Zacarías tä Ido lhäs lhämtes. Wet wak'alh p'ante, mälhyej tä Israel laka Dios ne'tek õ'woye, häte rey Ciro lhäy'e Darío lhäy'e Artajerjes, häp reyes tä ihi Persia, lhamel lhämet tä ne'tek wichi iwoye. 15Ifwala tä wak'alh Dios Lew'et häpe ifwala tres, iwel'a tä lhey Adar, tä Darío, Persia laka niyat, ihi leniyatyaj seis nekchämis.
Israel lhayis yachaje Dios häp Lew'et yämthilek häpe t'at lham t'amajchet
16Wet nilhokej Israel lhayis, lhäy'e sacerdotes, lhäy'e Leví lhayis, wok oyok, nilhokej wichi tä nämhen tä õyen p'ante kwenkaya, lhamel iwo lakäjyajayej tä yachaje Dios häp Lew'et yämthilek häpe t'at lham t'amajchet. 17Wet lhamel ilänhen cien w'asetas wet doscientos tson'atas, lhäy'e cuatrocientos tson'atas leles, yämthilek yen n'okhayajayej Dios. Häte ilänhen doce kayla lhayis tä w'awulhej Israel lhayis letetsel tä ihi doce lhäy'e wichi tä wusche'pe tä tälhehen lhamel. Wet tä ilänhen kayla lhayistso, häp tä yen lahaya nilhokej lech'isukyajay tä lhamel iwoye. 18Wet nech'e õ'fwenhomche sacerdotes häp elhpej häp ifwala tä laka turno yämthilek iwoye lechumet tä ihi Dios Lew'et, lhäy'e Leví lhayis, mälhyej Moisés lesaynek tä ne'tek õ'woye.
Wichi yenlhi lakäjyaj tä Pascua
19Wichi iwo lakäjyaja tä Pascua häp ifwala tä catorce, iwel'a tä ichun. 20Wet sacerdotes lhäy'e Leví lhayis, lhamel pajche lhailejen tä yen tetneka lhamej tä lhayen Dios t'amajchetesa. Wet nech'e lhamel ilänhen itshätäy tä Pascua, tä yen tichunhayaja tä lhamel häpehen n'okwenkay mat tafwayej, lhäy'e iyhäj sacerdotes, lhäy'e wichi. 21Wet nilhokej lhamel tufw t'at Pascua lhäk, lhäy'e nilhokej wichi tä lhaitiyej kanhihlä m'ak tä ni'isachehen tä wichi tä ihiche honhates iwoye, wet lhaip'ajtej iyhäj tä n'okwiyej häp Lhawuk, Israel laka Dios. 22Pajtha siete ifwalas tä lhamel iwo lakäjyaja wet tufw pan tä levadura newayej. Tsi Lhawuk hiw'enho lhamel häp lakäjyaj wet iwo letichunhayaja Persia laka niyat yämthilek tach'ote lhamel tä yenlhi Israel laka Dios Lew'et.
