Esdras nichäte Jerusalén
1Tä paj p'ante, ifwalas tä Artajerjes häpe niyat tä ihi Persia, iche hin'o tä lhey Esdras tä lajcha Seraías wet lechäti lhey Azarías. Wet lechätilis p'ante lheyis Azarías, Hilcías, 2Salum, Sadoc, Ahitub, 3Amarías, Azarías, Merayot, 4Zeraías, Uzi, Buqui, 5Abisúa, Finees, Eleazar, wet Eleazar lajcha Aarón tä häpe p'ante Sacerdote tä Lhamya tä ichun.
6-7Esdras häpe n'ochufwenyajwo tä wuj tä ihanej n'olesaynhay tä Lhawuk hiw'enho p'ante Moisés. Wet Lhawuk tach'ote häp Esdras, wet rey Artajerjes hiw'enho m'ak at chik häpek t'alhe. Tä mälhyejtso, häp nekchäm siete tä Artajerjes ihi leniyatyaj, Esdras yikch'oye Babilonia wet yäple Jerusalén, lhäy'e Israel lhayis tä häpehen sacerdotes, lhäy'e Leví lhayis, lhäy'e iyhäj tä ihanej tä ichoywethä, lhäy'e hin'ol tä t'uye Dios Lew'et, lhäy'e iyhäj tä tach'ote Dios Lew'et lechumet. 8-9Wet tä Dios tach'ote p'ante Esdras, lham iwo tesa lew'ekyaj tä yikch'oye Babilonia häp iwel'a tä ichun, ifwala tä ichun, häp nekchäm siete tä Artajerjes häpe rey. Cuatro iwel'as lew'ekyaj wet nech'e nichäte p'ante Jerusalén. 10Esdras pajche imälhetwek lehusek tä itetshan Lhawuk lhämtes wet iwoye, yämthilek ichufwenejen Israel lhayis.
Häp Artajerjes laka carta tä hiw'enho p'ante Esdras
11Häp täja copia häp rey Artajerjes lhämet tä hiw'enho Esdras tä häpe sacerdote wet äp häpe n'ochufwenyajwo tä wuj tä ihanej nilhokej Lhawuk lhämtes tä ifwenho Israel lhayis yämthilek iwoye.
12“Olham tä ohäpe N'owujtaj Artajerjes on'okwi amej, Esdras, tä ahäpe sacerdote wet äp n'ochufwenyajwo tä wuj tä ihanej Dios tä pule Lewuk lhämtes.
13“Oyok, Israel lhayis tä ihi oka honhat, lhäy'e sacerdotes, lhäy'e Leví lhayis, chik lhamel t'uhläk yik amche tä lehoye Jerusalén, oyok, is t'at. 14Tsi olham lhäy'e siete och'otfwas tä in'oyej, olhamel oaichen yämthilek letetshan m'ak tä ihi Jerusalén lhäy'e Judá. Is chik letetshan chik wichi iwoye aka Dios lhämet tä lham t'ekhayej ame. 15Wet chäj oro lhäy'e plata tä olham lhäy'e och'otfwas oyen t'awayhata Israel laka Dios tä ihi Jerusalén, 16lhäy'e nilhok oro lhäy'e plata chik lelhoke tä ihi honhat tä Babilonia, lhäy'e m'ayhay tä sacerdotes lhäy'e wichi hiw'enho Dios Lew'et tä ihi Jerusalén.
17“Wet chinaj t'äjna chäjeja w'asetas, tson'atas, trigo, lhäy'e hat'es, yämthilek leti'pe altar tä ihi amel aka Dios Lew'et tä ihi Jerusalén wet lhen n'okhayajayej. 18Wet oro lhäy'e plata chik imälhehi, am lhäy'e iyhäj tä i'amej woyejela m'ak tä amel lehuminche tä häpe amel aka Dios lenech'ethayaj. 19Mat häp lehis tä õhw'en amho yämthilek õ'chumyene m'ak tä lechumet tä ihi aka Dios Lew'et tä ihi Jerusalén, is chik lhachaje t'at häp lham, tsi häpe t'at Jerusalén laka Dios. 20Wet m'ak at chik häpe chik am let'uhläk lew'enho aka Dios Lew'et, is chik letiskanejpe chinaj t'äj tä ihi oniyatyaj.
21“Olham, rey Artajerjes, one'tek nilhokej chinaj t'äjwos tä tumej tewokitaj Éufrates lhip elh, is chik yofwajkwet lew'enho Esdras, sacerdote wet äp n'ochufwenyajwo tä wuj tä ihanej Dios tä pule Lewuk lhämtes, m'ak at chik häpek lham t'alhch'oye, 22pajla'tha w'awulho tres mil trescientos (3.300) kilos plata, wet diez mil (10.000) kilos trigo, wet dos mil doscientos (2.200) litros hat'es, wet dos mil doscientos (2.200) litros aceite, lhäy'e wuj nisoy.
23“M'ak at chik häpek Dios tä pule Lewuk ne'tek õhch'otyeneje Lew'et, is chik yofwajkwet iche t'at, häpkhilek newache letasnhayaj chik nichät n'o'pe, lhäy'e oles. 24Wet yej t'alhe'pe impuestos sacerdotes, lhäy'e Leví lhayis, lhäy'e iyhäj tä ichoywethä, lhäy'e hin'ol tä t'uye Dios Lew'et, lhäy'e iyhäj tä tach'ote Dios Lew'et lechumet, lhäy'e elh chik häpe chik tachumhilhi Dios Lew'et.
25“Wet am, Esdras, tä aka Dios hiw'en amho ahanyaj, is chik letshupyene hin'ol yämthilek häpehen n'okalelhthayajwos lhäy'e niyatey, häpkhilek lhayen lewosayej wichi tä tumej tewokitaj Éufrates lhip elh tä lhamel ihanej aka Dios lhämtes. Wet iyhäj tä kamaj nhanayej, chufwenejena. 26Wet elh chik häpek niwoyaye aka Dios lhämtes lhäy'e olham olhämtes, is chik yofwajkwet õ'län, wok õ'häne honhat tä w'enha lhamej, wok õne'tek tiskan letape, wok õ'thatho n'op'onthi.”
Esdras iwunit Dios
27Wet nech'e Esdras yok:
–¡Lewujyaj ihi Lhawuk, häp lhatetsel laka Dios, tsi iwo letichunhayaja häp niyat yämthilek iwujyen Lhawuk Lew'et tä ihi Jerusalén! 28Häte Dios tach'ot n'oye yämthilek niyat lhäy'e lech'otfwas, lhäy'e hin'ol tä len'ohyajay ihiche, lhamel ihuminn'o. Wet tä Owuk Dios in'oyej, ikhajyenn'o, wet ot'äne Israel lhayis tä kalelhäjiche yämthilek nek n'okwe tä oyäple Jerusalén.
