Häp täja lheyis häp wichi tä yäple Jerusalén
1Häp täja lheyis häp Israel lhayis tä thänhäy tä yikch'oye Babilonia häp ifwalas p'ante Artajerjes häpe niyat. Lhamel yäple Jerusalén tä yikche Esdras:
2-3Gersón tä tälhe Finees leles.
Daniel tä tälhe Itamar leles.
Secanías lhäs tä lhey Hatús tä tälhe David leles.
Zacarías tä tälhe Parós leles, lhäy'e ciento cincuenta hin'ol tä yikche tä lheyis ihi lehi.
4Zeraías lhäs tä lhey Elioenay tä tälhe Pahat-moab leles, lhäy'e doscientos hin'ol tä yikche.
5Jahaziel lhäs tä lhey Secanías tä tälhe Zatu leles, lhäy'e trescientos hin'ol tä yikche.
6Jonatán lhäs tä lhey Ebed tä tälhe Adín leles, lhäy'e cincuenta hin'ol tä yikche.
7Atalías lhäs tä lhey Isaías tä tälhe Elam leles, lhäy'e setenta hin'ol tä yikche.
8Micael lhäs tä lhey Zebadías tä tälhe Sefatías leles, lhäy'e ochenta hin'ol tä yikche.
9Jehiel lhäs tä lhey Abdías tä tälhe Joab leles, lhäy'e doscientos dieciocho (218) hin'ol tä yikche.
10Josifías lhäs tä lhey Selomit tä tälhe Bani leles, lhäy'e ciento sesenta hin'ol tä yikche.
11Bebay lhäs tä lhey Zacarías tä tälhe häp elh hin'o tä lhey Bebay leles, lhäy'e veintiocho hin'ol tä yikche.
12Hacatán lhäs tä lhey Johanán tä tälhe Azgad leles, lhäy'e ciento diez hin'ol tä yikche.
13Elifelet, Jeiel, lhäy'e Semaías, tä lhamel tälhe Adonicam leles. Wet lhamel yäpil tä paj, lhäy'e sesenta hin'ol tä yikche.
14Wet Utay lhäy'e Zabud tä lhamel tälhe Bigvay leles, lhäy'e setenta hin'ol tä yikche.
Esdras t'ukwe hin'ol tä Leví lhayis yämthilek tach'ote Dios lechumet tä ihi Lew'et tä T'amajchet
15Olham Esdras ohutwek p'ante nilhokej wichi tä oihi tewok n'äyij tä tiyäje Ahava, wet olhamel oihi tres ifwalas. Wet tä otetshan wichi, wet ow'en sacerdotes, mat niwohit elh Leví kawichi chik ow'en. 16Tä mälhyejtso, ochen Eliezer, lhäy'e Ariel, Semaías, Elnatán, Jarib, Elnatán elh, Natán, Zacarías, lhäy'e Mesulam, tä häpehen hin'ol tä len'ohyajay ihi, lhäy'e n'ochufwenyajwos Joyarib lhäy'e Elnatán. 17Wet ofwenho lhamel, oyok:
–Is chik amel letiyäje honhat lhip tä lhey Kasifia wet hoyaye niyat tä lhey Ido tä ihi. Wet fwenhola lham lhäy'e iyhäj tä Leví lhayis, oyaylakwe, “Is chik lechen n'oye hin'ol yämthilek tachumhilhi lhaka Dios Lew'et tä ihi Jerusalén.”
18Wet ow'en tä Dios tach'ot n'oyehen, tsi tä nämhen hin'ol tä ochen, ichäj n'oyehen Serebías, hin'o tä wuj lehusek ihi. Lham tälhe Leví lhäs p'ante lhey Mahli, wet tä näm n'oyehen, lhäy'e leles, lhäy'e lepuhfwas, tä nilhok lhamel iche dieciocho hin'ol. 19Häte ichäj n'oyehen Hasabías lhäy'e Isaías, lhamel letes p'ante lhey Merari, lhäy'e lhamel leles. Tä nilhok, iche veinte hin'ol. 20Häte iche doscientos veinte (220) hin'ol tä lechätilis häpehen wichi tä rey David lhäy'e leniyatfwas itshupyene p'ante yämthilek tach'ote Leví lhayis lechumet. Nilhokej lhamel lheyis ihi lehi.
Wichi lhaichuyhathen wet iwo t'alhyaja
21Wet one'tek nilhokej olhamel olhaichuyhathen tä oiwhäye tewok tä lhey Ahava, wet olhaifwenho Dios häp m'ak tä ni'isachehen tä olhamel owoye. Wet ot'alhe tä is chik t'amaj n'oyejen chik oihi on'äyij, lhäy'e nilhokej olhamel ow'et lheley, lhäy'e olhamel okäywet. 22Tsi on'äfwlhi ihi t'at chik ohoye rey wet ot'alheje sip'äl lhäy'e iyhäj tä iwo lew'uteya yämthilek t'u n'oyehen tä onukwe on'äyij wet newache owit'äyhyaj chik otayhfwas iwoyej n'oyehen. Tsi pajche olhamel ofwenho rey tä oyok:
–Olhamel oka Dios lakhajyhayaj ihi, wet nilhokej wichi tä t'ukwe, häp tä isej täjtso. Mat häp wichi tä ileyej Dios, lakhajyhayajtso lhäy'e lewäk häp tä nichätpe lhamel.
23Tä mälhyejtso, olhaichuyhathen wet owo ot'alhyaja'pe täjtso, wet olhamel oka Dios tach'ahu n'oyehen.
24Wet ot'ähi doce sacerdotes tä len'ohyajay ihiche, Serebías, Hasabías, lhäy'e diez iyhäj tä iyej lhamel. 25Wet owo kaw'awlhanhatayej plata wet ow'enho lhamel, lhäy'e oro, lhäy'e nilhokej m'ayhay tä rey lhäy'e leniyatfwas, lhäy'e lech'otfwas, lhäy'e nilhokej Israel lhayis yen t'awayhata olhamel oka Dios tä hich'otyeneje Lew'et. 26Wet plata tä owo kaw'awlhanhatayej tä ow'enho lhamel, iche veintiún mil cuatrocientos cincuenta (21.450) kilos, wet iche cien m'ayhay tä plata wet tres mil trescientos (3.300) kilos oro. 27Häte iche veinte n'olhäthis tä oro, wet tä oti'pe n'okaw'awlhanthi iche ocho kilos, wet täkwfwas n'olhäthis tä bronce tä lhäy'e lhip tä isilataj wet wuj laha, hätet iwoye oro.
28Wet ofwenho lhamel wet oyok:
–Amel ahäpehen Lhawuk t'amajchetes, hätet iwoye n'olhäthis, oro, plata, Lewuk t'at häp lham tä häpe n'amel lhajchalis laka Dios. 29Is chik wuj tä let'uye wet amajej, häpkhilek niwohit m'ak chik tatäy chik amel lewo kaw'awlhanhatayej chik lechäte häp sacerdotes tä len'ohyajay ihiche, lhäy'e Leví kawichi, lhäy'e Israel lhayis tä thänhäy tä ihi Dios Lew'et tä ihi Jerusalén.
30Tä mälhyejtso, sacerdotes lhäy'e Leví lhayis tachumlä oro lhäy'e plata, lhäy'e m'ayhay iyhäj tä pajche owo kaw'awlhanhatayej. Wet lhamel yikhen tä ihäne Jerusalén yämthilek itihi olhamel oka Dios Lew'et. 31Wet häpe ifwala doce, häp iwel'a tä ichun, tä olhamel oyikch'oye tewok tä lhey Ahava wet ohoye Jerusalén. Wet olhamel oka Dios tach'ot n'oyehen wet tek owit'äyhyaj ihihlä wichi tä fwitses lhäy'e etantses tä ihi n'äyij tä olhamel onukwe.
Esdras lhäy'e wichi iyhäj, lhamel nichäte p'ante Jerusalén
32Wet tä olhamel onchäte Jerusalén, owo ot'elakw'eta tres ifwalas. 33Tä tajyäme täjtso, nech'e olhamel ohoye oka Dios Lew'et. Wet olhamel owo kaw'awlhanhatayej oro lhäy'e plata, lhäy'e m'ayhay iyhäj, wet oyachaje häp sacerdote tä lhey Meremot tä häpe Urías lhäs. Wet häp Finees lhäs tä lhey Eleazar iyej t'at, lhäy'e hin'ol tä Leví lhayis tä lheyis Jozabad lhäy'e Noadías. Jozabad häpe Josué lhäs wet Noadías häpe Binuy lhäs. 34Wet häp ifwalatso õ'wo t'ufwahtesa wet õ'wo kaw'awlhanhatayej nilhokej, wet õ'lesayen m'ak tä olhamel otilhäjtso.
35Tä paj, wichi tä yäple laka honhat, häp wichi tä tafwayej tä õyen kwenkaya, lhamel ilänhen itshätäy tä yen n'okhayajayej Israel laka Dios. Doce w'asetas tä ilänhenpe nilhokej Israel lhayis, wet noventa y seis tson'atas tä asnakis, wet setenta y siete tson'atas leles, wet doce kayla lhayis tä õ'länhenpe n'och'isukyajay. Wet õ'wunho nilhokej wet õ'wunit häp Lhawuk. 36Tä tajyäme täjtso, wet õhw'enho niyatey häp rey tä ihi Persia lhämet tä ichene lhamel lhäy'e gobernadores tä tumej honhat tä ihi tewokitaj Éufrates lhipna. Wet lhamel tach'ote wichi lhäy'e Dios Lew'et.
