Jacob ichene lhämet Esaú
1Jacob tujlhache len'äyij wet iche p'ante Dios laka ángeles tä lhaichutyenej. 2Tä Jacob hiw'en, wet yok:
–¡Dios kasthawet täja!
Wet häp tä tamenej tä yen lheya honhattso Mahanaim tä yok, N'okasthawetes.
3Wet Jacob ichunkat lahilä lakachenhay tä ichene lechila Esaú tä ihi Seír tä häpe honhat tä Edom. Iwo silätaye lechila tä lham nichäthiyela. 4Wet lhämet yokwe:
–Fwenhola ochila olhämetna tä oyok, “Ohoyehte Labán lew'et, wet pitaj lewhäy tä oiyej t'at pajtha onchäte nekchämna. 5Wet ow'en w'asetas, asnolis, tson'atas, kayla lhayis, lhäy'e okawos tä hin'ol lhäy'e tä atsinhay.” Häp täjtso olhämet tä ochene owuk Esaú tä ot'uhläk ihumin at n'ohlä tä otpile.
6Wet Jacob kachenhay iwoye, wet tä tapile p'ante Jacob, wet ifwenho tä yok:
–Olhamel ohoye naji achila Esaú wet ofwenho ämet tä lene'tenaj chik ofwenho. Wet tä lham ilät n'oyehen, nek t'at, lhäy'e cuatrocientos hin'ol tä nekche, tä iho ahilä.
7Tä Jacob iläte lakachenhay lhämet, wuj tä noway wet lelhakli ihi. Tä mälhyejtso, hiw'enhathen laka wichi tä iyej, lhäy'e tson'atas, kayla lhayis, w'asetas, camellos. 8Tsi letichunhayaj yok, “Chik Esaú nahayej tä inuye iyhäj tä ow'enhat, wet iyhäj ihanhiyeja iwoyneje chik yikhen.”
9Tä ileyej tä iwaklhat täjtso, nech'e iwo let'alhyaja wet yok:
–Iwuk tä ochäti Abraham laka Dios wet ojcha Isaac laka Dios, tä am lene'tek otpile oka honhat lhäy'e wichi tä häpehen oiyhäj, wet äp lefwel n'oho tä le'isyenlan'o alhoho. 10Mat ot'uhawethiyejt'a tä lewoyej n'oye hap'altsenyaj lhäy'e tä kaleya n'oyej. Tä olham oyisthohte tewok Jordánna, niwohihtet m'ak chik ochäj, tajlhamat otsut. Mat athana wuj m'ak tä ow'en. 11Olhaip'altsen ame, ¡fwayhat n'oyej ochila Esaú! Onowayek ilänn'o wet itan'iset n'oyej ow'et lheley. 12Mat lefwelte n'oho tä le'isyenlan'o alhoho, wet wujla'pe oles, hätehlat iwoye holo tä iwhäye tewok tä nehit katsik ihanej chik iwo t'ufwahtesa.
Jacob ichene t'awayhtes Esaú
13Wet honatsitso Jacob ihi t'at lhiptso, wet iwaklhat m'ayhay tä t'uhläk yen t'awayhata lechila Esaú: 14doscientos kayla lhayis wet veinte iyhäj tä asnakis, doscientos tson'atas wet veinte iyhäj tä asnakis, 15wet treinta camellos tä atsinhay wet äp iwo lelesa mat õhp'ajtej t'at leles, wet cuarenta w'asetas wet diez asnakis, wet veinte asnolis wet diez iyhäj tä asnakis. 16Wet nech'e hiw'enhomche lakawos häp itshätäyna tä hiw'enhathen, wet tahuyej lhamel wet yok:
–Achunay, mat tä lhekhen yej p'ak amejen tä lhekchufwi itshätäy tä lhokwes.
17Wet äp tahuyej elh tä ichun wet yok:
–Chik lechutej ochila Esaú, wet chik tay'ätshan ame wet yok, “¿Atsi hin'o tä awuk, wet chi lehohi, wet atsi tä leläy itshätäy tä lhokwes?”, 18chulhola olak, “Iwuk Esaú, häp itshätäyna lewuk akawo Jacob, mat ichen ame tä yen awayhata. Wet lham nek t'at, nekche olhamel on'äyij tä nek.”
19Wet häpe t'at lhämettso tä ifwenho häp nilhokej lakawos iyhäj tä yokwes leläy. Yok:
–Häte amel chik lechutayej ochila Esaú, woynejelatso ämet chik letahuyej, 20olak, “Akawo Jacob nekche t'at olhamel on'äyij.”
Tsi Jacob letichunhayaj yok, “Chik hiw'enla t'awayhtes tä ochunkattshi, ilehiyeja tä fwitsaj n'oye wet nech'e ohohiyela. Elat tachumlat n'ohlä chik mälhyejtso.”
21Wet häp tä ichunkattshi tä ichen itshätäy tä yen t'awayhata lechila Esaú. Mat lham ihi t'at lakasthawet honatsitso.
Jacob täkleyejlhi ángel
22Honatsitso Jacob nephä wet tachuma lech'efwas lhäy'e lakawos tsinhay, lhäy'e leles tä ihi once, wet yisthaynho tewok tä lhey Jabok 23wet itumtej ufwey, lhäy'e nilhokej m'ak tä iyej. 24Wet lham imälhehi ayej lakasthawet tä ts'ilak lhamej. Wet iche hin'o tä ihoye wet täkleyejlhi yäk ifwala n'änlä. 25Wet tä hin'otso hiw'en tä nikalhahi, wet y'ajej takwey lewej lhile, wet tä Jacob täkleyejlhi, lewej lhile inutshi. 26Wet hin'otso tahuyej wet yok:
–Le n'oyej, ifwala t'at.
Mat Jacob yok:
–Chik kaw'ena n'oho akäpfwayaj tä is, olehit'a amej.
27Hin'otso tay'ätshane Jacob wet yok:
–¿Chiwoye ey?
Jacob nichulho wet yok:
–Olhey Jacob.
28Wet hin'otso yok:
–Tälhe athana nemla ey Jacob, mat nech'e eyla Israel. Tsi letäkleyej Dios lhäy'e hin'ol wet lekalhi t'at.
29Wet Jacob äp yok:
–Athana häte am fwel n'oho, ¿chiwoye ey?
Mat hin'otso nichulho Jacob wet yok:
–¿Chipte tä let'uhläk lehanej olhey?
Wet nech'e hin'otso takäpfwayeje m'ak tä is. 30Wet Jacob yen lheya lhiptso Penuel tä yok, Dios Te'pe. Tsi Jacob yok:
–Ow'en Dios tate'pe, mat kamaj oläy.
31Wet nech'e noj t'at honatsi wet Jacob yikch'oye Penuel. Wet iwo tesa tä ifwala inuphä, mat nech'e tshutej t'at tä yik tsi lewej lhile tach'ijiyhi. 32Wet häp tä tamenej tä Israel lhayis yäk häp ifwalasna lhamel tufwit'a itshäwet lheche t'isan pes tä ihi lewej lhile. Tsi Jacob häp p'ante tä Dios y'aj lhiptso.
