Oseas 6

₁“Lhamel yohlakwe,

Ache mäh n'äple Lhawuk.

Lham tä n'aiwasthiche, mat n'aichesthihena.

Iwo lhalätshaya, mat iwohla lechaya.

₂Che pajfwaj inachajila n'amehen lhaw'atshancheyaj,

wet n'aineyhthiphäla häpkhilek

y'ehi tä tatache wet y'aläyhiche.

₃N'alhaikhajyench'oyek y'antäfwelej Lhawuk.

Lhawuk nämla n'amehen tehlat iwoye ifwala,

wet äp tehlat iwoye pelhay tä ipumyenpe honhat

tä chelhchup lhäy'e tä ispeyak.”

₄Lhawuk yok:

“¿Atsi m'ak tä owoyej amehen, Israel?

¿Atsi m'ak tä owoyej amehen, Judá?

Häp amel ahumnhayaj tä leti n'oyej

tet iwoye tutsetaj tä nech'e fwamlafwaj tä i'pe honhat.

Äp tet iwoye iyas tä ifwalahlä,

wet äp n'älpe honhat tha äp noj t'at.

₅Häp tä tamenej tä ochen amehen profetas,

häpkhilek ailänejen olhämtes tä äyteschehen

wet y'ithatlhi amejen ates.

Tsi okalelhthayaj tehlat iwoye lep tä i'pe honhat,

lhäy'ehila lhip tä n'äl.

₆M'ak tä owatlä häpe t'at che lehuminayn'o,

lhäy'e tä letäfwelay n'oyej tä ohäpe aka Dios.

Tek owatlä otw'ayhtes

lhäy'e itshätäy tä lelänhen

tä lhen han'okhayaja n'oyej.

₇“Mat oka wichi iten Adán lech'isukyajte.

Lhamel iwohiyet'a olhämtes

wet tek lhay'amkat n'oyej.

₈Galaad häpe hupuy tä m'ak tä ni'isa lewos,

nilhok tä w'oyis iläfwelchehen tä ihi.

₉Sacerdotes nichätejlä anikoyis

tä hiw'enlä elhpej tä inukwe n'äyij.

Lhäy'e lhip tä ni'isa m'ak tä lhamel iwoye,

y'aje tä ilänhen wichi

tä ihi n'äyij tä tataye Sikem.

₁₀Ihi Israel m'ak tä ow'en

tä hich'atej tä ni'isache:

Oka wichi iwot lakeya wet lhaikänchi.

₁₁Wet amel tä Judá lhayis,

wak'alh tä owo lewhäya

tä oti amejen otasnhayaj.