Oseas 7

₁“Che owatläk ochesat oka wichi Israel

wet owo elha len'äyij,

nech'e n'äl lhamel lech'isukyajay

lhäy'e m'ak tä ni'isa tä iwoye.

Tsi iwo lefwech'enhayaja,

wet tiyäjchufwi wichi lew'etes wet t'etane lakhäy,

wet inuye wichi tä i'alhoye

wet isoyej m'ak tä iyej.

₂Lhamel nitäfwelayej tä ohanej t'at

nilhokej m'ak tä ni'isa tä iwoye.

Ilafwlhi lhamejen lakeyis tä ni'isachehen

tä nilhokej ifwalas tä ow'en t'at.”

₃Lhawuk yok:

“Wichi ikäntejwethä laka niyatey

häp lhämtes lhäy'e m'ak tä iwoye.

Mat t'akanyaj t'at,

tsi tek matchehen lhämtes.

₄Nilhokej lhamel iwo keyayejen

iyhäj tä fwetaj yen kaniyata.

Lefwitseyaj tet iwoye n'onhonthi

tä lewo ilhänche wet ileyej,

wet ilhethi harina pajtha tawojoyhi.

Tek iwatläk itetshan tsi lak'e t'at.

₅Häp ifwala tä niyat iwo lakäjyaja

tä taje ifwalahte tiyäjo leniyatyaj,

lech'otfwas iyäynej hat'es pajtha w'oknaj,

wet lham lhaip'ajtej wichi tä aläkwyhantses.

₆Lechowhal tet iwoye n'onhonthi tä õknit'uyaye.

Tä honatsi lewo imä t'at,

mat lak'e t'at pajtha ifwalayej tä y'oho.

₇Nilhokej lhamel tet iwoye n'onhonthi tä y'oho,

wet hip'ohen laka niyatey pajtha nofwen t'at,

wet neyachet elh che iwo olheya.

₈“Israel lhayis lhailhahtej

iyhäj tä kahäpeya lhamel.

Lhamel tet iwoye woyo tä lhip elh n'oya.

₉Wichi tä w'enha lhamej

ihämit Israel lakhajyhayaj,

wet lhamel nitäfwelayej.

Tej tä lew'oley ipelajchehen,

tha äp nitäfwelayej.

₁₀Tä lhamel lhaichäjwethä,

wet häp tä hin'älit tä letes ihi.

Tej tä tetso thayej,

lhamel tapinhit'a n'oye

wet nit'uya n'okwe tä ohäpe Lewuk Dios.

₁₁Lhamel tet iwoye hokwinaj

tä nhana honhatej wet laj lechoweja.

Ichunkat Egipto tä w'et t'alheje lech'otyaj,

wet äp w'et ihoye Asiria.

₁₂Tha che tiyäjla kanhi,

otihlahlä oka hotanaj,

otälhthiphäla tehlat iwoye

afwenche tä tälh puleye.

Che oläte lhamel tä hap'akwekhen,

wet osakanhiyeja.

₁₃“¡Lewit'äyhyaj tälhiyela tä lhamel ile n'oyej!

Letäyhyaj ichätyenla'pe lhamel

tsi hin'älit tä tatay n'ohlä.

Owatläk ofwayhthen,

mat lhamel tatayej n'ohlä

lhämtes tä kamatachehen.

₁₄Tej tä t'än n'och'oye tä i'pe lemäwet,

mat nitälhaho lechowej.

Che t'alhch'oye trigo lhäy'e hat'es,

lhamel lhaisajwethä,

tä hin'älit tä tatay n'ohlä.

₁₅Ochufwenhen naji

wet okhajyenhen naji lethilis.

Mat lhamel yetne m'ak tä ni'isa

tä itayhat n'ohlä.

₁₆Lhamel yäplej tä t'ekhaye

takwey lhenhay tä w'et m'ayhay t'at.

Lhamel tet iwoye lutsej tä tats'ufwiho

tä lotek niwetaye m'ak tä õtiyäjej.

Tsi lhämtes isichehent'a,

laka niyatey nofwiyeja,

wet häpkhilek Egipto lheley

itihiyeja leläkwyhanyaj.”