Lewit'äyhyaj tä profeta yämeje Etiopía
1¡P'elitsaj honhat tä tsawotas tumpe,
häp honhat tä iw'echehi
tewok lhayis tä ihi Etiopía!
2Laka wichi ichen lewos tä inukwe tewok Nilo,
lhamel ihiche laka barcos tä tuskalis.
¡Mähen, silätwos tä iläfwenhen,
äple aka wichi tä pites wet äp isis!
Nilhokej wichi tä i'pe honhat nowaye lhamel,
tsi takhajayhen wet äp lhainuhatpe iyhäj,
wet lew'et honhat tä wuj tewok lhayis ihi.
3Nilhokej amel tä lhe'pe honhat,
lew'enla n'otetnek chik n'äle'pe chenaj,
wet äp leläthiyelak pitsaje
n'ofwolis tä tson'ataj ch'ul.
4Tsi Lhawuk tahuy n'oyej wet yok:
“Tä oihi ow'et otamsek ihi,
oyahin t'at, otet iwoye ifwala tä isi,
wet otet iwoye ayas tä nitsäyhchä
tä wichi ilanhi yachuyaj lhay tä wak'alh.
5Chik tajyäme tä tawoy
uvas tä ihiche n'olafwey,
wet nech'e häpe uvas tä y'o,
mat lewuk yisthen lhachal
tä kamaj nilanahi uvas,
yistejen tsonhat wet iwom lhachaltso.
6Nilhokej õ'womlahlä afwenchey
tä n'okotses tä ihi chenhas,
lhäy'e itshätäy tä fwitses tä i'pe honhat,
wet afwenchey lhäy'e itshätäy tufwihena.”
7Wet häp lewhäytso õ'hänhiyela
Lhawuk tä lajit letumfwaya
häp m'ayhay tä wichi tä pitestso
wet äp isis yen t'awayhata,
häp lhamel tä nilhokej wichi tä i'pe honhat nowaye,
häp lhamel tä takhajayhen
wet äp lhainuhatpe iyhäj,
wet lew'et honhat tä wuj tewok lhayis ihi.
Õ'hänhiyela m'ak tä yen t'awayhtesa
häp chenaj Sión tä õyen lew'eta
tä õn'okwiyej Lhawuk tä lajit letumfwaya.
