Lewit'äyhyaj tä profeta yämeje Egipto
1Profeta lhämet tä yämeje Egipto lewit'äyhyaj wet yok:
Lhek yahinya Lhawuk,
nek tä ihoye Egipto,
yen w'uteya pule tä iläfwel.
Wet n'ocheyälis tä õyen dios lhayisa tä ihi Egipto
tachettichehen tä tott'aye,
wet Egipto lheley wuj lenowayhyaj.
2Wet yokwe Lhawuk,
“Otayyenlawek Egipto lheley.
Hin'o tatayhlahlä elh,
wet wichi tä ihi lhip elh tatayhlahlä
iyhäj tä lew'et w'enha lhamej,
wet niyat tatayhlahlä elh tä äp niyat.
3Wet wichi nemla is,
wet tek o'isyenla alhoho
m'ak at chik häpek fwetaj iwoye.
Häpkhilek lhamel tay'ätshane
lecheyälis tä yen laka dios lhayisa,
lhäy'e hiyawul, lhäy'e han'ältshantses,
lhäy'e wichi tä pajche y'inhen lehusey.
4Mat otihihila niyat tä t'un häp Egipto,
häpkhila hin'o tä wuj tä ni'isa
yämthilek lhayen niyatayej.
Olham tä ohäpe Dios tä matche olhämet täjtso.”
5Wet tewok Nilo y'imhila wet tamchäyhla,
6wet inätes tä inukwehen len'äyhäy najuthihichela.
Nilhokej inätes tä ihi Egipto
t'ayhichelahchä pajla'tha y'imche,
wet tatäyhla kanohis lhäy'e tuskalis.
7Nilhokej m'ak tä w'atshan
tä iche tewok Nilo lhip,
lhäy'e n'okäs, tamchäyhla wet tatäy.
8Wet hin'ol tä t'ukwe w'ahat
tä ihi tewok Nilo nilhak'anhilawethä.
Häp lhamel tä ithatpej inäte lewotey,
lakäjyaj ihihit'ala.
9Wet iyhäj tä yen lechumeta lino
tä yenejwethä m'ayhay,
lhamel y'enhiyeja,
wet atsinhay tä tayhinhen,
lechowej ilehthihena.
10Wet häp lhamel tä yenwethä wesas y'enhihena,
wet iyhäj tä yenwethä m'ayhay at chik häpe yohlak,
“¿Atsi m'ak tä y'awoye?”
11¡Ach'isukwis t'at, amel tä Soan kaniyatey,
amel tä lewo lechoweja Egipto kaniyat!
Lefwetaj ahäpehen laka ahantses
tä wuj tä lehusey ihi.
Nemhit laha ihi ämtes tä lewoyaye.
¿Chip iwoye tä lefwetaj letahuyej aka niyat wet lhok,
“Ohäpehen hin'ol tä ahantses leles,
wet äp otälhe niyatey p'ante ichun”?
12Egipto kaniyat, ¿chip ihitso aka ahantses
yämthilek iwo siläta amej
m'ak tä Dios tä lajit letumfwaya
iwaklhat tä iwohiyejela häp Egipto?
13Niyatey tä ihi Soan ch'isukwis t'at,
wet niyatey tä ihi Menfis ikan lhamejen.
Niyatey tä ihi lhip chik häpe ifwenho
laka niyat tä lhamya tä ihi Egipto
häp m'ak tä is chik iwoye, mat iwetahat.
14Tsi Lhawuk hiw'enho lhamel letichunhayaj
tä nhanayej iwoyneje m'ayek,
wet häp tä tamenej tä nilhokej m'ak
tä Egipto iwoye isit'a alhoho,
tet iwoye w'oknaj tä taphuthihi lech'uyhat.
15Wet nehit katsik ihanhiyeja iwoyneje
yämthilek tach'ote Egipto,
tej chik hin'o tä niyat,
wok elh tä lakawo,
wok elh tä len'ohyaj ihi,
wok elh tä laj len'ohyaja.
Egipto lheley lhayachajiyela Lhawuk
16Wet ifwalatso hin'ol tä ihi Egipto tehlat iwoye atsinhay. Wuj tä lenowayhyaj ihihila lhamel chik hiw'en tä Lhawuk tä lajit letumfwaya ineyhatphä takwey yämthilek itasnhen lhamel. 17Wet wichi tä ihi Egipto nowayhenla tä ihi tä Judá tatache. Tejlak tajlhamat lhey tä yen tichunhayaja, mat wujla lenowayhyaj tä ihanej m'ayhay tä Lhawuk tä lajit letumfwaya iwohiyejela Egipto.
18Wet ifwalatso ihichela cinco honhates tä ihi Egipto tä wichi tä ihi ihanhiyeja Hebreo lhämet tä yämwethä, wet hit'unthiyejchela lhämet tä iwoyeje Lhawuk tä lajit letumfwaya. Elh honhatestso lheyla “Ifwala kahupuy.”
19Wet ifwalatso ihichela altar tä ihi t'at lechowej Egipto tä õyen lewuka Lhawuk. Wet õyenhilhila tunte tä õ'tshänchä tä õyen t'amajchetayej Lhawuk, õ'tihlawhäye lepes honhat tä Egipto. 20Häpkhilek n'otetnektso wichi tä ihi Egipto yen tichunhayaja Lhawuk tä lajit letumfwaya. Wet chik lhamel t'änch'oye Lhawuk wet t'alheje lech'otyaj yämthilek letayhfwas nikalhahi, Lhawuk ichenhiyela hin'o yämthilek ifwayhtej letayhfwas. 21Lhawuk lhaitäfwnhathiyeja Egipto lheley, wet lhamel nitäfwenhiyeja wet n'okwihiyeja, wet ilänhihena itshätäy tä yen n'okhayajayej, lhäy'e t'awayhtes tä yachaje. Wet lhamel iwohiyejela lhämtes wet imatthichehena. 22Wet Lhawuk iwit'äynhila Egipto, mat hi'isyenla. Lhamel lhayachajiyela Lhawuk, wet Lhawuk hip'altsenhihena wet ichesthihena.
23Wet ifwalatso ihichela n'äyij tä tsajche, tälhe Egipto pajla'tha nichäte Asiria. Wet Asirio lhayis ihohiyela Egipto, wet Egipto lheley ihohiyela Asiria, wet nilhokej lhamel lhaip'ajthilawek tä n'okwiyej häp Lhawuk.
24Wet ifwalatso Israel lhaip'ajthiyeja Egipto lhäy'e Asiria, yämthilek nilhokej wichi tä i'pe honhat isej. 25Tsi Lhawuk tä lajit letumfwaya takäpfwayhiyejela m'ak tä is häp honhatesna, wet yohlak:
–Olham otkäpfwaye Egipto, oka wichi t'at, wet otkäpfwaye Asiria tä olhenek, wet otkäpfwaye Israel tä Olewuk.
