Isa 20

₁Iche ifwala tä rey Sargón, Asirio lhayis kaniyat, ichene laka sip'äl kaniyat häp honhat tä hupuy ihi tä lhey Asdod. Wet yik tä inuye honhattso wet ikalhi. ₂Wet tä kamaj nichätaye lewhäytso, Lhawuk tahuyej häp Amoz lhäs tä lhey Isaías wet yok:

–Mäh lanche haw'uyis tä yelaj tä letaw'uyhi, lhäy'e anisähes tä ihi apach'ol.

Isaías iwoye, ilanche lew'uyis lhäy'e lenisähes. ₃Wet tä Asirio lhayis ikalhi Asdod, Lhawuk yok:

–Okawo Isaías lajit lew'uya wet äp lajit lenisäja pajtha tres nekchämis, häp tä oyen tetnekayej Egipto lhäy'e Etiopía. ₄Tsi mälhhiyejattso chik rey tä ihi Asiria yen kwenkaya häp wichi tä ihi Egipto lhäy'e Etiopía, wet ichäjiyela laka honhat nilhokej, häp thänhäy lhäy'e mamses, lajit lew'uyisa wet äp lajit lenisähesa, wet wujlak õhn'äfwlhatlawethä tsi lewhay n'älchetpe. ₅Wet wujlak wichi inuhat lhamhohen wet len'äfwlhi ihi tä hiw'en Etiopía wit'äyhyaj, tsi häpe t'at tä wichi t'ekhaye, lhäy'e Egipto tä wichi fwetaj häpkhilek isej. ₆Wet ifwalatso wichi tä iche lewomekitaj lhip yohlak:

–Lhek yahinya m'ak tä lewit'äyhyaj häp wichi tä y'at'ekhaye, häp wichi tä y'ahoyepej yämthilek tach'ot n'amehen wet ifwayhat n'amejen Asiria kaniyat. Nemhit iche m'ak chik y'afwetaj n'aisiyeja.