Lewit'äyhyaj tä profeta yämeje Babilonia
1Profeta lhämet tä yämeje ts'anis wet yok:
N'otäyhyaj tälhe ts'anis tä tanhoch'ay,
hätet iwoye yafwthitas tä fwitses.
2Matche tä äytaj ow'enek tä Dios ipäyen n'oye.
Ow'en akantses tä iwo t'akanyaja,
wet wichi tä iwasthiche m'ayhay iwasthiche t'at.
¡Elam lheley, nechephä!
¡Wet amel, Medo lhayis, nuyaye atayhfwas!
Nofwila t'at wichi leteläythayajay.
3Tä oyen tichunhayaja tähestso,
wuj tä olhailät.
Olhaits'ulhkatejche tä äytaj ot'isan,
ohätet iwoye atsinhak eyte iwohi lhäsa,
wuj tä lhailät.
Wet oläthichet'a honhat
tä lhäy'e lhip tä olhakli ihi,
wet tä matche tä onoway,
oyahinpe honhat hätet iwoyek ichalajchä.
4Ohusek tatäy t'at,
lhäy'e lhip tä otk'efwiyejche onowayhyaj.
Wet okäjyaj tä ipej n'oyej tä honaj
tä wuj tä ohumin honatsi,
nech'e häpe t'at onowayhyaj
tä lhäy'e lhip tä ni'isa.
5Wak'alh n'olhäk,
õhch'enche katsi n'oyhil tä n'ot'äsawtes,
wet õ'wo tesa n'okäjyaj.
¡Kasthen, sip'äl kaniyatey,
chumahen afwamthis tä chinhas!
6Tsi Lhawuk ifwel n'oho tä yok,
“Mäh tihi hin'o yämthilek t'uye hupuy,
häpkhilek iwo siläta wichi
m'ak at chik häpek hiw'en.
7Is chik wuj tä itetshan
chik hiw'enlä kaletas
tä täkwfwas yel'atas tä iton,
wok wichi iche'pe asnolis wok camellos.”
8Wet elh tä n'okasthaynek t'än wet yok,
“Iwuk, oihi t'at lhip tä leti n'ohi
tä ot'uye hupuy imälhewek ifwala,
lhäy'e tä honatsipej otkasitlhi t'at.
9Wet ow'enlä kaletaj
tä yel'atas täkwfwas tä iton.”
Wet iche elh tä iläte täjtso wet yok,
“¡Tä mälhyejtso, tatäy t'at Babilonia!
¡Nilhokej lecheyälis tä yen laka dios lhayisa
nichätche katsi wet wasiche!”
10Amel tä ahäpehen oka wichi,
wichi t'äs amche hätet iwoye trigo tä õt'äsi.
Mat athana nech'e owo siläta amej m'ak tä oläte
tä häpe Lhawuk tä lajit letumfwaya,
häp Israel laka Dios, lhämet.
Profeta lhämet tä yäme Edom
11Profeta lhämet tä yäme Edom wet yok:
Iche hin'o tä t'än n'o'pe tä tume Seír tä yok,
“N'okasthaynek, ¿hä kamaj ifwalahit'a?
N'okasthaynek, ¿hä kamaj ifwalahit'a?”
12N'okasthaynek nichulho wet yok,
“Ifwalahila, mat äp yachajiholak honatsi.
Tä mälhyejtso,
chik lewatläk letay'ätshan n'oye,
achajolak lenäm.”
Lewit'äyhyaj tä profeta yämeje Árabe lhayis
13Profeta lhämet tä yämeje Árabe lhayis lewit'äyhyaj wet yok:
Amel tä lewoyay haw'ekyaja tä letälhaye Dedán,
chik honatsi wola elakw'etahi
häp hal'äy tä lhaihutwek tä ihi ts'anis,
14wet chik lew'enlä wichi tä ichimhen,
istejlä wet w'enho inät.
Wet amel tä lheyayhi honhat tä lhey Tema,
istejlä wichi tä ilethanhen wet w'enho lhäk.
15Tsi lhamel ilethanlä n'ofwajnhates tä y'uy,
lhäy'e n'och'ähal tä õtiyäjejen,
lhäy'e n'oka'tshayaj.
16Lhawuk tahuy n'oyej wet yok:
“Mälhyej nekchäm weihalha
tä hin'o tä chumaj tachumlhi,
ikalhi t'at lakaha,
häp tä mälhhiyejatso, chik taj lewhäy,
nofwila imälhewek Kedar lewujyaj.
17Wet imälhehihila lhimphaj lutses
tä iyej hin'ol tä iwo laka'tshayaja tä lew'et Kedar.”
Lhawuk tä Israel laka Dios
yäme tä mälhhiyejatso.
