Lewit'äyhyaj tä profeta yämeje Jerusalén
1-2Profeta lhämet tä yämeje lew'enek tä häpe lakawayhi, wet yok:
Amel tä lhehi Jerusalén lewopej akäjyaja
wet letaw'ulhche'pe awukwey.
N'ohuyaj tapoyej hupuy tsi lhen akäjyajw'eta.
Mat ohanhiyejt'a m'ak tä tamenej tä lewoynejetso.
Tsi lhek yahinya, aka wichi tä y'inhen
ihihit'a n'oka'tshayaj tä y'inhen.
3Wet aka niyatey yikhen wet inukwe alhoho
tä fwetaj ilethanlä n'och'ähal,
mat õ'tsokwethä wet õyäythen.
Wet aka hin'ol tä takhajayhen
atoschey tä ilethanhen,
mat häte õ'tsokwethä wet õyäythen.
4Häp tä tamenej tä oyok,
Mäyay och'oye, owatläk wuj tä otafwlhi.
Wet yej p'altsenn'o tä otafwiyejlhi
oka wichi lewit'äyhyaj tä wuj tä ni'isa.
5Tsi Lhawuk Dios tä lajit letumfwaya
pajche iwaklhat t'at.
Chik nichäte ifwala tä lewhäy,
wet nämla häp n'owit'äyhyajtso
chik ihi lakawayhi tä ow'enek ihi,
häpkhilek wichi lhäy'e lhip tä nowayhen
wet nemhit kalelhäj m'ak tä fwetaj iwoye.
Wet õ'wasthihichela n'olafwey tä hupuy lep'otes,
wet wichi tä t'änhen
lepak nichäthiyela chenhas.
6Elam lheley iwaklhat t'at lech'ähal,
wet pajche ihiche t'at
häp kaletas tä n'oka'tshayajchal,
wet iche'pe yel'atas.
Wet wichi tä lew'et Kir
ichäjwethä lefwamthis.
7Wet lakawayhil tä isis tä ihi Judá,
wujpey kaletas tä ihiche,
wet nifwotaj tä iche'pe yel'atas
lhamel inuye hupuy lepe,
8wet nemhit õt'uye wichi tä ihi Judá.
Ifwalatso let'ekhaye
n'oka'tshayajchal tä ihi lew'et,
9-10wet lew'en David laka Hupuy
tä wuj naksel tä ihi,
wet letetshan wichi lewukwey
wet lenachuhen iyhäj yämthilek lhenejlhi
n'olafwek tä hupuy lep'ot tä wasi.
Wet lhäm tapoyejej inät n'opek tä tumchä,
11wet n'olafwey tä tataywek lhenay lehiya
inät tä tälhe n'opek wumek tä i'alhoye.
Matkat letetshanhit'a Dios
tä lhenek nilhokej m'ayhayna,
häp lham tä pajchey
tä yen tichunhayaja tähesna.
12Wet ifwalatso Lhawuk Dios tä lajit letumfwaya
ne'tek letafwchehchä wet lep'altsenchehen achoslis,
wet ne'tek lhisetchehen haw'oley
wet letaw'uyhiche haw'uyis tä yelajen
tä atetnek amejen tä wuj tä äytaj atichunhayaj.
13Matkat akäjyaj t'at tä lewoyaye,
lelänhen w'asetas lhäy'e tson'atas,
wet letufw t'isan wet leyäyej hat'es wet lhok,
“¡Huwa n'at'ekhen wet n'ayä,
tsi chik fwala y'at'inhen t'at!”
14Wet Lhawuk tä lajit letumfwaya
tahuche och'ote wet yok:
“Tek otäyhthiyeja lech'isukyajay
häp wichina pajla'tha y'inhen.”
Lhawuk Dios tä lajit letumfwaya,
lhämet t'at täjtso.
Õhw'enhihola Eliaquim häp Sebna len'ohyaj
15Lhawuk Dios tä lajit letumfwaya tahuy n'oyej wet yok:
–Mäh hoye Sebna, häp hin'o tä niyatej rey lewukwe, wet fwenhola olak,
16“¿Atsi m'ak tä lewoye kana?
¿Atsi tä lhämet amej
tä lhenlhi amho n'op'itsek lehi
wet letijo chenaj yämthilek
letihi lhip tä tumphä?
17-18Lhek tetshan,
lhäm ame tä akhajyhayaj ihi,
mat Lhawuk ithatla ame
lhip tä wuj tä atofwey.
Aitsokhilhila wet tafwomla amej,
atehlat iwoye pelota,
ithatla ame honhat tä wuj
wet lhehihilak let'il.
Nilhokej kaletas tä lhen awujyaja imälhehihila,
wet letamenhiyeja aka niyat chik len'äfwlhi ihi.
19Osohla amej achumet
lhäy'e lew'et tä aniyatej.
20“Wet häp ifwalatso ot'änhiyela
okawo Eliaquim, Hilcías lhäs,
21wet ow'uyyenhihila haw'uy
wet ow'enhihola han'ohyaj lhäy'e aniyatyaj.
Wet lham tehlat iwoyek
Jerusalén lheley lajcha t'at,
lhäy'e Judá laka wichi.
22Len'ohyaj ihiyeja häpkhilek tach'ote
David leles tä lepes lheley,
tehlat iwoye llave,
wet m'ak chik ifwoyenche
nehit katsik hip'ohihila,
wet m'ak chik hip'ohi
nehit katsik ifwoynhichela.
23Lham tehlat iwoyek
n'oniyatyaj lew'et t'at,
wet lew'et lheley wujyaj
tälhiyela häp lham.
Wet olham oyämla t'unhi
tä ihi lew'et tä ihi,
tehlat iwoye clavo,
24wet nilhokej lew'et lheley
lhayenla lham lelhuka,
tehlat iwoye n'olhäthis
lhäy'e lehis iyhäj tä ifwuhilhi.
25Wet häp ifwalatso
clavo tä pajche õ'käjejo tä ihi nemla t'unhi.
Õ'lanhihila wet nichätla honhate,
wet nilhokej m'ayhay tä ifwuhilhi wasihichela.”
Lhawuk tä lajit letumfwaya
lham t'at tä iwoyetso.
