Lewit'äyhyaj tä profeta yämeje Tiro lhäy'e Sidón
1Profeta lhämet tä yämeje Tiro lewit'äyhyaj wet yok:
¡Afwchehchä, amel tä abarco lewos
tä lenukwehen lewomekitas,
tsi õ'wasthiche barcos kasthawetes tä ihi Tiro!
Häp lakasthawet tä barcos
tä tälhe Chipre takasthipej
pajche wasi t'at.
2¡Ok tam, amel tä haw'et Tiro!
¡Woyay atamsekisa, amel tä haw'et Sidón
tä lhen achumeta tä lewom m'ayhay!
Häp hin'ol tä amel lechen
tä lhen awosayej tä ifwelwethä m'ayhay,
3lhamel inukwe t'at lewomekitas tä pitos.
Wet lhamel ikalheji chinaj t'äj
häp trigo tä tälhe Sihor,
häp yachuyaj tä õ'lanhi tä tälhe tewok Nilo,
wet ihänehen honhates yämthilek wichi ichäj.
4Is tä len'äfwelh t'at, Sidón,
tsi lewomekitaj tä takhajay yok,
“Nemla iche barcowos chik tälh ame,
wet nemla iche iyhäj chik ochufwenej
yämthilek yen lechumeta.”
5-6Wet chik Egipto lheley ihanch'oye Tiro wit'äyhyaj,
wujlak lelhakli ihi wet yohlak,
“¡Mähen hoyaye Tarsis, wet wo afwitajayaja,
amel tä lhehi lewomekitaj lhip!”
7¿Hä matche tä Tiro häpe honhat
tä tälhe tä pajche,
wet wuj tä ihumin tä iwo lakäjyaja?
¿Hä häp täja wichi tä ihumin tä ihoyehen
honhates tä wuj tä atosehen?
8¿Atsi tä iwoye lhämet tä itayyenejlä Tiro,
häp honhat tä lhamya tä yen niyateya
iyhäj tä ihi honhatil iyhäj?
¿Atsi tä iwo lewit'äyhyaja häp Tiro,
häp honhat tä laka wichi ifwelwethä m'ayhay
wet niyatey lhäy'e hin'ol
tä len'ohyajay ihiche ichäj?
9Oyok, Lhawuk tä lajit letumfwaya
häp tä yenlhi täjtso,
yämthilek y'ayhatchä
nilhokej lhamel tä lhaichäjwethä,
wet yen w'et m'ayhaya
nilhokej lhamel tä len'ohyajay ihiche
tä ihi honhat.
10Amel tä lheyayhi Tarsis,
chumwethä, enaywethä akäsw'etes,
tsi aka barcos kasthawetes
tä ihi Tiro nemhit iche.
11Lhawuk ipiyenpe takwey häp lewomekitaj,
wet ichettiyenwethä wichi tä ihiche honhates,
wet ne'tek õ'wasthiche hupuy
tä takhajayhen tä ihi Fenicia.
12Wet tahuye honhat tä Sidón wet yok,
“Nemla lewo akäjyaja,
atet iwoye lhutsha tä hin'o hip'ajtitchä
wet nemhit lehanej lewoyneje
m'ak chik am lewoye.
Wet tejlak wichi tä tälh ame nichäte Chipre,
mat tek tafwayhiyeja lewit'äyhyaj.”
13Lhek yahinya Babilonio lhayis kahonhat,
häp wichi tä tet iwoyek nemhit iche.
Asirio lhayis yen ts'anisa
wet itshätäy yen lew'eta.
Asirio lhayis ineyhatphä häp lew'etes
tä atoschephä yämthilek isakanho,
wet iwo lemoka häp niyatey lewukwey tä ihi,
wet iwasthi.
14¡Afwchehchä, amel tä abarco lewos
tä lenukwehen lewomekitas,
tsi õ'wasthiche t'at hupuy
tä takhajay tä aisej!
15Wet lewhäytso nemla õyen tichunhayaja Tiro pajla'tha setenta nekchämis, w'awulho ifwalas tä rey iläy. Wet chik tajyäme setenta nekchämistso, õ'tenla atsinha tä kain'oyaj länek letenek yämthilek Tiro iläte tä yok:
16“Kain'oyaj länek tä n'owomek,
chuma aka arpa wet lunche hupuy,
ten música tä is, lhäy'e iyhäj n'otenkay.
Elat wichi nitichunhila hach'oye.”
17Wet chik tajyäme setenta nekchämistso, Lhawuk yachajiholak äp itetshan häp Tiro. Mat Tiro yachajiholak lhaip'ajtej nilhokej wichi tä ihiche honhates, wet iwomla m'ayhay, ichäjla m'ayhay, 18mat chinaj t'äj tä ikalhi õyenla t'amajchetayej häp Lhawuk. Häpkhit'alak õt'amajej, mat õhw'enhihola häp lhamel tä Lhawuk laka wichi, yämthilek lhamel ichäjej lhäk tä wuj lhäy'e lew'uyis tä isis.
