Isa 24

₁Lhek yahinya,

Lhawuk itäyhthila m'ak tä i'pe honhat,

iwasthihila, wet yäpnhila lhamej

täjp'ante nikalelhäjahchä m'ayhay,

wet ifwtsatkatla'pe honhat häp wichi.

₂Wet lewit'äyhyajtso y'ajiyela nilhokej,

tej chik n'ohusewo, wok wichi,

wok niyat, wok lakawo,

wok atsinha tä n'owuk, wok lakawo'tsinha,

wok hin'o tä iwom m'ayhay,

wok elh tä ichäj m'ayhay,

wok elh tä icheyjäntej

laka chinaj t'äj häp elh,

wok elh tä lham iwo lecheyjänhata,

wok hin'o tä laka pi'ä ihi,

wok elh tä hiw'enho laka pi'ä.

₃Honhat imälhehilawek

tä tatäy t'at m'ak tä ihi,

imälhehilawek tä õ'soyej.

Lhawuk t'at tä iwoye lhämettso.

₄Honhat tamchäy tet iwoyek t'inhayaj ihi.

Imälhewek tä tamchäy,

wet pule lhäy'e honhat tawelkaywethä.

₅Wichi tamenej tä nemhit is honhat

tä lhamel ileyej Dios lhämtes.

Lhamel iwohiyet'a m'ak tä ne'tek iwoye,

mat inäk'äs Lhawuk lhämet p'ante

hit'unhatche wet nittäya.

₆Häp tä tamenej tä takäpfwayeje

lewit'äyhyaj honhat wet iwasthi,

wet wuj n'otasnhayaj tä iyej wichi,

wet nemhit wujpe häp wichi tä ihi honhat.

₇Uva lhiley tamchäy wet nemhit hat'es iche.

Wet wichi tä wuj tä lakäjyaj ihi,

lefwitajayaj ihi t'at.

₈Noj lepakas n'opumis lhäy'e arpa,

wet wichi tä iwo lakäjyaja yok tam,

nemhit lakäjyaj ihi.

₉Nemhit iyäyej hat'es tsi akäjit'a,

wet nemhit ichoywethä.

₁₀Wet wichi lew'etes

nemhit kalelhäj m'ak tä häpe,

wasi wet tatäy.

Ihichet'a elh chik tiyäjchufwi hup,

tsi õhp'ohiche lepelis.

₁₁Wichi tafwchehchä tä inukwehen

hupuy kawayhil tä nem hat'es iche,

wet nemhit iche n'okäjyaj chik ihi honhat,

hätet iwoyek õ'soyej.

₁₂Õ'känchi hupuy wet wasiche lepelis

häp n'olafwek tä hupuy lep'ot.

₁₃Mälhhiyejattso nilhokej wichi tä i'pe honhat.

Hätehlat iwoye olivo lhile tä õy'ajo,

lhay natchä, niwohit m'ak chik imälhehi.

Wok hätet iwoye uvas tä õtch'uppe lew'et

tä pajche õ'lanhi lhay,

niwohit m'ak chik imälhehi lhiley.

₁₄Wet wichi tä imälhehi tä õknilänahen,

chik hiw'enla Lhawuk lewujyaj, lakäjyaj ihihila.

Pitsajiyela lepakas tä äytaji

tä tumche tä ifwala y'uy.

₁₅Häte wichi tä tumej tä ifwala tälhche,

lhäy'e wichi tä lew'etes lewomekitaj lhip,

lhamel iwujyenla Lhawuk, Israel laka Dios.

₁₆Matche, y'aläte t'at wichi

tä ihi honhat lepesey

tä lhamel ichoywethä

tä iwujyen Lhawuk wet yok:

“¡Lewujyaj ihi häp lham tä is!”

Matkat oyok, ¡Matche tä op'elitsaj t'at,

hätet iwoyek ot'inhayaj ihi,

hätet iwoyek iwos tufwn'o!

¡Tsi akantses iwo t'akanyaja,

matche tä iwo t'akanyaja!

₁₇Wet wichi tä i'pe honhat

hätehlat iwoye itshätäy,

hin'ol tä lhayen chowalhnhasayej

takähännhej t'at.

Wok elat nichäte chowej

wok t'äsi niyäkw tä õyenej.

₁₈Wet elh chik chowalhnhas nisakanayej,

nichäthiyelat chowej.

Wet elh chik isakanphä

tä inuphä tä ihi chowej,

t'äsihila niyäkw.

Wet tafwohichehena lepelis tä ipuleye

wet pelhay tä wuj itäyhthila wichi.

Wet ihichela honhat w'ahu

₁₉wet honhat wasihila,

hätehlat iwoyek õ'sichätlhi

wet hikw'eschehen.

₂₀Tan'ajilhila, hätehlat iwoye w'oknaj,

wok häp hup tä n'ohuplawet tan'ajlhi t'at.

Lech'isukyajay choyhat tä i'pe,

wet nichäthiyeja katsi wet tek neyhiphäla.

₂₁Wet ifwalatso Lhawuk itasnhila

n'okhajyhayajay tä iche tä kaphä,

lhäy'e niyatey tä i'pe honhat.

₂₂Hip'ajthilawek wet ithathihola n'op'onthi,

wet chik tajyäme wujpe ifwalas, itasnhila lhamel.

₂₃Wet Lhawuk tä lajit letumfwaya

lhain'älthila tä häpe Niyat,

ihla'pe chenaj Sión tä ihi Jerusalén.

Wet nech'e ifwala lhäy'e iwel'a y'omhila,

wet Lhawuk laka wichi kaniyatey

hiw'enla lham lewujyaj.