Lewit'äyhyaj tä profeta yämeje Jerusalén
1¡Awit'äy ihi, Jerusalén,
Jerusalén, honhat tä David ihi p'ante!
Tujlhache tä lewo akäjyajaya
nekchämpej nekchämpej.
2Mat olham onämla wet olhaklitla aka wichi,
lhamel tafwichelahchä wet lelhakli ihi.
Tsi otihiyejena owäk wet Jerusalén
hätehlat iwoye altar tä itäj tä y'uho ihi.
3Ochenhiyela oka nifwotaj
wet lhehihila lhamel lechowej,
wet ineyhthichephäla lew'etes
tä atoschephä yämthilek inu ame.
4Ahäpkhila m'ak tä w'et m'ayek t'at,
lechätla honhate wet apak tumhihola honhat,
hätehlat iwoye honatsi lheley.
Ämtes tumhiholat holo
wet lajit akhajyhayaja.
Dios ifwayhthila Jerusalén
5-6Mat leselthiyejak Lhawuk tä lajit letumfwaya
itasnhila atayhfwas.
Ilänhiyeja pelhay tä fwitsaj,
lhäy'e honhat w'ahu,
lhäy'e yafwthitaj tä äytaji,
lhäy'e itäj tä hip'ohen m'ayhay.
Wet atayhfwas tä wujpey tajlhamhiyelat lemok,
wet iyhäj tä takhajayhen hätehlat iwoye hup
wok hal'ä lhawo tä yafwthitaj ichäj.
7Nilhokej wichi tä wujpey
tä iwo ka'tshayajayej Jerusalén,
wet tatayhlä wet inuye
n'olafwek tä hupuy lep'otes,
wet ilhaklit wichi,
lhamel hätehlat iwoye n'ofwilhek tä tanhoch'ache,
wok m'ak chik õhw'en tä honatsi.
8Hätehlat iwoye hin'o tä nichuyu
wet tafwilhan tä tufw lhäk,
mat tä n'om niwohit m'ak chik ihi lets'e.
Wok hätehlat iwoye hin'o tä ichim
wet tafwilhan tä iyäyej inät,
mat tä n'om lepänhi tamchäche,
kamaj wuj tä ichim.
Häp tä mälhhiyejattso wichi tä wujpey
tä tatayhlä wet inuye Jerusalén.
Wichi lehusey asnamis t'at
9¡Tä alhen ch'isukwisa, ach'isukwis t'at!
¡Tä alhen asnamisa, a'asnamis t'at!
¡Letan'aj'atwethä hätet iwoye w'oknhas!
¡Tej tä kayäyayej hat'es, mat aw'oknhas t'at!
10Tsi Lhawuk ithat atapehen nahati tä wuj.
Profetas hätet iwoye wichi tatelhoy t'at,
mat Lhawuk hip'okwe'pe.
11M'ak tä häpe lhamel lehanyajay
hätet iwoye n'olesaynekhi tä õ'käfwelche,
n'änhit'a m'ak tä ihi.
Wet chik õhw'enho elh tä ihanej tä yahyen
wet õyok, “Yahyen täja”,
mat lham yohlak, “Ohanhiyejt'a owoyneje,
tsi õ'käfwelche wet sello tä i'pe.”
12Wet chik õhw'enho elh tä nhanayej chik yahyen,
wet yohlak, “Ohanhiyejt'a tä oyahyen n'olesaynhay.”
N'on'okhayaj tä kamatache
13Lhawuk tahuy n'oyej wet yok:
“Wichina fwetaj iho n'oye,
mat tajlhamat lhämtes.
Fwetaj iwujyenn'o, mat mathichet'a.
Lehusey wuj tä atofwe n'ohlä,
wet lakey tä fwetaj n'okwi n'oyej,
iwoyet m'ak tä hin'ol lhämtes t'at tä õ'chufwenejen.
14Häp tä tamenej tä oyachajiholak oselkatejen
m'ayhay tä äyteschehen häp wichina.
Wet hin'ol tä ahantses lehanyaj tatäyhla,
wet nemla letäfwnhayaj ihi.”
15Lewit'äyhyaj ihi wichi
tä fwetaj lhaiskatho häp Lhawuk,
tä t'uhläk nin'äla'pe
m'ayhay tä iwoye tä ihi honatsi wet yok:
“Ihichet'a elh chik hiw'en n'amel,
wet ihichet'a elh chik ihanej m'ak tä y'awoye.”
16¡Matche tä lekänchiyay m'ayhay!
¿Hä lefwetaj hin'o tä yenwethä iyhät
hätet iwoye iyhät tä lham yenwethä?
¿Hä lefwetaj m'ak chik n'olhenek
ihanej chik tahuye hin'o tä yenlhi wet yok:
“Amhit'ak lhenlhin'o”?
¿Wok m'ak chik wak'alh tä õyenlhi
ihanej chik tahuye hin'o tä yäm wak'alh
wet yok, “Lehanhit'a m'akej”?
Õ'fwenho Israel lhayis tä tafwayhihena
17Tek pajiyeja wet tayhi lhayis
nech'e häpkhila yachuyajw'etes,
wet honhat tä pajche yachuyajw'etes
nech'e häpkhila tayhi lhayis.
18Wet ifwalatso ch'otech'ol iläthiyela
elh chik yahyen n'olesaynek,
wet asnamis hiw'enhichela honhat,
nemla ihi honataj.
19Wet wichi tä w'et m'ayhayhas t'at,
lhäy'ehila lhip lakäjyaj chik iyeji Lhawuk.
Wet wichi tä wuj tä p'elitses,
lakäjyaj ihiyejila Dios tä Israel T'amajchet.
20Nofwila wichi tä tektshanejwethä
m'ak tä ni'isa tä iwoye,
wet nemla iche lhamel tä aläkwyhantses,
wet tatäyhla wichi tä ts'ilak t'at m'ak tä ni'isa
tä yen tichunhayaja yämthilek iwoye.
21Nofwila häp lhamel tä itiyej lesufwkanyaj elh
yämthilek õyen tesayej,
wet ikanej n'okalelhthayajwos,
wet tä iwoye t'akanyaj,
tach'othiyet'a elh tä letes newache
tä õ'tiyej n'osufwkanyaj.
22Häp tä tamenej tä Lhawuk tä Israel laka Dios
tä ifwayhat p'ante Abraham, yok:
“Tälhe athana len'äfwlhi ihiyejt'ala häp Israel lhayis,
wet nemla t'isanis lak'efwhayaj ihi.
23Tsi chik leles tä lepes lheley
hiw'enla m'ak tä owoyeje lhamel,
yenla t'amajchetan'o wet iwunthilan'o
tä ohäpe Dios tä Israel T'amajchet.
24Wet häp lhamel tä nikalelhäja
m'ak tä iwoye ihanla m'akejen,
wet iyhäj tä y'ulhan m'ak tä õne'tek iwoye,
lhaichufwenhihena.”
