Lewit'äyhyaj ihi wichi tä t'ekhaye Egipto
1Lhawuk lhämet yok:
“Lewit'äyhyaj ihi oles tä tatay ohilä,
wet tek y'ajat n'oye m'ayhay
tä lhamel fwetaj iwoye.
Tä yenwethä m'ayhay tä mälhyejentso,
tälhihot'a olham otichunhayaj,
mat y'isej at lhip lech'isukyajay tä iwoye.
2Lhamel nakelchetshi tä ihoye Egipto
wet tek chunkat chik tay'ätshan ayej n'oye.
Lhamel t'ukwe Egipto kaniyat lech'otyaj
yämthilek t'uyehen wet letamsekis ihi.
3Mat letamsek tä Egipto hiw'enhihola
mathichet'a, lewit'äyhyaj t'at.
4Tej tä amel lewo achenekaye Egipto,
wet akachenhay nichäte Soan lhäy'e Hanés,
5nilhokej amel han'äfwlhi ihihila
chik newache n'och'otyaj
chik tälhe wichi tä ni'isahentso
wet niwohit m'ak chik aisej,
tajlhamat han'äfwlhi wet õ'ayen w'et m'ayhaya.”
Laha ihihit'a Egipto lech'otyaj
6Profeta lhämet tä yämeje itshätäy tä ihi ts'anis tä lhey Négueb, wet yok:
Wuj m'ak wit'äyhyajay tä ihi honhattso,
wuj t'owalhas tä fwitses tä y'ipwethä,
wet wuj amlhäs lhäy'e m'akitas tä wey'äwethä.
Wet wichi kachenhay yikchufwi
lakäywetes lhäy'e chinaj t'äj,
ithatche'pe asnolis lhäy'e camellos,
wet ihäne Egipto yämthilek yen t'awayhata
häp wichi tä m'ak nitälhaye,
7häp lhamel tä nitkhajayahen
wet nhanayej chik iwo lech'otyaja.
Häp tä tamenej tä õyen lheya
“M'akitaj tä w'et y'ip t'at,
niwohit m'ak chik iwoye.”
Lhawuk itasnhila wichi tä niwoyaye lhämet
8Lhuu, chuma hal'ät'äj wet lesayen
yämthilek wichi hiw'en.
Tihi libro tä lelesayen yämthilek ihi t'at
pajla'tha nichäte ifwalas tä tatay alhoho,
wet nittäya yämthilek tiyäj'attsiy.
9Wichina iwohiyet'a Lhawuk lhämet
wet tach'ahuhiyet'a lechufwenyajay,
wet iwoye lhämtes tä kamatachehen.
10Wet tahuye wichi tä fwetaj
hiw'ene m'ak tä tatay alhoho,
wet yok, “Yej wo haw'enhaya.”
Wet äp tahuye profetas wet yok,
“Yej lhämaye m'ayhay tä ilätyen n'owethä.
Fwel n'ohohen n'olhämtes tä ni'äytesachehen,
wo siläta n'oyejen m'ayhay tä nikalelhäjahiche.
11Tiyayej kanhi m'ak tä is alhoho.
Nemhit olhamel ot'uhläk oläte
häp Dios tä Israel T'amajchet lhämtes.”
12Wet häp tä tamenej tä
Dios tä Israel T'amajchet yok:
“Letiyayej kanhi olhämetna
wet let'ekhayaye aka'tshayajay
tä lewoyaye, lhäy'e akeyis,
wet häp tä lefwetajay aisej tähestso.
13Tä mälhyejtso,
hach'isukyajayna tamenla amejen.
Ahätet iwoye n'olafwek tä atojphä
tä hupuy lep'ot tä hikw'esche,
wet nichätla katsi,
wet yofwajkwet nämla awit'äyhyaj.
14Oaitäyhthila, ahätehlat iwoye
n'olhäthi tä iyhät tä wasi,
nofw t'at wet tatäy,
nehichet lhiphaj chik imälhewek
yämthilek õ'ti'pe fwiyhol
wok õtchumeje inät tä ihi chowej.”
15Lhawuk, Dios tä Israel T'amajchet, yok:
“Chik amel lewoyay ahusey iyhäja
wet lewoyay atamseka,
afwayhyaj ihla amejen.
Wet chik lewoyay atamseka
wet let'ekhayay n'oye,
akhajyhayaj ihla amejen.”
Matkat amel lewohiyet'a,
16mat lhoyaykwe, “Kha,
y'aisiyejat yel'atas wet n'ekhen.”
Is t'at, lhekhihena tä lelethanlä atayhfwas.
Wet äp lhoyaykwe,
“Olhamel oihichela'pe yel'atas tä iläfwenhen.”
Mat häp wichi tä aihänla
lhäy'e lhip tä iläfwenhen.
17Hin'o tefwaji yokwesila mil amel,
wet cinco yokwesila nilhok amel, pajla'tha anofwej.
Aiyhäjfwas chik imälhehihila
hätehlat iwoye hal'ä tä n'äle'pe chenaj,
wok n'otetnek chik õ'ti'pe honhat tä atojphä.
Lhawuk ifwel lep'altsenyaj tä itihiyeja wichi
18Mat Lhawuk inihich'oye yämthilek iti amejen lep'altsenyaj. Wuj tä ihumin chik lew'enay lehumnhayaj, tsi Lhawuk häpe Dios tä is, wet lakäpfwayaj iyej t'at nilhokej wichi tä t'ekhaye häp lham.
19Sión kawichi, amel tä lheyayhi Jerusalén, nemla letafwchehchä. Chik Lhawuk ilät amehen chik let'äne tä let'uhläk tach'ot amehen, häpkhilek aip'altsenhen. Häpet chik ilätla amehen, nichulhla amhohen. 20Tej tä yen äka ateläythayaj wet iyäyen amejen alhaklis, mat lham tä häpe Hin'o tä aichufwenhen lhain'älthila amejen wet lew'enla. 21Wet chik lewetache lhip tä afwomkat wok hats'amkat, leläthiyela n'opak chik tum haw'echehi tä tahuy amejen wet yok, “Nukwe täja, häp tä n'äyij.” 22Wet lhenla w'et m'ayeka wet lhenla häpeya m'ak tä kok'aye häp acheyälis tä plata lhäy'e iyhäj tä lelänejen oro. Lhenlat häpeya m'ak tä kok'aye tä lajit lahaya wet lewomla.
23Wet Lhawuk ichenla amehen pelhay yämthilek tälh yachuyaj lhoy, häpkhilek wuj lhay. Wet ifwalatso aläy w'asetas wujla t'ekhawtes. 24Wet häp weyis lhayis lhäy'e asnolis tä lechumyenhiwethä alafwey, ihichela hup tä lhäk tä wuj tä is. 25Chik nämla ifwala tä n'olänyaj wet nichätche katsi hupuy tä atoschephä wet äp takhajayhen, ihichela tewok lhayis wet ihichela inät lhayis tä iläfwelchehen tä ihi chenhas lhäy'e honhates tä atoschephä. 26Wet Lhawuk iwohla lechaya laka wichi lätshay wet yäytejche'pe wesaj lhipey. Wet chik mälhhiyejatso, iwel'a isihla, hätehlat iwoye ifwala tä isi, wet ifwala lhäy'ehila lhip chik isi, hätehlat iwoyek iche siete ifwala lhayis chik iwek.
Lhawuk ichätyenla'pe letasnhayaj Asiria
27Lhek yahinya, Lhawuk lham tä nek,
tälhe t'at lhip tä atofwey.
Lewäk y'uho t'at, lhäy'e tutsaj tä wuj.
Lewäk tapoyej lak'aj,
wet lhämtes hätet iwoye itäj
tä iwunhomche m'ayhay.
28Leyalh hätet iwoye tewok
tä t'ulhpe honhat wet pitoj,
nek yämthilek ilhaklit wichi
tä ihiche honhates wet ihäne letäyhyaj,
wet itech'aynhiyeja yel'atas
tä õ'wo lhokheka yämthilek iwetahathen.
29Matla amel lechoyhilawethä,
mälhyej honatsi tä wichi iten letenek tä t'amajchet.
Ahusey lakäjyaj ihihila,
mälhyej wichi tä yikhen tä yafwutchehen lefwolis
tä ihoye chenaj tä Lewuk Dios
tä häpe Israel Letnhawet.
30Wet Lhawuk iwohiyela lechos
tä lewujyaj ihi yämthilek leläte,
wet hin'älthila lakhajyhayaj,
wet iwohiyela lewäk tä wuj tä äytaj,
lhäy'e itäj tä iwunhomche m'ayhay,
lhäy'e lep lhayis,
lhäy'e pelhay tä wuj, lhäy'e kalatu.
31Wet chik Lhawuk itasin Asiria,
wujlak lenowayhyaj ihi chik iläte lham lechos.
32Wet weihalhachepej letasnhayaj tä nichätpe lhamel,
pitsajiyepeja n'opumis lhäy'e arpas.
Lhawuk iwohiyejela laka'tshayaj tä wuj tä äytaj.
33Pajche tä lham iwaklhatho Asiria lhäy'e laka niyat
häp n'oteläythayajw'et tä tsajo wet äp pitoj,
wet wuj hal'äy tä itäj huk tä ihi,
wet Lhawuk leyalh tä wuj tä chayo
häpkhilek iwunho wet y'uhihola.
