Letes ihi wichi tä t'alheje Egipto lech'otyaj
1Lewit'äyhyaj ihi lhamel tä ihoye Egipto
wet t'alheje lech'otyaj.
Lhamel t'ekhayet yel'atas,
wet t'ekhayet kaletas tä n'oka'tshayajchal tä wujpey,
wet t'ekhayet nifwotaj tä wujpey
tä iche'pe yel'atas wet äp takhajayhen.
Mat lhamel itetshanhit'a Dios tä Israel T'amajchet,
lhamel tek tay'ätshane Lhawuk.
2Mat häte lham ihanej m'ak tä iwoye,
wet ichen n'owit'äyhyajay.
Lhämet chik iwoye yäm at matche, iwoye t'at.
Lham tatayhlä lhamel tä iwoye m'ak tä ni'isa,
lhäy'e wichi tä tach'ote lhamel.
3Egipto lheley hin'ol t'at,
häpkhit'a Dios tä N'ilataj,
wet lew'utey itshätäy t'at,
häpkhit'a n'okhajyhayajay tä nin'äla.
Lhawuk ipiynhila takwey wet itasnhila lhamel,
wet Egipto tä tach'otehen wichi nichätla katsi,
lhäy'e wichi tä Egipto itiyej lech'otyaj,
nilhok tan'islawek tä tatäy.
4Lhawuk tahuy n'oyej wet yok:
“Lhek yahinya, t'owalhaj tä ilän tson'ataj
nowayhiyet'a tson'atas lewos,
tej chik lhaihutwek wet t'änhen tä fwetaj istun.
Omälhhiyejattso olham Dios tä lajit otumfwaya
chik onek yämthilek owo oka'tshayaja
tä oi'pe chenaj Sión.
5Tehlat iwoye afwenche tä t'uye lhup,
wey'älhi t'at tä i'pe,
omälhhiyejattso olham Dios tä lajit otumfwaya
chik ot'uye Jerusalén.
Ot'uhiyela, ofwayhthila, otch'othiyela
wet ofwayhthiyeja lewit'äyhyaj.”
6Woyay ahusey iyhäja, Israel lhayis,
tapilaye Hin'o tä matche tä aletontayehlä.
7Tsi ifwalahilak nilhokej amel letiyayej kanhi
aka dios lhayis tä oro lhäy'e plata,
häp m'ayhay tä akweyey
tä lech'isukyaj ihi yenwethä,
8õ'länhihena häp Asiria kanifwotas,
wet häpkhit'ala hin'o lakhajyhayaj chik ilänhen.
Lhamel inuhikwela alhoho
tä yikch'oye n'oka'tshayaj,
wet laka mamses õ'chumyenhiyela
lechumet tä äytajche.
9Wet inuhla alhoho laka niyat tä noway,
wet laka sip'äl kaniyatey yikhihena
wet iwomla laka bandera.
Häp täjtso Lhawuk lhämet,
häp lham tä laka itäj ihi Jerusalén
yämthilek itäyhthen letayhfwas.
