Isa 32

₁Ihichela rey tä is m'ak tä iwoye,

lhäy'e leniyatfwas tä ische alhoho.

₂Elh weihalhapej hätehlat iwoye

hup chik wichi tiyäjchufwi

tä yafwuthi wok iwomchä,

wet hätehlat iwoye tewok lhayis

tä ihi häp honhat tä tamchäy,

wet hätehlat iwoye chenaj tä wuj lehupel

tä ihi honhat tä hal'äy newache.

₃Wujlak t'uyehen laka wichi

wet tach'ahuye lhamel.

₄Lhamel iwohiyet'ala m'ak chik nikalelhäja,

mat yenhilhila m'ak tä kalelhäj,

wet nilhokej m'ayhay tä yen lhämeta kalelhäj t'at.

₅Wet hin'o tä ni'isa nemla wichi iwujyen,

mat y'ulhanhila wet yohlak, “Isit'a hin'ona.”

Wet hin'o tä akantsaj nemla wichi ihumin,

mat y'ulhanhila wet yohlak, “Lehusek ihihit'a.”

₆Tsi hin'o tä ni'isa isit'a lhämtes,

yen tichunhayaja m'ayhay tä ni'isa yämthilek iwoye.

Iwohit'a lep'altsenyaja elh,

wet iwoyeje lhämtes tä kamatachehen

tä itayhtejlä Lhawuk.

Wet tek hiw'enho lhäk häp elh tä nichuyu,

wet hiw'enhihot'a inät häp elh tä ichim.

₇Hin'o tä akantsaj isit'a lakeyis,

yen tichunhayaja m'ak chik yen t'akanyaja,

ifwech'enwethä wichi tä p'elitses

lhäy'e iyhäj tä iwatlä lech'otyaj.

₈Mat häp elh tä is,

m'ayhay tä t'uhläk iwoye wuj tä isen,

wet kalelhäj t'at letichunhayaj.

₉Amel, atsinhay tä niwoya

m'ak chik lhenay alhakliya,

ch'ahuyaye olhämet tä ofwel amhohen,

amel, atsinhay tä lhoyaykwe,

“Otamsekis ihi t'at.”

₁₀Athana matche t'at,

tek wo m'ak chik ailhaklitwethä.

Mat pajiyejt'ala, chik tajyäme nekchäm weihalha,

anowayhyaj ihla amejen wet lechettihichehena,

tsi nofwila yachuyaj wet nemla iche uvas.

₁₁Amel tä niwoya m'ak chik lhen alhakliya,

is chik lechettichehen.

Häp amel tä lhoyaykwe,

“Otamsekis ihi t'at”,

is chik anowayhyaj i'amejen.

Lanche haw'uyis wet w'uyhiche haw'uyis tä yelaj

tä atetnek tä lhen alhakliya tä õ'ayenla kwenkaya.

₁₂N'älitay tä lhen alhakliya n'olafwey

tä n'olhäk tälho lhäy'e uvas tä wuj lhay.

₁₃N'älitay tä lhen alhakliya oka honhat

tä wuj ch'uthanil lhäy'e hon'al tä ihi,

lhäy'e wichi lewukwey tä pajche ihiche

tä iwopej lakäjyaja.

₁₄Tsi lhamel tä ihi niyat lewukwe, lhamel yikhilach'oye,

wet häp honhates tä wuj wichi tä ihi, ts'anisla t'at.

Wet hupuy tä atoschephä sip'äl nemla ihiche,

wet hupuy tä takhajayhen lajla lheleya,

wet asnolis tä tayhlheley

yenla lew'eta wet letamsekis ihi,

wet tson'atas wujla lhäk tä ihi.

₁₅Mat chik Lhawuk laka Espíritu

tä tälh kaphä nitsäyhla'pe n'amel,

honhat tä ts'anis häpkhila yachuyajw'et,

wet honhat tä pajche õ'saji

lhäy'ehila lhip lheley chik ihi.

₁₆Wet oka wichi iwohiyepeja m'ak tä is alhoho,

wet tach'otla lhamehen,

₁₇häpkhilek letamsekis ihi

yämthilek tiyäj'attsiy,

₁₈wet newache m'ak chik ilhaklitwethä lhamel,

tsi ihiche t'at lew'etes wet letamsekis ihi.

₁₉Tejlak õyisthen hal'äy tä ihi tayhi,

wet õ'wasthiche hupuy,

₂₀mat amel atamsekis ihihila,

wet wujla pelhay chik nitsäype aka yachuyaj,

wet tek tatäyhla lhäk häp aläy

asnolis lhäy'e weyis lhayis.