Lewujyaj ihi Lhawuk
1¡Awit'äy i'amejen, amel tä oaletayhfwas!
Letäyhat m'ayhay wet letiyej akanyaj wichi,
tej tä õ'aknitäyhthena
wet tej tä õknitiya amejen n'otkanyaj.
Mat chik tajyäme tä letäyhat m'ayhay,
amenlak õ'aitäyhthen.
Wet chik tajyäme tä lewo akanyaja,
amenlak õ'ti amejen n'otkanyaj.
2Iwuk, p'altsen olhamel,
tsi am t'at tä ot'ekha ame.
Tälhe tä nech'e fwalapej khajyen n'ohen,
wet fwayhat n'ohen tä olhakli ihi.
3Wichi tä ihiche honhates inukwe alhoho
tä iläte achos tä äytaji.
Inukwe alhoho wet ilethanhen.
Wet chik len'älit akhajyhayaj,
lhamel ifwtsatpe honhat.
4Wet lakäywet imälhe katsi,
tet iwoye hal'äwos ayat chik lhaihutwek,
wet wichi tet iwoye chol tä wuj tä lhamel yike.
5Lewujyaj ihi Lhawuk,
tsi lham yen lew'eta pule wet ihi t'at,
wet yäm tapoyej Jerusalén
m'ak tä is alhoho lhäy'e n'och'otyaj,
6wet lepes ihichet'a tä t'uhiyela.
Wet n'okäywet tä ifwayhat hin'o,
häpe t'at n'ohanyaj lhäy'e n'otäfwnhayaj.
Wet chik hin'o ihumin Lhawuk wet iwoye lhämtes,
häp täjtso tä lakäywet t'at.
7¿Hä leläte hin'ol tä takhajayhen
tä inukwe hup kawayhil,
lhamel t'änhen tä t'alhch'oye lech'otyaj?
¿Hä leläte n'okachenhay tä õyen lewosayej
yämthilek iche n'otamsek,
lhamel wuj tä lhafwyhayaj ihi?
8Nemhit iche n'äyhäy chik wichi inukwehen.
Wichi nemhit iwo lahaya elh chik häpe.
Wet tej tä niyatey yenlhi lhämet
tä isit'ak lhayen letayhfwasa,
mat tä paj wet itäyhat lhämet.
9Honhat tet iwoye tesa, wuj lefwitajayaj,
wet chenhas tä ihi Líbano
tamchäy t'at wet wuj len'äfwlhi.
Wet honhat tä Sarón nech'e ts'anis t'at,
wet Basán lhäy'e chenaj Carmelo talich'itpe.
10Lhawuk yok:
“Athana olham tä owoye m'ak tä owoye.
Athana on'älthila imälhewek owujyaj lhäy'e on'ohyaj
tä niwohit elh chik häpe chik w'awulh n'ohi.
11M'ak tä amel lewoye lajit lahaya,
niwohit m'ak chik tälho,
tet iwoye hup tä i'pe honhat wet basura t'at.
Wet oyalh tehlat iwoye itäj tä y'uho wet aitäyhthila.
12Wet lhimphajila wichi chik imälhehi,
tehlat iwoye mok'otaj,
wet tehlat iwoye ch'uthanil
tä õyisthen wet õ'wunho.
13Amel tä haw'etes atosehen,
tichunache m'ak tä owoyehte,
wet amel tä haw'etes ni'tosayehen,
yej kachu okhajyhayaj.”
14Wichi tä lech'isukyaj ihi
tachettichehen tä ihi Jerusalén,
wet lhamel tä kahap'altsentsesa
wuj tä nowayhen wet lhamel yok:
“¿Atsi elh n'amel tä ikalhi
yämthilek tafwayej itäj
tä itäyhthen m'ayhay?
¿Atsi elh tä ikalhi
yämthilek tafwayej n'onhonthi tä t'un?”
15Elh tä iwoye m'ak tä is alhoho,
wet matche lhämet tä iwoye,
wet häpkhit'a hin'o tä isoyejen iyhäj lakäywet,
wet tek tachumlä wet lhaiwomhit'a'pe
lakaha tä õt'uhläk õyen t'awayhata,
wet iwohiyet'a aläntses letichunhayaj,
wet lhay'ajiyet'a m'ak tä ni'isa,
16häpkhila elhna tä kalelhäj tä letamsek ihi t'at,
mälhyet iwoyek yen leletnhaweta
häp chenhas tä takhajayhen,
wet tek lhäk tatäyhiyeja, lhäy'e inät.
Jerusalén lewujyaj tä ihichela
17Yachajiholak äp lew'en rey chik ihi lesilatyaj,
wet leyahnhila'pe honhat tä lhäy'e lhip tä tsajphä.
18Wet chik letichunch'oye alhakli p'ante, wet lhohlak:
“¿Chip ihitso hin'olte impuestos lewos?
¿Chip ihitso hin'olte itetshan m'ayhay tä wichi ichäj?
¿Chip ihitso chowalhnhaste iyahinlhi lhaw'et?”
Nemhit ichehen lhamel.
19Nemla lew'en wichi tä ni'isahentso,
wichi tä lhämtes athahen wet lehanhiyejt'a.
20Lhek yahin Sión,
hupuy tä n'amel lhakäjyaj lew'et.
Yahne Jerusalén,
häp wichi lew'et tä n'otamsek ihi.
Tehlat iwoye carpa tä n'okasthawet tä t'unhi,
nämhichet'ala t'akayw'etes,
wet tek hiy'esihena t'akay,
21wet häp tä ihi tä lhain'älit n'amejen
Lhawuk tä lewujyaj ihi.
Tehlat iwoye honhat
tä tewok lhayis tä tsesche ihi,
mat letayhfwas ihanhiyejt'a chik ihänhichela
laka barcos tä takhajayhen.
22-23Wet mástiles, wok oyok,
hal'äy tä tälho lechowej häp barcosna,
nämchehen t'at,
wet wesas tä õyen lechaya yämthilek yik,
tek lhaich'enhiche.
Y'asohiyeja lakäywet tä wuj häp lhatayhfwas,
wet tejlak asnam, mat häte
ikathiyeja m'ak chik õhw'enhatej,
wet iyhäj tä tak'efwichehen
yenlat lechumeta tä tachuma
n'okäywet tä lewuk letayhfwas.
Tsi Lhawuk häpe N'okalelhthayajwo
tä Lhamya tä in'amejen,
wet lhaka Niyat, lhamlak n'aifwayhat.
24Wet ihichet'ala elh chik
ihi Jerusalén chik yohlak:
“Ot'inhayaj ilänn'o.”
Wet Dios itäyhthila letes häp wichi tä lew'et.
