Isa 34

₁Hoyay n'oye wet ch'ahuye olhämet,

nilhokej amel tä lheyayhi honhat.

Lhuyay wet tetshan m'ak tä ofwel amhohen.

₂Wuj lewäk Lhawuk tä itiyej

wichil tä i'pe honhat,

lhäy'e laka nifwotas.

Ilänhihena wet itäyhat.

₃Õ'womla lep'itseyhay

wet wujla lenij tä najut,

wet lew'oyis hätehlat iwoye tewok

tä iläfwelche tä inukwe chenhas.

₄Nilhok m'ayhay tä iche pule wachuhihila,

wet õ'käfwnhichela pule,

hätehlat iwoye papel tä õ'käfwelche.

Wet nilhok katetsel nemla isiche,

hätehlat iwoye hal'ä w'ole

tä tamchäy wet nichätchä.

₅Lhawuk lefwajnhat n'änhiyela tä ihi pule

wet nichätla'pe Edom, häp wichi tä õ'länhen.

₆W'oyis lhäy'e n'ot'alhä

ihichela Lhawuk lefwajnhat,

hätehlat iwoye tson'atas lhäy'e kayla lhayis

tä õ'länhen tä õyachaje Lhawuk.

Tsi wujla lelänyaj

tä Lhawuk iwohiyela tä ihi Bosra,

häp honhat tä lhamya tä ihi Edom,

wet wujla'pey Edom lhayis tä y'inhen.

₇Hätehlat iwoye itshätäy tä wus

chik nichätche katsi,

wet w'oyis ihlatpe laka honhat,

wet n'ot'alhä lhayej holo.

₈Matche, häpkhila lewhäy tä Sión tamenej

tä Dios iwohla lahayahlä häp wichi tä tatayhlä.

₉Tewok n'äyhäy tä ihi Edom ichalajichehena,

wet holo nech'e häpkhila azufre,

wet honhat y'uhihola,

hätehlat iwoye honhat lhits'i chik y'uho.

₁₀Wet nilhok ifwalas wet nilhok honatsis

tä y'uho t'at, wet tutsaj tälhihola.

Ts'anisla, nemla wichi ihi

yämthilek tiyäj'attsiy,

wet ihit'ala katsik inukwe lhiptso.

₁₁Wok'o lhayis lhäy'e chilichuk,

tsetwos lhäy'e ch'ustas,

häpkhilek yen lew'eta.

Lhawuk yenla häpeya honhat tä ts'anis t'at,

niwohit m'ak chik ihihila.

₁₂Nemla iche reyes chik ihi,

wet nilhokej niyatey tatäy t'at.

₁₃Wet lhamel lewukwey hon'al tä yelaj

häpkhilek wuj chik ihi,

wet amlhäj lhawayuk lhäy'e nawaj lhayis

häpkhilek iche'pe hupuy tä atoschephä.

Häpkhila honhat tä m'awo lhayis lew'et t'at,

lhäy'e wänlhäs.

₁₄Wet siläktas hap'akhiyeja

itshätäy iyhäj tä fwitses,

wet ahät lhayis t'änhiyela iyhäj,

wet ihichela ahät tä wuj tä tanhoch'ay chik ihihila

wet ilunlhi t'at tä honatsi.

₁₅Wok'o iwohla lhupahi wet iwo lhich'ula

yämthilek iwo lelesa wet t'uyehen.

Häte iyhäjkottas lhaihutlawek tä ihi,

elh tefwajpejni hap'akhiyeja elh tä lech'efwa.

₁₆Ukwe libro tä Lhawuk lhämet lehi

wet ahyen wet lehanhiyeja.

Tek tatäyhla elh tefwajni

itshätäy tä oyämetso,

ihichet'ala elh chik nip'akayej elh tä atsinha.

Tsi lham t'at Dios tä lhämetej

wet äp laka Espíritu t'at tä hip'ajtitwek lhamel.

₁₇Wet iyhäjpej tä w'enha lhamej

itshupyeneje honhat lhip chik häpe

yämthilek yen lew'eta pajla'tha tiyäj'attsiy.