Wichi tapinhiyela Jerusalén
1-2Is chik iwo lakäjyaja ts'anis,
häp honhat tä tamchäy.
Is chik wuj lakäjyaj,
wet is chik iche hal'äy tä wuj tä iwo lhawoya,
wet ichoywethä tä iten letenek.
Dios yämla isilataj,
hätehlat iwoye chenhas tä ihi Líbano,
wet wujla yachuyaj chik ihi,
hätehlat iwoye Carmelo lhäy'e Sarón.
Nilhokej wichi hiw'enla lewujyaj lhäy'e lesilatyaj
häp n'amel Lhawuk Dios.
3Khajyenhen wichi tä nitkhajayahen,
wet neyhatchephä iyhäj tä y'enhen.
4Ahuyej iyhäj tä nifwiyache katsi wet ok:
“¡Akhajyenhen, yej noway!
¡Nek aka Dios yämthilek aifwayhthen,
wet itasnhila atayhfwas,
iwohla hayayejlä lhamel häp m'ak tä iwoye!”
5Wet asnamis hiw'enhichehena honhat,
wet ch'otech'ol iläthichehena honhat.
6Wet tsufwlas tiyäjichephäla,
hätehlat iwoye tson'a tä tiyäjphä,
wet elh tä nämalhi nech'e lepak ihihila.
Wet inät tälhihola ts'anis tä iläfwelchehen,
7wet holotaj tä i'pe honhat wet äp chayo
nech'e häpkhila inätw'et t'at,
wet häp honhat tä tamchäy
nech'e ts'ifwik lhayisilak ihi.
Wet honhat tä m'awo lhayis ihi
nech'e ihichela kanohis tä tälho,
lhäy'e m'ak tä hätet iwoye fwuna.
8Ihichela n'äyij tä õyenla lheya
“N'äyij tä N'ot'amajchet.”
Wet wichi tä kok'ayeje m'ak tä ni'isa
ihanhiyejt'alak inukwe,
wet wichi tä ch'isukwis
inuhikwet'ala n'äyijtso.
9Wet ihichet'ala itshätäy tä fwitses
chik lhaitott'aynhiyela häp n'äyijtso.
Mat häp wichi tä nem häpe n'okwenkay,
häpkhilek inukwe chik tapile laka honhat.
10Häp wichi tä Lhawuk ifwayhthen tapinhiyela Jerusalén,
wet ichoyhlawethä tä lakäjyaj ihi.
Wet lajit lepesa lakäjyaj,
wet nemla iche lhafwyhayaj lhäy'e lelhaklis.
