Senaquerib tiyäjo p'ante Judá
1Ihi catorce nekchämis tä Ezequías niyatej p'ante Judá, wet Senaquerib tä Asiria laka rey nech'e tatayhlä nilhokej honhates tä takhajayhen tä ihi Judá, wet lhayen lewuka. 2Wet ichene Ezequías häp leniyatfwa lhäy'e laka'tshayajwos tä takhajayhen tä lhamel tälhe Lakis tä ihoye Jerusalén yämthilek tatayhlä. Wet tä nichäte p'ante Jerusalén, takasitwhäye inät n'äyij tä tälhe n'opek tä i'pe honhat lhip tä atojphä, häp n'äyij tä tiyäje honhat lhip tä lewuk hin'o tä ilejen wesas. 3Wet Eliaquim tä Hilcías lhäs, häp n'okawo tä niyatej rey lew'et, lham yik tä iyahinlä lhamel. Wet iyhäj tä yikche häpe Sebna tä n'olesaynekwo, lhäy'e Joa tä Asaf lhäs tä häpe elh tä silätwo tä ifwenhopej rey häp m'ayhay tä iche. 4Wet Asiria laka rey niyatfwa ifwenho lhamel tä yok:
–Asiria laka rey häpe t'at häp rey tä lewujyaj ihi. Wet ichene lhämet Ezequías tä yok, “Niwohit m'ak chik aisej tä otle t'un.” 5Lhäme tä akhajyhayaj ihi yämthilek lewo aka'tshayaja wet lekalhihla m'ak tä lewoye. ¡Mat w'et ämtes t'at, lajit lahaya! Wet athana tä lefwetaj letatay n'ohlä, ¿atsi elh tä lechaye chik tach'ot ame? 6Ow'en tä lechaye Egipto. Mat Egipto hätet iwoye n'otsut tä kanohi tä wasi. Chik iche elh tä lhaithatpe, itshänho takwey wet tafwayhi. Häp tä Egipto laka rey iwoyeje nilhokej lhamel tä ichaye.
7“Mat chik amel lefwelay n'oho tä lhok, Olhamel ochaye häp olhamel Owuk Dios, wet olham oyok, Ezequías iwasthiche p'ante häp diostso lew'etes tä ihi chenhas, lhäy'e laka altares. Wet ifwenho p'ante wichi tä ihi Judá lhäy'e tä ihi Jerusalén tä ne'tek ts'ilak altar tä ihi Jerusalén chik lhamel ihoye tä lhamel n'okwiyej diostso.
8“¡Ezequías, lhek tetshan olhämet! ¡Päyne owuk, Asiria laka rey, tä matche tä akhajyhayaj ihi! Olham ow'enla amho dos mil yel'atas. ¡Is chik let'ukwe sip'äl yämthilek iche'pe! 9¡Am tek lehanhiyeja lewoyneje chik lestun elh owuk kasip'äl, tej chik häpe elh tä w'et m'ayek t'at tä lajit lahaya! ¡Wet kamaj lechaye Egipto laka rey tä let'uhläk ichen ame yel'atas lhäy'e hin'ol tä iche'pe! 10Wet ¿hä lhenek tek awuk dios lhämet n'oyej tä onäm tä ottayhlä wet owasthi aka honhatna? Häpe lham tä ifwelnaj n'oho wet yok, ¡Mäh hoye, wasthi honhattso!”
11Wet Eliaquim, lhäy'e Sebna, lhäy'e Joa, tä lhamel iläte Asiria laka rey niyatfwa, wet lhamel nichulho tä yok:
–Is chik am lewoye Arameo lhämet tä letahuy n'oyejen, tsi olhamel ohanej. Yej woye Hebreo lhämtes tä letahuy n'oyejen, tsi nilhokej wichi tä ikaphä tä i'pe n'olafwek tä tuntey ilät ame, lhamel tach'ahu ame.
12Mat Asiria laka rey niyatfwa yok:
–Kha, häpkhit'a awuk lhäy'e amel tä owuk ichenn'o amehen yämthilek oyäme tähesna. Häpe t'at wichi tä ikaphä, tsi lhamel tan'isla amejen tä letufwla y'amuk wet leyähiyeja ulhu.
13Wet Senaquerib niyatfwa takasit wet yäm äytaji tä ifwitsenej tä t'än tä iwo Hebreo lhämeta tä yok:
–Ch'ahuyaye rey tä lewujyaj ihi lhämet, häpe Asiria laka rey tä yok, 14“Yej ch'anlhaye tä Ezequías ikan amejen. Tsi lham ihanhiyejt'a iwoyneje chik aifwayhat. 15Yej woyaye tä Ezequías inityen amejen chik lechayaye häp awuk dios, wet chik ifwel amhomche tä yok, Matche tä Lhawuk Dios n'aifwayhthenla, wet hupuyna lham tek yachajiyela Asiria laka rey.”
16“Yej ch'ahuyaye Ezequías. Tsi Asiria laka rey lhämet yok, Woyay atamseka n'ohlä wet a'achajay n'oye. Chik mälhyejtso, elh weihalhapej tufwila lechumet lhay wet iyähiyeja inät tä tälho lepek. 17Wet onämla, ohänla amehen honhat tä hätet iwoye amel aka honhat tä trigo ihi lhäy'e uvas tä ihi, yämthilek amel lhenaylhi pan lhäy'e hat'es.
18“Mat yej ch'ahuyaye Ezequías tä ikan amejen tä yäme tä yok, Häp Lhawuk tä n'aifwayhthenla. ¿Hä ichenaj elh dios lhayis tä tälhe honhat elh tä ifwayhatnaj n'oyej laka honhat? 19¿Chip ihi Hamat laka dios lhäy'e Arpad laka dios? ¿Chip ihi Sefarvaim laka dios? ¿Hä lhamel ifwayhatnaj n'oyej Samaria? 20¿Atsi dios elh tä häpe tä ihi honhates iyhäj tä ifwayhat n'oyej laka honhat? ¿Hä atichunhayaj tä awuk dios ifwayhthila n'oyej Jerusalén?”
21Mat wichi lhamel nichulhihot'a, yok tam, lhämet ihihit'a, tsi rey tä lhämet tä ne'tek lhamel nichulhaho. 22Wet Eliaquim tä rey lakawo tä niyatej lew'et, lham hich'esajchehen lew'uyis tä letetnek tä wuj tä lelhakli ihi. Wet häte Sebna tä n'olesaynekwo hich'esajchehen lew'uyis, lhäy'e Joa tä häpe elh tä silätwo tä ifwenhopej rey häp m'ayhay tä iche. Wet lhamel ihoye rey Ezequías tä lhamel ifwenho m'ak tä Asiria laka rey niyatfwa lhämtes.
