Rey Ezequías iwo chenekaye Isaías tä t'uhläk y'alhyene Lhawuk
1Täjp'ante rey Ezequías iläte täjtso, hich'esajche lew'uy wet taw'uyhi wesaj tä yelaj, letetnek tä lefwitajayaj ihi, wet ihochufwi Lhawuk Lew'et. 2Wet t'äne Eliaquim, häp lakawo tä niyatej lew'et, lhäy'e Sebna tä n'olesaynekwo, lhäy'e sacerdotes tä thänhäy, tä nilhokej lhamel taw'uyhi wesaj tä yelaj, lhamel letetnek tä lefwitajayaj ihi. Wet ichene lhamel profeta Isaías tä Amoz lhäs, 3wet lhamel ifwenho rey Ezequías lhämet tä yok:
–Ifwalana olhamel olhakli ihi lhäy'e tä on'äfwlhi ihi. Häpe ifwala tä lhawit'äy ihi tä äytaj, tä hätet iwoye atsinha tä eyte iwohi lhäsa tä laj lakhajyhayaja. 4Elat Lhawuk Dios tä n'ilataj pajche iläte lhämtes tä Asiria laka rey niyatfwa iwoye tä iläkwlhi, wet elat Lhawuk itihiyeja letasnhayaj häp lhämtestso tä iläte. Tä mälhyejtso, alhyene häp lhaka wichi tä iläyhen tä imälhehi.
5Tä Isaías iläte rey lhämet tä ichene, 6wet nichulho lakachenhay tä yok:
–Fwenho amel awuk Ezequías häp Lhawuk lhämet tä yok, “Yej nowaye Asiria laka rey kawos lhämtes tä ni'isachehen tä itayhat n'oye tä iläkwlhin'o. 7Wet lhek yahinya, olham owohit'ala letamseka, olhaklithiyejlhila m'ak chik ihanch'oye yämthilek yäple laka honhat, wet chik nichät kanhi, õ'länla.”
Rey Senaquerib yachajo tä ichene lhämet tä äytajche Ezequías
8Wet Asiria laka rey niyatfwa ihanej tä lewuk rey yikch'oye Lakis. Tä mälhyejtso, leniyatfwa yikch'oye Jerusalén wet nilhoke lewuk rey tä iwo laka'tshayaja tä tatayhlä wichi tä ihi honhat tä lhey Pelaj. 9Wet Asiria laka rey ilätch'oye tä Etiopía laka rey tä lhey Tirhaca ihoye yämthilek iwo laka'tshayaja tä tatayhlä häp lham. Wet yachajo tä Asiria laka rey ichene lesilätwos häp Judá laka rey Ezequías. Wet ifwenhomche lhamel tä yok:
10–Fwenho Ezequías tä lhok, “Aka dios tä am lechaye ifwel amho tä yok, Jerusalén tek nichäthihola Asiria laka rey lakwey. Mat yej wahin amej chik ikan amej aka dios. 11Am lehanej m'ak tä Asiria laka reyes iwoye tä iwasthiche ilhokej honhates tä lhamel tiyäjo. ¿Hä am lefwetaj letafwayhla? 12Häp dios lhayis tä ihi honhates iyhäj, ¿hä ifwayhthen p'ante hupuy tä Asiria laka rey lechätilis iwasthiche? ¿Häp honhates tä Gozán, Harán, Resef, lhäy'e p'ante wichi tä ihi Bet-edén tä lhamel yen lew'eta hupuy tä lhey Telasar? 13¿Chip ihi Hamat laka rey, lhäy'e Arpad laka rey, lhäy'e Sefarvaim laka rey, lhäy'e Hena laka rey, lhäy'e Iva laka rey? ¡Oyok, nemhit ichehen lhamel, nofwej!”
Ezequías iwo t'alhyaja
14Wet rey Ezequías tachuma carta tä silätwos hiw'enho, wet iyahyen. Wet ihoye Lhawuk Lew'et, wet hich'enhi carta, itihi tä Lhawuk tatache. 15Wet iwo t'alhyaja tä t'alhe Lhawuk wet yok:
16–Iwuk tä lajit atumfwaya, Israel laka Dios tä aniyatyaj i'pe m'ayhay tä lhafwis ihi, ts'ilak am tä Alewuk nilhokej n'oniyatyajay tä i'pe honhat. Am tä lhenlhi pule lhäy'e honhat. 17Lhek tetshan, Iwuk, wet ch'ahuye. Fwoyenchehen atey, Iwuk, wet yahin. Ch'ahuye Senaquerib lhämtes tä ichen n'oye tä itayhat ame tä iläkwlhi Dios tä n'ilataj.
18“Iwuk, matche tä Asiria laka reyes iwasthiche nilhokej honhates, 19wet lhamel hip'ohen laka dios lhayis, ithatho itäj, tsi matche tä häpkhihent'a dios lhayis, mat häpe m'ayhay tä hin'o tä takwey lhenek, hal'ä wok tunte. Häp tä tamenej tä lhamel iwasthiche. 20Athana, Iwuk Dios, fwayhat n'oyejen Asirio lhayis lakhajyhayaj, yämthilek nilhokej wichi tä i'pe honhat ihanej tä ts'ilak am, Iwuk, tä ahäpe Dios.”
Isaías iwo siläta tä rey Senaquerib lewit'äy ihihla
21Wet Isaías tä Amoz lhäs ichene lhämet rey Ezequías tä yok:
–Lhawuk, Israel laka Dios, lhämet yok, “Olham oläte alhyaj tä lewoyene tä lhämeje Asiria laka rey Senaquerib. 22Wet athana olham tä ohäpe Awuk Dios oyok,
“Senaquerib, Jerusalén hätet iwoye
atsinha lhutsha tä t'ischeylhi amej.
Ilanlhi lhetek tä ailäkwlhi tä lhekch'oye.
23¿Atsi tä häpe tä leläkwlhi wet lekachuye?
¿Atsi tä häpe tä letayhte ämtes tä äytaji
wet alechäjlhi tä leyahin?
¡Letatayhlä Israel laka Dios tä T'amajchet!
24Häpe tä lechene asilätwos
tä leläkwlhin'o tä lhok,
Oho'pe chenhas tä lhäy'e lhip
tä atoschephä tä ihi Líbano
tä oyikche wujpe kaletas tä oka'tshayajchal.
Wet tä onchät kaphä,
oyisthen pänhichetek tä nem koyhyaj tä atoschephä,
lhäy'e pino lhayis tä matche tä isis,
yäk onchäte lhip tä lhäy'e lhip tä atofwe,
lhäy'e tayhi tä hätet iwoye honhat tä n'olafwek ihi.
25Ohoye honhates tä w'enha lhamej wet otij chowej.
Oyenlhi opek wet oyäyej inät tä tälho.
Wet nilhokej tewok lhayis tä ihi Egipto
tä oy'uytho opach'ol yäk y'imche.
26“¿Mat hä kahanayej tä olham
tä ohäpe Dios tä matche
tä otichunhayaj tä lewoye m'ayhayna?
Wet athana oyäm matche.
Häp tä tamenej tä am lewasthiche hupuy tä takhajayhen
wet lhene n'oskonkay tä wus.
27Wet wichi tä ihi hupuy noj lakhajyhayaj,
wet wuj tä lhamel nowayhen wet n'äfwenhen,
hätet iwoye hon'al tä i'pe honhat
lhäy'e hupitas tä w'atshan,
mälhyej hon'al tä lhaichihelit tä tälhpe n'owukwe
wet yafwthi tä chayohi hip'ohen yäk tamchäyhen.
28Olham Dios ohanej nilhokej m'ak tä lewoye.
Ohanej ihi lhip tä lehoye, lhäy'e tä lhehi haw'et.
Olham ohanej tä am letawäkwäy n'oye.
29Wet tä ohanej tä afwitsaj wet alechäjlhi,
wet otihihla chinaj anhus, owohla lheleya,
wet owohla t'aka ayhi,
wet oyachajila amche han'äyijnaj letälhche.”
30Wet Isaías ifwenho rey Ezequías tä yok:
“Häpe täjna letetnek m'ayhay tä ihichela:
Tä nekchämna lhäy'e chik nekchäm elh
tä amel letufwayhla m'ak tä inuphä tä tälhpe honhat.
Mat chik nichäte tres nekchämis,
nech'e iwohiyela chik amel letutcheyhen
wet lelanhihla yachuyaj lhay,
wet lethatlahchä uva lhiley
wet letufwayhla lhay.
31Häp wichi tä imälhehi Judá tä iläyhen,
lhamel hätehlat iwoye hal'äy tä w'atshan,
wet iwohla lefwettsila'pe honhat
wet iwohla lhaya.
32Tsi ihichela wichi tä ihi Jerusalén tä tafwayhen,
lhäy'e tä ihi chenaj tä Sión.
Lhawuk tä lajit letumfwaya lhaikhajyenla
wet iwohiyela tähestso.
33“Häpe täjtso Lhawuk lhämet
tä yämeje Asiria laka rey tä yok,
Iwohiyet'a chik tiyäjo hupuy tä Jerusalén.
Iwohiyet'a chik tiyäj hätefwajni lech'äha.
Iwohiyet'a chik itihlä laka'tshayajp'ot tä tatayhlä Jerusalén,
wet iwohiyet'a chik yenlhi t'äsawet yämthilek isakane.
34Wet yäpnhichela t'at
len'äyijnaj tälhche tä yikhila,
tiyäjihot'ala häp hupuyna.
Olham tä ohäpe Awuk Dios tä olhämet täja.
35Olham ot'uhiyela hupuyna wet ofwayhthila,
häp ohumnhayaj tä otiyej okawo David tä tamenej,
wet lhäy'e olham owujyaj tä tamenej.”
Rey Senaquerib lewit'äy
36Wet honatsitso Lhawuk laka ángel ihoye lhip tä Asirio lhayis lhaihuthiwek wet ilänhen ciento ochenta y cinco mil (185.000). Wet tä ifwala inuphä, lep'itseyhay i'pe honhat. 37Wet Asiria laka rey Senaquerib yik, ineyhatphä lew'et wet yäple laka honhat tä lhey Nínive. 38Wet iche p'ante ifwala tä Senaquerib ihi len'okhayajw'et tä n'okwiyej laka dios tä lhey Nisroc. Wet leles Adramelec lhäy'e Sareser lhamel ihoye wet ilän lajcha. Wet lhamel yikhen, inukwe alhoho tä ihoye honhat tä Ararat. Wet Senaquerib lhäs tä lhey Esarhadón tä icheyäjo leniyatyajw'et.
