1Wet ifwalatso wujit'ala'pe
hin'ol chik imälhehi,
wet elh tefwajpejni ihichela
siete atsinhay chik lhailänhenpe.
Wet lhamel tahuyhiyeja wet yohlak:
“Olhamel tek ot'alhej ame olhäk,
olhamel t'at tä ot'uhikwela, lhäy'e ow'uyis.
Tajlhama m'ak tä ot'alhej ame,
is chik ahäpe olhamel och'efwa,
häpkhilek wichi nemhit iläkwethä olhamel.”
N'otamsek tä nämla
2Ifwalatso Lhawuk inech'aynhihila m'ak tä iwoye.
Ihichela hin'o tä tälhe,
wet tamenhiyeja chik lesilatyaj ihi
häp Israel lhayis tä imälhehi,
wet lewujyaj ihi.
Wet yachuyaj tä lhamel yenlhi
iwohla lakäjyaja lhamel.
3Häp lhamel tä õknilänahen tä ihi Jerusalén
wet õ'wahnej yämthilek yen lew'eta,
wet õyenla lheya Lhawuk t'amajchetes.
4Wet chik Lhawuk itiyej lakalelhthayaj
häp Jerusalén wet iwo letasnhayaja,
itäyhthihena lakokhayajay häp wichi tä ihi,
wet ilejla n'olänhay w'oyis tä nitsäype honhat.
5Wet tä ifwala
Lhawuk ichenla pule tä wuj
wet iwohla hupela'pe
imälhewek chenaj Sión,
lhäy'e wichi tä lhaihuthiwek.
Wet chik honatsi
nech'e itäj lhal tä isi
hin'älthila chenajtso.
Wet Lhawuk lewujyaj ihlatpe nilhokej wichi,
6yämthilek ifwala tä chayo nilänahen,
wet pelhay tä fwitsaj niwit'äyena.
