Isa 5

₁Owo otenekayej häp oelh,

otenek tä otchoyejlhi lelafwek tä uvas ihi:

Oelh lelafwek ihi tä uvas lew'et,

häpe honhat tä wuj tä is.

₂Iwasthi honhat wet iwomlhi tuntey tä ihi,

wet itihchä uvas lhachal tä isis.

Wet yenlhi hup tä atojphä tä ihi lechowej

yämthilek elh tä t'uye nilhokej ihi.

Häte yenlhi lew'et yämthilek yenlhi hat'es.

Oelh tataye t'at chik y'o uvas,

matkat tä y'o, tek hak'onek, tapay t'at.

₃“Athana, amel tä lhehi Jerusalén

lhäy'e amel tä haw'et Judá,

fwelay n'oho, ¿atsi tä tamenej?

¿Etp'i olafwek tä ni'isa,

wok olham tä n'am is?

₄¿Etp'i iche m'ak tä tatäyej

chik otihi olafwek? Ihichet'a.

¿Iche p'iya m'ak tä n'am nenlhi? Ihichet'a.

Mat ottaye t'at chik hak'onek uvas lhay,

¿wet atsi m'ak tä tamenej tä tapay?

₅“Athana ofwel amho

m'ak tä owohiyejela olafwek.

Olanhihila lep'ot tä olafwejlhi

yämthilek wichi iyhäj iwasthi,

wet ofwoynhihola lelafwek tä tuntey

yämthilek lhamel tiyäjo wet t'äsche.

₆Oyenlat ts'anisa,

wet ihit'ala katsik yisetlä lepesey

häp uva lhiley tä ihi,

wet tek õyowajila hon'al tä ihi,

wet nawajila t'at chik tapoyej tä ihi,

lhäy'e hon'al tä yelaj,

wet on'äyhiyejola pelhay chik nitsäype.”

₇Häp Lhawuk tä lajit letumfwaya,

häp lelafwek tä uvas lew'et häpe t'at Israel,

wet uvas lhachal tä lham akäjejlhi tä itihchä,

lhamel häpe t'at Judá kawichi.

Lhawuk t'uhläk lhamel iwoye lhämet,

mat iwohiyet'a, tajlhamat tä lhailänhen t'at.

T'uhläk wichi isej,

matkat tajlhamat n'olhafwyhayaj tä pitsaje.

₈¡Awit'äyhyaj i'amejen,

amel tä wuj awukwey tä lechäjen,

lhäy'e wujpe n'olafwey,

wet ts'ilak amel tä lheyayhi honhat,

nemhit lew'et ihi wichi iyhäj!

₉Tä mälhyejtso, Lhawuk tä lajit letumfwaya

ifwel n'oho lhämet tä hit'unhatche tä yok:

“Wujla'pe hupuy chik wasihichela.

Tej tä wus wet äp isis,

mat nemla iche elh chik yen lew'eta.

₁₀Tres hectáreas chik uvas ihi,

tajlhamhiyelat lehi tefwajnik

hat'es tapoyej tä tälho.

Wet chik diez bolsas trigo lhoy tä õ'tihchä,

tajlhamhiyelat bolsa tefwajnik

tapoyej chik tälho.”

₁₁¡Awit'äyhyaj i'amejen,

amel tä lenephä tä nech'e fwamlafwaj

wet aw'oknhas pajtha honatsi!

₁₂Amel lewo akäjyaja,

wet wuj músicas wet wuj hat'es,

wet lhen w'et m'ayeka m'ak tä Lhawuk iwoye,

wet letetshanhit'a lechumtes.

₁₃Wet tä kat'uyahläk lehanej

tä olham ohäpe Awuk,

atayhfwas aihänhiyela honhat tä kahaw'eta.

Wet nehläs lhäy'e neheläp ilänhihena

nilhokej amel lhäy'e aka niyatey.

₁₄Wet n'op'itseyhayw'et hätehlat iwoye

hay'äj chik hich'enhi lak'aj

yämthilek timche aka niyatey

lhäy'e nilhokej amel tä let'änwethä

tä lewopej akäjyajaya.

₁₅Wichi tä lhaiwujyen

lhäy'e iyhäj tä fwetaj lajit letumfwaya,

n'äfwelhihena.

₁₆Mat häp Lhawuk tä lajit letumfwaya,

wichi iwunthila tä itasin elh tä letes ihi

wet tach'ote elh tä laj letesa.

Wet chik wichi hiw'en

tä is alhoho m'ak tä iwoye,

yohlak, “Matche tä häpe Dios tä is.”

₁₇Wasihichela hupuy lhayis,

wet tson'atas lhäy'e kayla lhayis

yenlat lhäkw'etesa tä t'ekwethä.

₁₈¡Awit'äyhyaj i'amejen

tä akanyajay tamen amejen tä ates ihi,

wet alet'elkatejen hach'isukyajay,

hätet iwoyek leton kaletaj!

₁₉Amel leläkwlhi Israel laka Dios tä T'amajchet

wet lhoyaykwe, “Is chik ikelit

m'ayhay tä iwoye häpkhilek y'aw'en.

Is chik iwoye'thahya m'ayhay

tä pajche iwaklhat tä iwohiyela,

häpkhilek y'antäfwelej.”

₂₀¡Awit'äyhyaj i'amejen,

amel tä lhenay isa m'ak tä ni'isa,

wet m'ak tä is lhenay häpeya m'ak tä ni'isa.

Lhenay honatsiya häp isi,

wet lhenay häpeya isi häp honatsi,

wet häp m'ak tä tapay lhoyay, “Hak'onek”,

wet m'ak tä hak'onek

lhenay häpeya m'ak tä tapay!

₂₁¡Awit'äyhyaj i'amejen,

amel tä lefwetajay lehanche m'akejen

wet lhäm amehen tä ahäpehen

iyhäj tä lehusey ihiche!

₂₂¡Awit'äyhyaj i'amejen,

amel tä lehanej lakey tä leyäyej hat'es

wet ihichet'a elh chik häte iwoye amel

tä lehanej tä lekasowek hat'es!

₂₃Amel letachumlä laka chinaj t'äj

häp hin'o tä letes ihi wet lhok,

“Is t'at, ates ihihit'a”,

wet tek letach'ote elh tä matche tä laj letesa.

₂₄Wet häp tä tamenej

tä amel ahätehlat iwoye

hup tä tamchäy tä itäj hip'o,

lhäy'e hal'ä w'oley tä tamchäy.

Amel attäyhla,

hätehlat iwoye n'okäs

tä lefwettsil najuthiche,

wet hätehlat iwoye hal'ä lhawol

tä yafwthitaj ichäj,

mälhyej iwoye honhat mok.

Tsi letiyayej kanhi m'ak tä

Lhawuk tä lajit letumfwaya ne'tek lewoye,

wet lhenay w'et m'ayeka lhämtes,

häp lham tä häpe Israel laka Dios tä T'amajchet.

₂₅Häp tä tamenej tä itiyej lewäk

häp laka wichi wet itasin.

Wet chenhas w'ahuwethä

wet n'op'itseyhay i'pe honhat,

hätet iwoye basura tä ichehen hupuy kawayhil.

Mat kamaj nofwit'a Lhawuk lewäk,

tujlhache t'at tä itiyej letasnhayaj wichi.

₂₆Lhawuk ineyhatphä laka bandera

wet isun tä t'äne wichi

tä ihiche honhates iyhäj,

ihän alhoho lhamel

tä tälhe honhates tä atosehen.

Wet yofwajkwet nämhen,

wuj tä iläfwenhen.

₂₇Lhamel takhajayhen wet tek y'enhen,

imähihent'a, wet wak'alhen t'at

tä hit'unthiche lew'uyis lhäy'e lenisähes.

₂₈Lech'ähal wuj tä itselhäs,

wet lelutses hal'äy wak'alhen t'at

yämthilek ileyejen lech'ähal.

Wet lew'utey fwus t'ähes t'un,

hätet iwoye tunte,

wet laka kaletas käläy

hätet iwoye wejsuyhomtas tä ilunhiche.

₂₉Hätet iwoye hay'äj tä y'ip tä ikatej lelänek,

wet tä ichäj lelänek,

nehit katsik ihanej chik isoyej.

₃₀Häp wichitso,

chik nichäthiyela ifwala tä lewhäy

chik inuhiyela Israel,

lhamel iwohla lepakayej,

lepak hätehlat iwoye lewomekitaj

chik yafwthitaj nichätho.

Wet elh chik iyahin honhat,

hiw'enla tä tajlhamat n'olhakli tä tapoyejej,

tsi pule tä wuj nämla wet y'omatla isi.