Isa 42

₁“Lhek yahinya okawo tä olham owo lakhajyhayaja.

Häpe elh tä ottshupiye wet okäjejlhi.

Oti'pe oka Espíritu,

wet ichätyenhiyela wichi tä ihiche honhates

häp m'ak tä is alhoho.

₂T'änhit'ala wet tek ifwitsenhiyeja lechos,

wet tek ilätyenhiyejela lhämet

wichi tä iche hup kawayhil.

₃Inäk'äsit'ala kanohi tä ipofwokwe,

wet nitäyijlhahiyela n'ochäk tä eyte y'omhi,

wet matche tä ichätyenhiyela wichi

m'ak tä is alhoho.

₄Y'enhit'ala wet nofwit'ala lakhajyhayaj,

yämthilek kalelhäj tä m'ak

tä is alhoho iwo w'etahi honhat.

Wet wichi tä ihiche honhates

iwatlahläk ihanej lechufwenyajay.”

₅Dios Lhawuk,

häp lham tä yenlhi pule wet yäm tsajo,

wet lham tä lhenek honhat

lhäy'e m'ayhay tä lhaichihelit tä tälho,

wet iwo lew'atshancheyaja

häp wichi tä ihi, wet iwo leyalha.

Wet tahuyej lakawo wet yok:

₆“Ohäpe Awuk Dios, ot'än ame

yämthilek lechätyene honhat

häp m'ak tä is alhoho.

Wet otsok akwey, ot'amaj amej,

wet oayenla lewoya häp olhämet

tä ot'untejche wichi tä ihiche honhatil,

wet ahäpkhila wichi laka isi.

₇Lew'enyenhichehena honhat asnamis,

wet letonhichephäla wichi tä ihi n'op'onthi,

häp lhamel tä õhp'ohiche tä ihi honatsi.

₈“Ohäpe Awuk Dios, häp täjtso olhey.

Wet tek owahnhiyeja wichi

chik iwujyenej owujyaj

häp dios tä takwey lhenek,

wet ow'enhihot'ala n'ocheyä chik häpe

yämthilek lewujyaj ihi.

₉Lhek yahinay tä lhayäm matchehen

häp m'ayhay tä pajche oyen silätyaja.

Wet athana owo siläta amejen

m'ayhay tä ihichela.

Tä kamaj nin'äla,

olham t'at tä owo siläta amejen.”

₁₀Tenay n'otenek tä nech'ayek tä lewunitay Lhawuk.

Amel tä lheyayhiche honhates tä atosehen, wunitay.

Häte amel tä lenukwe lewomekitaj,

lhäy'e itshätäy tä ihi,

lhäy'e honhates tä iche lhipey,

lhäy'e amel tä haw'etes honhatestso,

wunitay häp Lhawuk.

₁₁Is chik ts'anis iwo lakäjyaja,

lhäy'e hupuy tä iche ts'anis,

lhäy'e Kedar lhayis lew'etes.

Is chik wichi tä ihi Sela

iten n'otenek tä lakäjyaj,

is chik ifwitsenej lechoslis tä tumpe chenhas.

₁₂Is chik iwujyen Lhawuk

wet yen lhämeta lewujyaj

chik lhamel ihiche honhates tä atosehen.

₁₃Lhawuk hätehlat iwoye hin'o tä takhajay,

ifwitsenhiyeja laka'tshayaj.

Hätehlat iwoye hin'o tä ihi n'oka'tshayaj,

ifwitsenhiyeja lechos wet ikalhihila letayhfwas.

₁₄Lhawuk yok:

“Pitaj lewhäy tä n'am tahuy,

oyok tam wet owo otamseka.

Mat athana ot'änla,

ohätehlat woye atsinha tä iwo lhäsa,

wuj tä äytaj wet leyalh ithatphäpej.

₁₅Owasthihila chenhas

wet oyämla tamchäy m'ayhay tä ihiche,

wet oy'imhatla tewok lhayis lhäy'e inätw'etes.

₁₆Ohänhichela asnamis häp n'äyhäy

tä nitäfwelachehen p'ante.

Oyenla isiya häp honatsi

tä ihi tä lhamel tatache,

wet oy'ayhthichelahchä

honhat lhipey tä takotsochephä,

häpkhilek w'awulhchä.

M'ayhayna kalelhäj tä owohiyela.

₁₇Wet wichi tä t'ekhaye n'ocheyälis wet yok,

Ahäpe olhamel oka dios lhayis,

lhamel len'äfwlhi ihiyeja wet yikhen.

₁₈“Ch'otech'ol, ch'ahuyay n'oye.

Asnamis, yahin wet tetshan.

₁₉¿Atsi tä matche tä asnamis wet ch'otech'ol?

Häpe t'at okawos, lhamel tä oyen oka silätwosa.

Ihichet'a iyhäj tä matche tä asnamis

chik häte iwoye okawos tä oka silätwos.

₂₀Hiw'en wujpe m'ayhay mat itetshanhit'a.

Ilätche honhat mat tek tach'ahulhi.”

₂₁Lhawuk tä häpe Dios tä le'isyaj ihi,

t'uhläk iwunit lechufwenyajay.

₂₂Matkat wichina häpe wichi

tä õt'etane lakäywet wet õ'soyej,

wet õhp'ohiche wet õyäythen.

Õyen kwenkaya wet nehit katsik ifwayhthen,

õ'chäj lhamel wet nehit katsik yok:

“Nachaj alhoho lhamel.”

₂₃¿Mat atsi elh amel chik

tach'ahuhiyela olhämetna?

¿Wet atsi elh tä t'uhläk

tach'ahuye m'ak tä ihichela?

₂₄¿Atsi tä iwahin Israel, Jacob kawichi,

yämthilek letayhfwas ikalhi wet äp ichäj?

¿Hä lekachu tä häpe t'at Lhawuk tä iwoye täjtso?

Tsi lhamel iwoye lech'isukyajay tä tatayhlä,

wet inuhikwet'a len'äyij tä Lhawuk ne'tek inukwe,

wet iwohiyet'a lechufwenyajay.

₂₅Wet häp tä tamenej tä yäm äytaji

lewäk tä itiyej lhamel,

wet ichene letayhfwas tä fwitses

yämthilek wuj tä iwo laka'tshayajayej lhamel,

hätet iwoye itäj tä y'uho

tä iwunhomche lhamel.

Matkat kamaj tek lhamel t'uhläk tach'ahuye häp lham.