Isa 43

₁Mat athana, Israel, Jacob kawichi,

Lhawuk tä lhenek amel yok:

“Yej nowayhen, olham tä oaifwayhthen.

Olham tä ot'än amehen wet owo eya, wet Awukn'o.

₂Chik lhistho inät, oihla amejen,

wok lhistho tewok, lech'ahihent'ala.

Chik letiyäjo itäj, let'ohihent'ala,

mat itäj y'omhila amhihen.

₃Tsi ohäpe Awuk wet äp Afwayhthi,

Dios tä Israel T'amajchet.

Tä oainachaj lhame, otiskanej atapehen

Egipto lhäy'e Etiopía lhäy'e Seba.

₄Tsi oayenhit'a w'et m'ayhaya,

ahäpe iyhäj tä wuj tä laha ihi wet oaihumnhen.

Wet häp tä otiskanej atapehen

wichil lhäy'e honhates,

yämthilek oaifwayhthen wet lheyay n'oyej.

₅Yej nowayhen, tsi oi'amejen.

Onachajila amel lhäy'e ales

tä letälhe tä ifwala tälhche

lhäy'e tä ifwala y'uy,

yämthilek lheyayhi t'at honhat tä haw'et.

₆Otahuyhiyela tä tafwojhiye

wet oyohlak, Achaj wichi.

Wet ofwenhihola tä tapinhiye

wet oyohlak, Yej tsoklhi wichi.

Nachaj oles tä tälhe lhip tä atofwey

tä häpe honhat lepes.

₇Nachaj nilhokej lhamel

tä wichi yok, Lhawuk laka wichi,

tä häpe olhenek yämthilek iwunitn'o.

₈“Äne oka wichi,

häp lhamel tä tatelhoy ihi mat asnamis t'at,

lech'otey ihi mat tek ilätchehen honhat.

₉Häte amel tä aw'enha lhamej

tä lhehiche honhates, ap'ajtitwek.

¿Atsi dios tä ichun tä yen p'ante lhämeta

m'ayhay tä tajyämetso,

wok pajche tä yen lhämeta

m'ayhay tä iche athana?

Is chik nämhen iyhäj

tä yäme tä matche t'at

m'ak tä dios lhayistso yäme p'ante,

häpkhilek nilhokej wichi iyhäj yok, Matche.”

₁₀Lhawuk lhämet yok:

“Amel, Israel lhayis, ahäpehen iyhäj

tä hiw'enpe m'ayhay tä owoye.

Ahäpehen okawos tä ottshupiye

yämthilek nitäfwel n'oyej wet icha n'oye

wet ihanej Elh tä ohäpe.

Ihichet'a elh dios chik iche p'ante

tä kamaj n'am neche,

wet ihichet'alak paj.

₁₁Ts'ilak olham ohäpe Dios,

ihichet'a elh chik ihanej chik ifwayhat hin'o.”

₁₂Lhawuk lhämet yok:

“Olham t'at tä owo siläta wichi

wet ofwenho t'at lhamel wet ofwayhat.

Häpkhit'a dios tä w'enha lhamej chik iwoye täjtso.

Amel lew'enay t'at m'ak tä owoye.

₁₃Tälhe tä kamaj newache m'ayhay, ohäpe t'at Dios.

Nehit katsik neyachufwi okhajyhayaj,

wet nehit katsik iwasthi m'ak tä olhenek.”

₁₄Lhawuk tä Afwayhthi,

häp Dios tä Israel T'amajchet, yok:

“Tä ot'uhläk oaifwayhthen,

ochenhiyela honhat tä Babilonia häp nifwotas,

häpkhilek ifwoyenchehen nilhokej lepelis,

wet Babilonio lhayis käjyaj

nech'e häpkhila lelhakli.

₁₅Ohäpe Awuk Dios tä Amajchet.

Olham tä olhenek amel, Israel lhayis,

wet ohäpe aka Niyat.”

₁₆Lhawuk ifwoyenchehen p'ante

n'äyij tä tiyäjche lewomekitaj,

n'äyij tä tiyäjche inät tä iläfwelchehen.

₁₇Wet inuhatphä p'ante nifwotaj tä takhajay,

lhäy'e laka kaletas lhäy'e yel'atas,

yämthilek itäyhat.

Inät ichäj wet ihanhiyejt'a chik nechephä,

hätet iwoye n'ochäk tä y'om, tatäy t'at.

₁₈Athana Dios tahuyej laka wichi wet yok:

“Yej lhen atichunhayaja m'ayhay tä pajche,

wet yej tichunchehen m'ayhay tä tajyäme.

₁₉Lhek yahinya,

oyenlhi m'ak tä nech'ayek

wet n'änhila athana.

Ofwoynhichela n'äyij tä inukwe ts'anis,

wet otihihila tewok lhayis

häp honhat tä niwoya m'ak chik ihi.

₂₀Itshätäy tä fwitses iwujyenlan'o,

m'awo lhayis lhäy'e wänlhäs.

Tsi otihi inät häp ts'anis,

wet otihi tewok lhayis

häp honhat tä niwoya m'ak chik ihi,

yämthilek ow'enho inät tä iyäyej

häp oka wichi tä ottshupiye,

₂₁häp wichi tä oyenlhi lhamho

yämthilek iwunitn'o.

₂₂“Mat amel, Israel lhayis,

Jacob kawichi, let'änhit'a och'oye,

tajlhama tä let'el at n'oyej.

₂₃Tek lehänay n'oye tson'atas tä õ'wunhomche

wet tek lewunitay n'oyej

itshätäy chik lelänhen.

Tek oy'elkat amejen

chik ot'alhej amehen otw'ayhtes,

wet tek olhaklit amejen

chik ot'alhej amehen incienso.

₂₄Wet tek one'tek lechäj

m'ak tä lenij akäjche

yämthilek lhen otw'ayhata,

wok lekänitlhi n'oyej

itshätäy tä lelänhen t'alhä.

Mat amel tä let'elkat n'oyej hach'isukyajay,

wet lelhaklitlhi n'oyej m'ak tä ni'isa tä lewoye.

₂₅“Mat tä olham ohäpe aka Dios,

otäyhat amejen ates,

wet nemla oyen tichunhayaja hach'isukyajay.

₂₆Chik iche m'ak chik lhen tesa n'oyej,

is chik y'akalelhät.

Hän n'oye nilhokej m'ak tä amel lewoye,

häpkhilek ow'en chik newache p'iya ates.

₂₇Häp atetsel elh tä ichunpe honhat iwoye lech'isukyaj,

wet ämetwos tatay n'ohlä,

₂₈wet aka niyatey ikokyeneje

m'ak tä ni'isa häp Owukwe.

Häp tä tamenej tä oleyej Israel, häp Jacob kawichi,

häpkhilek oläkwlhi wet otäyhat.