Lhawuk häpe Dios, ihichet'a elh
1“Athana ch'ahuyay n'oye, Israel, Jacob kawichi,
amel tä ahäpehen okawos tä ottshupiye.
2Ohäpe Awuk Dios tä alhenek,
häp lham tä ayenwethä tä kamaj ka'ewache,
wet otch'ot amehen. Yej nowayhen.
Ahäpehen okawos tä ottshupiyehen wet oaihumnhen.
3Wet onuhthichela inät
tä iläfwelche häp ts'anis,
wet tewok n'äyhäy inuhikwela
honhat tä tamchäy.
Otsäyhla'pe oka Espíritu
häp ales tä lepes lheley,
wet ochenhiyela okäpfwayaj tä is.
4Wet lhamel hätehlat iwoye sichuyuk lhayis
tä tälh tä lhayej hal'ä tälhes
tä iwhäye inät lhayis tä iläfwelchehen.
5Wet elhpej lhamel yohlak,
Olhamel Owuk t'at Dios,
wet elhpej lheyla Jacob lhäs tä lepes lhele,
wet elhpej ilesaynhila'pe takwech'o tä yok, Owuk Dios,
wet õyenla lheyayej Israel.”
6Lhawuk Dios tä lajit letumfwaya,
Israel laka Niyat wet äp Lefwayhthi, yok:
“Ohäpe Elh tä ichun wet lepes.
Ihichet'a elh dios.
7¿Atsi tä w'awulh n'ohi?
Is chik yämlhi wet ichufwenn'o.
¿Atsi tä yen p'ante silätyaja
ifwalas tä tatay alhoho,
tälhe tä nech'enyaya,
wet yäme m'ak tä ihichela?
8¡Akhajyenhen, yej nowayhen,
amel tä ahäpehen oka wichi!
Olham t'at tä owoyetso,
tälhe ifwalas tä pajche
tä owoynejetso olhämet,
wet amel lew'en t'at m'ak tä owoye.
¿Hä iche elh dios? Ihichet'a.
Tek iche elh chik lakhajyhayaj ihi.”
Ch'isukwis wichi tä n'okwiyej lecheyälis
9Nilhokej lhamel tä yenwethä n'ocheyälis, laha ihihit'a, wet n'ocheyälis tä lhamel yäme tä laha ihi, niwohit m'ak chik tälhe. Wet hin'ol tä n'okwiyej asnamis t'at, ihanhit'a lhamejen tä n'änhila tä ch'isukwis t'at. 10Hin'o tä yenlhi n'ocheyä yämthilek n'okwiyej wet yen häpeya laka dios, niwohit m'ak chik isej. 11Nilhokej lhamel tä n'okwiyej, len'äfwlhi ihiyeja. Lhamel tä yenwethä n'ocheyälis, hin'ol t'at, wet chik nilhokhiyejak ihi tä n'okalelhthayaj tatache, wujlak lenowayhyaj iyej wet len'äfwlhi tapokwe.
12M'ak tä chinajwo iwoye, tachuma chinaj wet hip'o, itihi itäj, wet tä chayo, tachuma lechumetcha wet ikäjej lakäjnhat pajtha wak'alh m'ak tä yene. Wuj tä lhaikhajyen. Mat chik chinajwo nit'eka, takhajayhit'a. Wet chik niyäyayej inät, wuj tä y'el.
13Wet hin'o tä yen chumeta hal'ä, tachuma lakaw'awlhanhatcha lhäy'e laka lapi wet iwo marcaya, wet tijejo lecha tä yenlhi, itech'aynej hin'o wet yäm isilataj, wet tä wak'alh itihi lew'et.
14Wok itihchä hal'ä tä pänhichetek, wet pelhay t'at tä ichihelit, wet chik paj iche t'at pänhichetek lhayis tä yisthen, wok hal'ätaj lhayis, wet t'uyehen tä ihi tayhi pajtha wusche. 15Wet nech'e ichäj lhipey yämthilek yen lelhetesa tä ilhänhi itäj, yämthilek lhaihutunlhi wet äp hip'o laka pan. Wet tachuma lhipey iyhäj wet yenwethä tä yen häpeya laka dios, wet t'upeyhchä tä ihi tä tatache wet n'okwiyej. 16Häte yen itäj hukwa yämthilek hip'o itshäwet, wet tufw pajtha leyi nofwi. Wet tä lhaihutunlhi, wet yok:
–¡Wuj tä is tä oiwhäye itäj, nemhit okofwa!
17Wet hal'ä lhip tä imälhehi, yen häpeya laka dios yämthilek t'upeyejchä wet n'okwiyej, wet lhaip'altsene tä yok:
–¡Fwayhatn'o, tsi ahäpe oka dios!
18Hin'o tä mälhyejna nitäfwenhiyejt'a wet ihanhiyejt'a, tsi imäphä yämthilek niw'ena, wet hit'unhat lehusek yämthilek nhanayej. 19Nehit katsik yen tichunhayaja, wet nehit katsik letäfwnhayaj wok lehanyaj ihi wet yok:
–Hal'äna oyen olhet hukwa, wet oti'pe lefwiyhol oka pan tä op'o lhäy'e itshäwet yämthilek otufw tä y'o, wet is t'at. Mat häp m'ak tä wuj tä ni'isa tä owoye, häp tä otchuma lhip hal'äna wet oyene m'ak tä ni'isa, oyen häpeya dios. ¡Wet m'ak tä on'okwiyejna hal'ä lhip t'at!
20¡Matche tä tet iwoyek tufw mok'otaj! Tach'anlhat lhame tä lehusek wetahayaj iwetahat. Hin'ona ihanhiyejt'a lhaiwoyneje yämthilek lhaifwayhat. Wet nitäfwenhiyejt'a m'ak tä lham itsok tä nileyayej tä häpe t'at m'ak tä lhamya tä kamatache.
Lhawuk itäyhat letes Israel wet ifwayhat
21Lhawuk yok, “Israel, Jacob kawichi,
tichunache tä ahäpehen okawos.
Ahäpehen okawos, tsi olham tä oayenwethä.
Israel, yej p'ethat n'ohlä.
22Otäyhat nilhokej hach'isukyajay,
hätet iwoye pule wok tutsetaj tä noj.
Is chik letapil n'oye,
tsi olham tä oaifwayhthen.”
23¡Pule, fwitsenej tä lhen akäjyaja
m'ak tä Lhawuk iwoye!
¡Honhat, wunit Dios!
¡Chenhas lhäy'e tayhi lhayis,
lhäy'e nilhokej hal'äy tä ihiche,
fwitsenayej achoslis tä akäjyaj ihi!
Tsi Lhawuk hin'älit lewujyaj
wet ifwayhat Israel, Jacob kawichi.
24Häp täja lhämet Lhawuk tä Afwayhthi,
häp lham tä ayenlhi tä kamaj ka'ewache.
Lhämet yok:
“Ohäpe Dios tä lhenek nilhokej m'ayhay.
Och'enhi pule wet oyäm tsajo honhat.
Ihichet'a elh chik tach'ot n'oye, ots'ilak t'at.
25Oyen häpeya m'ak tä kamatache lhämtes
häp wichi tä fwetaj yäme m'ak tä ihichela,
wet han'ältshantses lehusey tatäyhen,
wet oyen häpeya m'ak tä lajit lahaya ahantses hanyaj.
26Mat oyäm matche m'ak tä okawos yäme,
häp lhamel tä okachenhay
tä yen silätyaja olhämtes.
Oyok, Jerusalén yachajiholak wichi ihi,
wet õ'nech'aynhihila tä õyenwethä
honhates tä hupuy ihiche tä ihi Judá.
Oneyhthiphäla tä wasiche.
27Olham ohanej owoyneje chik oy'imhat lewomekitaj,
yämthilek nemhit inukwehen tewok lhayis.
28Olham ofwenho hin'o tä lhey Ciro wet oyok,
Am ahäpe oläy tson'atas lewo,
lewohiyela nilhokej m'ak tä olham ohuminche.
Wet ofwenho Jerusalén wet oyok,
Am õ'ainech'aynhihila.
Wet ofwenho Owukwe tä Ot'amajchet wet oyok,
Õyenhilhila afwetes tä nech'ayhis.”
