Lhawuk hiw'enho lechumet häp rey Ciro
1Lhawuk yen häpeya niyat häp Ciro,
wet itsok takwey yämthilek ikalhiche honhates
wet isoyej lakhajyhayaj häp niyatey.
Lhawuk hiw'enho Ciro len'ohyaj
häpkhilek honhat at chik häpe ifwoyenche lepelis
wet nehit katsik ihanej chik hip'ohlä.
Wet Lhawuk ifwenho tä yok:
2“Olham ochunla ahilä,
othatla katsi hupuy tä atoschephä,
owasthihichela lepe p'otes tä bronce,
wet owohla lhipeya chinhas tä õhp'alkathiche.
3Ow'enla amho n'okäywet tä n'oskalhek,
häp m'ak tä ihiche lew'etes tä wichi niw'ena,
häpkhilek lehanej tä ohäpe Dios
tä Israel lhayis Lewuk tä t'än ame.
4Tä ontichunch'oye Israel,
häp okawo Jacob kawichi tä ottshupiye,
wet häp tä ot'än ame wet oyok, ¡Ciro!
Ow'en amho han'ohyaj tä i'amejna,
tej tä katäfwela n'oyej.
5Ohäpe Dios, ihichet'a elh.
Tek iche elh dios, tajlhamat olham.
Oaiwaklhat yämthilek lewo aka'tshayaja,
tej tä katäfwela n'oyej,
6häpkhilek nilhokej wichi tä i'pe honhat,
tälhe tä ifwala tälhche
pajtha nichäte tä ifwala y'uy,
ihanej tä ts'ilak olham tä ohäpe Dios, ihichet'a elh.
7Olham tä olhenek isi lhäy'e honatsi,
wet owo letamseka wichi,
mat häte owo lelhakliya.
Olham ohäpe Dios tä yenlhi nilhokej m'ayhayna.
Dios tä N'owujtaj lakhajyhayaj
8“Lhek yahinya,
pelhay lhäy'e ayas tä tälh puleye
nitsäype honhat wet iche m'ak tä tälhe.
Wet häp tä mälhyej'attso,
otälhthila kaphä n'o'isyaj,
wet n'ofwayhyaj tälhiyela,
lhäy'e m'ak tä is alhoho.
Olham tä ohäpe Dios
oyenhilhila nilhokej m'ayhayna.”
9M'ak at chik häpe tä n'olhenek
tek itayhtejlä lhämet häp hin'o tä lhenek.
Iyhät tek tahuyej hin'o tä yen chumeta wet yok:
“¿Atsi m'ak tä lhenlhi?”
Wet n'olhenek tek tahuyej hin'o tä yenlhi wet yok:
“Lehanhiyejt'a m'ak chik lefwetaj lhen n'oye.”
10Han'äfwaj ihanhiyejt'a iwoyneje
lhämet chik itiyej lhokwey wet yok:
“¿Chipte tä omälhyejna tä lhenlhin'o?”
11Lhawuk Dios tä Israel T'amajchet,
häp lham tä lhenek lhamel, yok:
“Tek t'uhawet amejen amel chik lefwetaj
letay'ätshanej n'oye häpet wichi tä oles.
Tek t'uhawet amejen chik lefwetaj
letay'ätshanej n'oye häpet m'ak tä olhenek.
12Olhenek t'at honhat, lhäy'e wichi tä ihi.
Och'enhi pule wet one'tek iche nilhokej katetsel.
13Okhajyen Ciro yämthilek ikalhi letayhfwas,
wet tek othahyenhihola m'ayhay yämthilek iwoye.
Lhamlak inech'aynhi oka hupuy,
wet lhamlak yachaje honhat tä lew'et
häp oka wichihte õ'häne honhat tä kalew'eta.
Wet t'alhit'alach'oye laha
wok m'ak chik õyen t'awayhata.”
Häp täjtso lhämet häp Lhawuk tä lajit letumfwaya.
Wichi tä kahäpeya Israel nitäfwenhiyeja tä Lhawuk häpe Dios
14Lhawuk tahuyej Israel wet yok:
“Häp wichi tä lew'et Egipto,
lhäy'e hin'ol tä iwom m'ayhay,
häp lhamel tä lew'et Etiopía,
lhäy'e wichi tä pites tä lew'et Seba,
lhamel lhayachajila amehen wet häpkhila akwenkay.
Lechunlahlä lhamel tä lhäytejen chinhas,
wet lakamchetey itihihila honhat tä ihi tä letatache,
wet tahuyhla amejen wet yohlakwe,
Matche tä Dios i'amejen,
ihichet'a elh dios.”
15Matche tä ahäpe Dios tä nin'äla,
Israel laka Dios tä Lefwayhthi.
16Nilhokej lhamel tä yenwethä dios tä takwey lhenhay
n'äfwelhihena, õyenla n'oläkwika,
wet w'et m'ayhayla t'at.
17Mat häp Israel lhayis,
Lhawuk tä ifwayhthen pajla'tha tiyäj'attsiy,
wet len'äfwlhi ihiyejt'ala
wet tek õyenla w'et m'ayhaya.
18Lhawuk lham t'at tä häpe Dios.
Yenlhi pule wet äp yenlhi honhat wet yäm t'unhi.
Wet yenhit'a ts'anisa mat iwo lheleya tä häpe wichi.
Lham yok, “Ohäpe Dios, ihichet'a elh.
19Oskathit'a olhämet,
wet oihihit'a honatsi tä ihi honhat.
Wet ofwenhihot'a Jacob leles
tä lepes lheley chik oyok,
Hoye honhat tä newache m'ak chik ihi tä let'u n'okwe.
Ohäpe Dios wet matche olhämet,
oyäme m'ak tä is alhoho.
20“Ahutwek wet hoyay n'oye,
nilhokej wichi tä imälhehi tä ihiche honhatil.
Atott'ayen n'oye, amel tä letilhäj
akwey lhenhay tä lhen aka dios lhayisa
wet let'alhaye lhamel tä niwohit m'ak chik
ihanej iwoyneje yämthilek aifwayhthen.
¡Atäfwnhayaj ihit'a amejen!
21Ämwethä amhomche, wet päyen n'oye
m'ak tä matche tä lhämaye.
¿Atsi tä yen lhämeta m'ayhayna
häp ifwalas tä tajyämetso?
Wet ifwalas tä pajche
¿atsi tä yen p'ante silätyaja?
¿Hä kahäpeya olham, Dios?
Ihichet'a elh dios tä le'isyaj ihi
wet äp N'ofwayhthi, tajlhamat olham.
22“Hoyay n'oye, amel tä haw'etes atosehen.
Oaifwayhthihena tsi ohäpe Dios, ihichet'a elh.
23Wet ot'unhatche lhamej olhämet
tä owoye tä oyämlat matche, oyok,
Nilhokhiyeja wichi itsinenla
lakamchetey tä ihi tä ottache,
wet nilhokej hit'unthichela n'oyej lhämet
24wet yohlak,
Tajlhamat Lhawuk tä le'isyaj ihi, lhäy'e lakhajyhayaj.
Wet nilhokej wichi tä n'äyi n'oho,
len'äfwlhi ihiyeja lhamel.
25Wet o'isyenla nilhokej Israel lhayis,
wet lhamel akäslawethä n'oyej.”
