Isa 50

₁Lhawuk lhämet yok:

“Yej lhenek owom Israel tä amel ako

tä ohätet iwoye hin'o tä iwom lech'efwa,

wok owom amel yämthilek ahäpehen n'okwenkay

tä oayen lahaya otes tä elh tufwlha n'oye.

M'ak tä tamenej tä owom amel,

häp tä hach'isukyajay,

wet m'ak tä tamenej tä owom Israel tä amel ako,

häp tä amel ahäpehen fwitses.

₂¿Tsi chipte tä n'am w'enhit

elh chik häpe tä onäm?

¿Wet chipte tä niwohit elh

chik nichulh n'oho tä ot'än amehen?

¿Wok elat amel lekachuyay tä oyok,

Ohanej owoyneje yämthilek osakan amejen?

¿Wok lekachuyay tä ohanej owoyneje

yämthilek oaifwayhthen?

Lhek tetshan, olham chik owoye olhämet,

y'im t'at lewomekitaj,

wet tewok lhayis nech'e häpe t'at ts'anis,

wet w'ahat y'inhen tä y'im inät tä ihi wet najuthen.

₃Ohanej tä ochalnhat pule

wet ow'uyyenhi lefwitajayaj.”

₄Owuk Dios ichufwenn'o

yämthilek ohanej olhämtes

tä ikhajyen wichi tä nitkhajayahen

wet ofwenho olhämtes tä takhajayejwethä.

Nech'e fwalapej ifwoyenchehen och'otey

yämthilek oläte häp lham

wet matche tä lechufwenekn'o.

₅Lhawuk Dios hiw'en n'oho ohanyaj,

wet tek olhaifwonlä wet oyikhit'ach'oye.

₆Wet otch'anlhaye t'at tä otayhfwas

itasinlhin'o wet itonhiche opäsey.

Wet tek otiyej kanhihlä otte'pe

häp lhamel tä iläkwlhin'o wet ifwats'unlhin'o.

₇Elh tä tach'ot n'oye häpe t'at Owuk Dios.

Häp tä tamenej tä nilänan'o n'oläkwyhanyaj,

wet tamenej tä olhait'unthi, ohätet iwoye chenaj,

tsi ohanej tä on'äfwlhi ihit'ala n'oyej.

₈Tek atofwe n'ohlä Elh tä tach'ot n'oye.

Chik iche elh tä otes ihihlä,

mäh n'ahoye n'okalelhthayajwo.

Chik iche elh tä yäme

tä matche m'ak tä yen tesa n'oyej,

is chik iho n'oye wet ifwel n'oho.

₉Elh tä tach'ot n'oye häpe t'at Owuk Dios,

wet ihichet'ala elh chik häpe

chik yäme tä otes ihi.

Nilhokej otayhfwas nofwila,

hätehlat iwoye wesaj tä lewos tufw.

₁₀Amel tä lehuminay Lhawuk

wet letach'ahuye lhämet häp lakawo,

wet chik lheyayhi honatsi, newache isi,

ekhaye Lhawuk Dios wet ap'ajtej.

₁₁Mat nilhokej amel tä lelhänhi itäj

wet lhenwethä hach'ähal tä itäj ihiche lepesey,

amenlak lechätho aka itäj tä y'uho,

lhäy'e itäj tä ihiche amel hach'ähal.

Dios ichenla amehen letasnhayajtso,

wet hap'itseyhay ihihila ateläythayaj.