Wichi tä kahäpeya Israel lhayis isiyeja Dios lakäpfwayajay
1Lhawuk lhämet yok:
“Woyaye m'ak tä is alhoho
wet enay achumyaja m'ak tä t'uhawetej.
Tsi nämla'thahya wichi lefwayhyaj tä oyäm wak'alh,
wet n'änhila o'isyaj.
2Okäpfwayaj tä is iyej hin'o
tä iwoye olhämtesna wet nileyayej,
wet yen t'amajcheta ifwala tä n'ot'elakw'et,
wet yenhit'a w'et m'ayeka,
wet t'amaj lhamej yämthilek
niwoyaye m'ak tä ni'isa.”
3Chik hin'o tä kahäpeya Israel lhayachaje Lhawuk,
isit'ak yok, “Dios tek hip'ajthila n'oyej laka wichi.”
Wok häp hin'o tä õyen lajchänisa chik yok,
“Otet iwoye hal'ä tä tamchäy.”
4Tsi Lhawuk lhämet yok:
“Chik hin'ol tä õyen lajchänisa
yen t'amajcheta ifwala tä n'ot'elakw'et,
wet äp iwoye m'ak tä olham ohuminche,
wet nileyayej tä iwoye olhämet tä ot'untejche wichi,
5ow'enhihola m'ak tä lhäy'e lhip tä is,
inuhla'pe chik leles ihi. Häp täja:
Ow'enhihola yämthilek lhey nittäya tä ihi t'at Ow'et,
häp lhey tä nehit katsik ilejla.
6Wet häp wichi tä kahäpeya Israel lhayis,
mat lhayachaj n'oye yämthilek n'okwi n'oyej,
wet iti n'oyej lehumnhayaj
wet lhayen häpeya okawos,
wet lhamel yen t'amajcheta ifwala tä n'ot'elakw'et,
wet yenhit'a w'et m'ayeka,
wet nileyayej olhämet tä ot'untejche wichi,
7chik mälhyejtso, ohänhiyela chenaj tä ot'amajchet,
wet oyenla häpeya wichi tä lakäjyaj ihi
tä lhamel ihi Ow'et tä häpe n'ot'alhyaj lew'et.
Wet otchumlahlä m'ayhay tä lhamel
yen otw'ayhata tä õ'ti'pe oka altar,
häp m'ayhay tä õ'wunhomche
lhäy'e itshätäy tä õ'länhen.
Tsi Ow'et lheyla N'ot'alhyaj tä Lew'et,
yämthilek wichi tä tälhe honhat at chik häpe
ihoye tä iwo let'alhyaja.
8Olham tä ohäpe Awuk Dios
wet ohutwek Israel lhayis tä ifwtsatpehen honhat,
olhämet yok, Ohutlawek iyhäj wichi
yämthilek lhaip'ajtej häp lhamel.”
Lhawuk itiyej letes häp lhamel tä y'uhyene laka wichi
9Lhawuk yok:
“Itshätäy tä fwitses tä ihi tayhi,
¡lhuyay wet tufwen tson'atas!
10Tsi tet iwoyek asnamis t'at hin'ol
tä fwetaj t'uye oka wichi,
wet wohit'a m'ak chik ihanej.
Nilhokej tet iwoye asinhäs tä laj lepaka,
ihanhiyejt'ak t'än.
Tajlhama tä imä t'at wet tafwilhanlhi,
wuj tä ihumin tä imä.
11Tet iwoye asinhäs tä yalhk'alis,
tej chik lets'el tapokwe
mat kamaj iwatlä lhip lhäk.
Häpehen t'at lhamel tä oy'uhyene oka wichi,
mat niwohit m'ak chik lhamel ihanej.
Elhpej iwoyet m'ak tä lham ihuminche,
wet t'ukwe m'ak tä lham t'at tä isej.
12Wet yok, ¡Mäh n'at'ukwe hat'es
tä wuj tä äytaji häpkhilek n'aw'oknhasej!
¡Wet chik ifwala n'achajola,
wolak y'afwayhatpe tä y'ayäyej ifwalana!”
