Isa 59

₁Imälhewek Lhawuk lakhajyhayaj

yämthilek ifwayhat hin'o,

wet ilätche honhat wet iläte t'at elh chik häpe.

₂Matkat m'ak tä ni'isa tä lewoyaye

häp tä hip'o ahilähen wet tek lesakanaye Dios.

Wet hach'isukyajay häp tä tamenej

tä lhaknin'älita amejen

wet tek t'uhläk ilät amehen.

₃Afwus tach'oyejche m'ak tä ni'isa tä lewoyaye,

hätet iwoyek w'oyis tä ichehen akweyey.

Wet ämtes tek matchehen

wet lhen ämeta m'ak tä ni'isa.

₄Elh tä ihoye n'okalelhthayajwos

isit'a m'ak tä iwoye tä itiyej letes elh

wet yäme m'ak tä kamatache.

Ichaye m'ak tä kamatache,

wet fwetaj isej n'olhämtes tä kamatachehen.

Hätet iwoye atsinha tä hich'otshan,

takapuhtshanej m'ak tä ni'isa

wet iwo lhäsa tä häpe m'ak tä äytajche.

_5-6Wichi tä mälhyejentso yenlhi t'akanyajay,

hätet iwoye amlhäj lhich'ulh,

matche tä n'ot'ilek ihi,

chik õt'äspe, amlhäj t'at tä tälho.

Mat wichi tä akantsestso,

niwohit m'ak chik isej lakeyis tä iwoye,

niwohit m'ak chik tälho, t'unhihent'a,

hätet iwoye chohot kaniyhäy tä õyen n'ow'uya.

₇Inukwe alhoho yämthilek iwoye m'ak tä ni'isa,

wet nakele elh tä laj letesa wet ilän.

M'ak tä yen letichunhayaja

häpe t'at m'ak tä ni'isa,

wet lhip at chik häpek inukwe,

ilhaklitwethä wichi wet itäyhthen.

₈Lhamel nitäfwenhiyejt'a m'ak tä häpe n'otamsek,

wet nilhokej m'ak tä iwoye isit'a alhoho.

Inukwe len'äyij tä ni'isa alhoho, wet lajit letamseka.

₉Tähestso tamenej tä lhafwayhyaj ihit'a n'amejen,

kamaj n'ahäpehen t'at m'ak tä ni'isa lhäytshay t'at.

Y'anihich'oye isi,

mat tajlhamat honatsi tä in'amejen.

Y'anihich'oyek n'älpe honhat,

mat y'alunhitwethä honataj.

₁₀Y'ahätet iwoye asnamis tä yikhen,

tachaschet hup lhip,

hätet iwoyek laj lhattelhoya.

Wet tej tä ifwala ihi lechowej,

mat y'atnhäphänhen,

hätet iwoyek honatsi.

Iyhäj takhajayhen, mat n'amel

y'ahätet iwoyek lhap'itseyhay t'at.

₁₁Nilhokej n'amel y'ipwethä,

y'ahätet iwoye sulaj lhayis tä y'ipwethä.

Lhalhaknhayaj tum at n'amehen,

y'ahätet iwoye hokwinhas tä y'iphen.

Y'anihihlä lhafwayhyaj mat nämhit'a,

y'anihihläk nemla n'ahäpehen

m'ak tä ni'isa lhäytshay,

mat atofwet ilhahlä täjtso.

₁₂Tä lhäy'e lhip tä olhamel ottay ahilä,

olhamel ow'en t'at tä otes ihi ahilä.

Och'isukyajay in'oyejen,

wet ohanej ihi m'ak tä ni'isachehen tä owoye.

₁₃Ohäpehen wichi tä tatay ahilä wet ole amej,

tek owatläk owoye m'ak tä lene'tek owoye.

Wet olhamel ohumin tä olhaklit wichi

wet owoye otkanyajay. Nemhit is ohusey

wet tek matchehen olhämtes tä tälho.

₁₄Owohit'a lahaya m'ak tä is alhoho,

wet ihit'a n'amejen n'o'isyaj.

M'ak tä matche isakanhihot'a wichi,

wet ichepej m'ak tä kamatache

tä tumchä tä ihiche ohusey.

₁₅Tatäy m'ak tä matche,

wet elh tä is m'ak tä iwoye

õ'soyej m'ak tä iyej.

Lhawuk tek akäjejlhi tä hiw'en

tä wichi niwoyaye m'ak tä is alhoho.

₁₆Wet yok:

“¿Chipte tä newache elh chik tach'ote lhamel?”

Wet nech'e lham Dios tä itetshan,

ichumyenlhi lakhajyhayaj wet ikalhi.

₁₇Wet yen let'okwep'ota m'ak tä is alhoho,

wet yen lakawon'aya n'ofwayhyaj.

Wet taw'uyhi lewäk yämthilek

iwo hayahlä letayhfwas.

₁₈Hiw'enhihola laha tä t'uhawetej

m'ak tä iwoye letayhfwas,

wet itasnhila lhamel.

Tej chik lew'etes atosehen,

mat itasnhila t'at lhamel.

₁₉Nilhokpe honhat,

tälhe tä ifwala tälhche lhäy'e tä ifwala y'uy,

wichi iwujyenla Lhawuk chik lhamel hiw'en lewujyaj.

Tsi chik nek, hätehlat iwoye tewok

tä tapoyej wet leyalh hiw'ahhathi.

₂₀Nämla tä ifwayhat Jerusalén,

lhäy'e nilhokej Jacob leles tä lepes lheley

tä lhamel ileyej m'ak tä ni'isa.

Lhawuk lhämet t'at täjtso.

₂₁Wet Lhawuk yok, “Owoye olhämet

tä ot'unhatche amejen wet omatthichela.

Wet oyok, Oka Espíritu tä i'atapehen,

lhäy'e olhämtes tä ow'en amhohen,

yikhit'ala hach'oyehen,

wet yikhit'alach'oye ales lhäy'e achetsos,

pajla'tha nichäte lepes lheley.”