Õyen silätyaja Israel lefwayhyaj
1Häp Lhawuk Dios laka Espíritu in'o'pe,
tsi Lhawuk yenn'o t'amajcheta
häpkhilek oyen lhämetayej wichi tä p'elitses
häp Dios silätyaj tä is.
Ichenn'o yämthilek ow'enho lakhajyhayaj
iyhäj tä lelhakli ihi,
wet owo silätayej lefwayhyaj
lhamel tä n'okwenkay,
wet ofwenho iyhäj tä ihiche n'op'onthis
tä lhamel inuhikwephäla.
2Wet owo silätayej wichi
tä näm lewhäy tä Lhawuk ifwayhat lhamel,
wet häpe t'at ifwala tä lhaka Dios
yachajlä lhatayhfwas m'ak tä iwoyej n'amehen.
Wet ichenn'o yämthilek okäsyenwethä
lhamel tä lefwitajayaj ihi,
3wet ow'enho lhamel tä lelhakli ihi
tä ihi Jerusalén häp lakäjyaj,
nemhit häpe tä ilän lhamejen mok'otaj.
Mat ilänla lhamejen m'ak tä lenij akäjche,
nemla häpe lhafwyhayaj,
wet iwujyenhiyeja Dios häp letenkay,
nemhit häpe tä lechowej ilehat lhamejen.
Wet õyenla lheya n'okhajyenhay tä Lhawuk yenlhi,
yämthilek n'äl tä lham lewujyaj ihi.
4Wet lhamel inech'aynhihichela m'ayhay tä wasiche,
lhäy'e hupuy tä wasiche p'ante.
5Wet wichi tä kahäpeya Israel lhayis
lhamenlak t'uye aläy tson'atas lhäy'e alafwey.
6Wet wichi yämla amehen wet yok,
“Lhawuk lhämetwos,
n'amel lhaka Dios lakawos t'at.”
Wet lewohlat kotsayej n'okäywetes
tä tälhehen honhates iyhäj,
wet alesilatyenejen lakhäy tä isis.
7Wet tej tä ateläythayaj wuj tä ailänhente
wet wichi ayente w'et m'ayhaya,
mat lhehihila t'at aka honhat,
wet oy'isiyeja lhip akäywet chik lekatej,
wet tek akäjyaj tatäyhla amejen.
8“Tsi olham Dios ohumin m'ak tä is alhoho,
wet ohuminhit'a n'ot'etanyaj
lhäy'e m'ak at chik häpe tä ni'isa.
Wet olehiyejt'ala tä ow'enho lakäywet oka wichi,
wet owohiyejela olhämet tä nittäya tä ot'untejche.
9Wet leles tä lepes lheley tä iyej wichi,
letoyaj y'ajla'pe honhat,
wet nilhokej wichi nitäfwenhiyeja chik hiw'en lhamel
tä häpe wichi tä okäpfwayaj tä is iyej.”
10Matche tä okäjyaj iyeji Lhawuk,
tsi lham hiw'en n'oho ofwayhyaj
wet ikäfwel n'oyej m'ak tä is alhoho.
Ohätet iwoye hin'o tä n'oka'is tä lhayenlhi,
wok atsinha tä n'oka'is tä lhayenejlhi
lhamsilis tä wuj laha.
11Tsi mälhyej iwoye honhat
tä tälh hal'ä tälhes tä tälho,
wet yachuyajw'et tälh t'at
yachuyaj lhoy tä õ'tihi,
wet häp tä mälhyej'attso,
Lhawuk Dios hin'älthila m'ak tä is alhoho,
wet ifwayhthila laka wichi,
yämthilek nilhokej wichi
tä ihiche honhates iwujyen.
