Isa 63

₁¿Atsi tä häpe hin'o tä tälhe Bosra,

Edom kahupuy tä lhamya,

wet õ'pakej m'ak tä ichät lew'uy?

Tä yik, n'äl t'at tä lakhajyhayaj wuj,

wet wuj tä isis lew'uyis.

Lham nichulho wet yok:

“Olham t'at, häp elh tä yäme

m'ak tä wuj tä is alhoho,

wet okhajyhayaj ihi yämthilek ofwayhat wichi.”

₂¿Mat chipte tä ichät haw'uy,

hätet iwoyek let'äsin'aj uvas?

₃Lham yok, “Matche,

olham oweihalha t'at tä ot'äsinaj uvas.

Ihichet'a naji elh chik tach'otnaj n'oye.

Wuj tä owäk ihi tä ot'äsi otayhfwas,

ot'äseji t'at owäk,

wet lew'oyis tä nitsäyphä

häp tä iyej ow'uy wet wuj tä kok'aye.

₄Pajche oyen tichunhayaja

yämthilek owo lahayayej m'ak tä ni'isa,

wet nichäte t'at lewhäy

tä ofwayhat oka wichi.

₅Mat ow'en tä nehit katsik tach'ot n'oye,

wet oyok, ¿Chipte tä newache och'otfwa?

Mat olham t'at tä ochumyenlhi

okhajyhayaj wet okalhi,

wet otkhajay t'at, olehiyejt'a owäk.

₆Wet tä lhäy'e lhip owäk,

ot'äspe wichi tä ihiche honhates,

wet owasthiche wet lew'oyis t'ulhpe honhat.”

₇Owatläk oyäme Lhawuk lehumnhayaj tä nittäya

wet owujyen tä oyäme nilhokej m'ak tä iwoyej n'amehen.

Ot'uhläk oyäme lep'altsenyaj

tä iti n'amejen tä n'aIsrael lhayis,

häp m'ak tä iwoyeje wichi tä lham hip'altsen

wet itiyej lehumnhayaj tä wuj.

_8-9Wet lham yop'antekwe:

“Lhamel häpe t'at oka wichi, ikanhit'ala n'oyej.”

Wet lham ifwayhtej p'ante lelhaklis.

Häpkhit'a lakawo chik häpe chik ifwayhat wichi,

mat lham t'at Dios,

häp tä isej lehumnhayaj lhäy'e lep'altsenyaj,

wet ineyhatphä lhamel wet tatsufwelej

nilhokej ifwalas tä pajche.

₁₀Matkat lhamel iwohiyet'a lhämtes,

wet lham laka Espíritu tä T'amajchet lelhakli ihi.

Wet häp tä Lhawuk yen letayhfwasa lhamel wet tatayhlä.

₁₁Wet lhamel nech'e nitichunch'oye

ifwalas tä pajchehen tä Moisés iyej wichi.

Wet lhamel yok:

¿Chip ihitso Dios p'ante ifwayhat Moisés

tä ihi p'ante tewokitaj Nilo,

häp Moisés tä äp häpe elh tä t'uye Dios laka wichi?

¿Chip ihitso Dios p'ante ithatho

laka Espíritu tä T'amajchet häp Moisés,

₁₂wet ichenche lakhajyhayaj tä wuj?

¿Chip ihitso Dios p'ante hich'esaj inät

yämthilek wichi hiw'en wet letoyaj

y'ajpe honhat pajla'tha tiyäj'attsiy?

₁₃¿Chip ihitso Dios p'ante inuhatche lhamel

honhat tä tamchäy tä inukwe lewomekch'o,

wet niwohit m'ak chik lhamel tanhäphänej,

hätet iwoye yel'atas tä inukwe ts'anis?

₁₄Lhawuk laka Espíritu iwo p'ante t'elakw'eta lhamel,

hätet iwoye n'oläy tä tälhpe chenhas

wet yen lhäkw'eta honhat tä w'awulhchä.

Häp p'ante täjtso tä Lhawuk iwoyeje

laka wichi tä lham yikchufwi,

yämthilek õ'toyench'oye häp lham wet õ'wujyen.

₁₅Dios tä lhe puleye, lhek yahinya

tä lhehi Haw'et tä Amajchet wet äp isilataj.

¿Chip ihitso ahumnhayaj tä wuj lhäy'e akhajyhayaj?

¿Chipte tä lep'ethatlä olhamel?

¿Hä noj hap'altsenyaj tä leti n'oyejen?

₁₆Ahäpe olhamel Ojcha.

Elat tej chik Abraham lhäy'e Israel

nitäfwela n'oyejen p'iya,

mat am, Iwuk, ahäpe t'at olhamel Ojcha,

tälhettsiy tä ahäpe olhamel Ofwayhthi.

₁₇Iwuk, ¿chipte tä lewetahat n'ohen

yämthilek n'am woye ämtes,

wet let'unthen ohusey

yämthilek oayen w'et m'ayeka?

¡Lhek tapil alhoho,

tsi olhamel ohäpehen akawos,

häp wichi tä Alewuk!

₁₈Pitajit'a lewhäy tä honhat lewukte aka wichi,

mat olhamel otayhfwas t'äsche t'at Haw'et.

₁₉Hätet iwoyek nehichet ifwalak

ahäpe olhamel Owuk,

wet hätet iwoyek nehichet ifwalak

ohäpehen aka wichi.