Isa 7

₁Häp Aram laka rey tä lhey Resín, lhäy'e Remalías lhäs tä lhey Peka tä häpe Israel lhayis laka rey, lhamel inuye p'ante Jerusalén yämthilek ikalhi, mat lhamel ikalhihit'a. Häpe p'ante ifwalas tä Acaz häpe Judá laka rey, lham häpe Jotam lhäs wet lechäti häpe Uzías. ₂Wet ifwalas p'antetso õ'wo silätaye rey Acaz lhäy'e lew'et lheley tä õyok:

–Aram lhayis lhaip'ajtej Israel lhayis.

Wet rey Acaz wuj tä lenowayhyaj ihi, lhäy'e laka wichi. Wuj tä ichettichehen, hätet iwoye hal'äy chik yafwthi nichätho.

₃Wet Lhawuk tahuyej Isaías wet yok:

–Mäh, am lhäy'e äs Sear-jasub, wet ukwe rey Acaz. Lham ihi t'at lepes inät n'äyij tä tälhe n'opek tä i'pe honhat tä atojphä, häp n'äyij tä tiyäje honhat lhip tä lewuk hin'o tä ilejen wesas. ₄Chik lechäte, olak, “Yej noway, mat yej tekm'ahatlä wet yej nuhat amho. Yej nowaye fwiyhol tä lak'ehen, wok oyok, häp rey Resín lhäy'e laka wichi Aram lhayis, lhäy'e Remalías lhäs. Yej nowaye tä lhamel wuj tä lewäk ihi. ₅Aram lhayis, lhäy'e Israel lhayis, lhäy'e Remalías lhäs, lhamel t'uhläk iti amej awit'äyhyaj wet yok, ₆¡Mäh n'attayhlä Judá! Nowayhla n'amehen wichi tä ihi. Wet n'ena lhaka honhata wet n'atihila Tabeel lhäs yämthilek lhayen niyatayej.

₇“Matkat olham tä ohäpe Awuk Dios oyok, Tek mälhhiyejatso. _8-9Damasco häpe t'at Aram laka honhat tä lhamya wet Resín lhayen niyatayej. Wet Samaria häpe t'at Israel laka honhat tä lhamya wet Remalías lhäs lhayen niyatayej. Mat chik nichäte sesenta y cinco nekchämis, nofwila Israel. Wet chik amel akachuhanyaj ihi, häte amel anofwila.”

₁₀Häte Lhawuk ifwenho Acaz wet yok:

₁₁–Alh n'oye tä ohäpe Awuk Dios yämthilek opäyen ame otetnek häpkhilek aisej, otetnek chik ihonhatch'oye wok ipuleye.

₁₂Acaz nichulho wet yok:

–Kha, tek ot'alhej ame. Tek oyelhthiyela Owuk Dios.

₁₃Wet nech'e Isaías yok:

–Ch'ahuyay n'oye, amel tä ahäpehen rey David leles tä lepes lheley. ¿Hä let'ayhtejen tä lelhaklitay häp wichi, wet äp let'uyayhläk lelhaklitay Dios? ₁₄Lhawuk lhamlak ipäyen amehen letetnek. Oyok, atsinha lhutsha hich'otshan, iwohla lhäsa, wet yenla lheya Emanuel., ₁₅Wet nekchämis tä kamaj han'äfwaj, tufwilat itshäwet kat'os tä isop'anhi, lhäy'e akäyek, pajla'tha nichäte ifwala tä iwo tesa tä itetshan m'ak, wet y'ulhan m'ak tä ni'isa wet tatshupiye m'ak tä is. ₁₆Oyok matche, chik kamaj han'äfwajna nitiyayej t'ulhnhayaj m'ak tä ni'isa, wet kamaj nittshupiyaye m'ak tä is, häp honhates tä lenowayaye laka niyatey, nemla wichi ihiche.

₁₇“Mat am, Lhawuk ichätyenla atape ifwalas tä wuj tä ni'isa, lhäy'e aka wichi, lhäy'e aniyatyaj. Häpkhila n'owit'äyhyaj tä nhanayej chik mälhyejtso, tälhe ifwala p'ante Israel lhaiw'enhat wet nemhit iyej Judá lhayis. Oyäme t'at häp Asiria laka rey.”

₁₈Wet häp lewhäytso Lhawuk t'änhiyejela wichi tä lew'etes atosehen tä ihi Egipto, tehlat iwoye k'atas tä wujpey chik nekhen. Wet äp t'änhiyejela wichi tä tälhe honhat tä Asiria, tehlat iwoye akäyekwos chik nekhen. ₁₉Wet nilhokej lhamel nämhihena wet ihihila tewok n'äyhäy tä pitos, lhäy'e chowhay tä ihiche chenhas, lhäy'e hon'al tä ch'uthanil, lhäy'e itshätäy lhäthis. ₂₀Wet ifwalatso Lhawuk yenla n'opäsechaya häp Asiria kaniyat, häp hin'o tä tälh w'echehi tewokitaj tä lhey Éufrates. Nämla häpkhilek wuj tä ilhaklit häp Israel lhayis, wet yähäsichela lepäsey lhäy'e t'isanis wet yisthichela lew'oley.

₂₁Wet häp ifwalatso elh chik ichihelit w'asetaj lhäy'e täkwfwas kayla, ₂₂iyähiyeja lakat'os wet tufwila lhip tä isop'anhi. Matche, iyhäjfwas wichi chik imälhehi honhat chik tafwayej n'owit'äyhyaj, lhamel tufwila itshäwet kat'os tä isop'anhi, lhäy'e akäyek.

₂₃Wet häp lewhäytso n'olafwek tä mil uvas lhiley tä ihi tä wuj laha, nech'e häpkhila ch'uthanil lhäy'e nawaj tä ihi. ₂₄Tajlhamhiyelat hin'ok ichäjlhi lelutsej tä ichowalh itshätäy chik tiyäjo, tsi imälhewek honhat tä nech'e ch'uthanil lhäy'e nawaj tä ihi. ₂₅Wet häp yachuyajw'etes tä õ'fwajejiche azada tä õtutcheyhi, tajlhamhiyelat ch'uthanil lhäy'e nawaj tä i'pe honhat, wet nehit katsik ihohiyela. Tajlhamhiyelat w'asetas, tson'atas lhäy'e kayla lhayis chik yen t'ekhaweta.