Ihichela n'otamsek laka Niyat
1Mat lhamel tä lelhakli ihi, nofwila lefwitajayaj wet nemla honatsi iyej. Pajche Dios itiyej lewit'äyhyaj Galilea tä häpe honhat tä lewuk wichi tä tälhe letes Zabulón, lhäy'e tä lewuk wichi tä tälhe letes Neftalí. Mat chik ifwalas tä tatay alhoho, wujla len'ohyaj chik Dios hiw'enho honhattso, tä häpe wichi tä w'enha lhamej tä lew'et, tälhe lewomekitaj lhip pajtha nichäte tewok Jordán lhip elh.
2Wichi tä ihi honatsi
nech'e hiw'en isi tä wuj.
Lhamel tä ihi n'ot'ilek lehupel,
isi ihutunche'pe lhamel.
3Iwuk, lhäm wujpey aka wichi
wet let'isej lhip lakäjyaj.
Lhamel iwo lakäjyaja tä ihi tä letatache,
hätet iwoye tä wichi ilanhi yachuyaj lhay,
wuj tä lakäjyaj ihi,
wet hätet iwoye tä wichi hiw'en lhamhomche
n'okäywet tä isoyej letayhfwas,
wuj tä iwo lakäjyaja.
4Tsi letäyhat m'ak tä choyhat tä i'pe lhamel,
wet lesoyej leteläythayaj.
Lekalhi letayhfwas tä ilhaklitwethä lhamel,
mälhyej tä letäyhat p'ante Madián lhayis.
5Wet sip'äl nisähes tä pitsajche
tä tiyäjo laka'tshayaj,
lhäy'e lew'uyis tä w'oyis iyejen,
õ'thathihola itäj wet noj.
6Tsi nech'e iche han'äfwaj tä in'amejen.
Dios hiw'en n'amhohen lhäs,
wet hiw'enho lakhajyhayaj
yämthilek häpe niyat.
Wet õyenla lheya wichi Lech'otfwa
tä matche wet lehusek ihi,
Dios tä Takhajay, Lhajcha N'ilataj,
N'otamsek laka Niyat.
7Tatayhihiphäla rey David leniyatyaj,
wet lakhajyhayaj y'ajla'pe nilhok honhat.
Nofwit'ala n'otamsek wet leniyatyaj t'un,
wet lefwetes häpe t'at m'ak tä is alhoho,
lhäy'e lakalelhthayaj,
tälhe athana wet yämthilek tiyäj'attsiy.
Lhawuk tä lajit letumfwaya
lhaikhajyenla wet iwohiyela tähestso.
Lhawuk itiyej lewäk häp Israel lhayis
8Lhawuk ichene lhämet häp Israel lhayis,
häp Jacob kawichi, wet yämla matche.
9Nilhokej wichi tä ihi Samaria lhamel ihanhiyeja.
Tsi lhaichäjwethä wet yok:
10“Hupuy tä ladrillos wasiche,
mat n'achajolak y'enwethä
wet nech'e n'atchumla tuntey.
Õ'wasthiche lemäynhay tä higo takas,
mat n'atihila lew'et pino.”
11Mat Lhawuk ikhajyen letayhfwas wet ihän alhoho,
wet lham t'at tä ne'tek inuyehen.
12Wet nämhen Aram lhayis
tä tälhche tä ifwala tälhche,
wet äp nämhen Filisteo lhayis
tä tälhche tä ifwala y'uy,
wet lhamel ihämit Israel lhayis,
hätet iwoye m'ak chik lhimphaj.
Mat kamaj nofwit'a Lhawuk lewäk,
tujlhache t'at tä itiyej letasnhayaj häp lhamel.
13Matkat lhamel tek tapilej
häp Dios tä itasin lhamel,
wet t'uhikwet'a Lhawuk tä lajit letumfwaya.
14-15Tä mälhyejtso,
Lhawuk yiset lepes häp Israel niyatyaj,
wet äp yiset tä ichun,
hätet iwoye itshäwet
tä õyiset lechäs wet õyiset lhetek,
wet hätet iwoye fwitsuk
chik õyiset letes wet õyiset lepes.
Wok oyok, hin'ol tä thänhäy lhäy'e niyatey,
häp tä Israel lhetek,
wet häp profetas tä lechufwenyaj
häpe m'ak tä kamatache,
häp tä lechäs.
Wet ifwala tefwajni iche nilhokej lewit'äyhyajaytso.
16Tsi niyatey iwetahathen laka wichi,
wet lhamel tä ihän m'ak tä laka niyatey ichufwenejen,
nemhit kalelhäj m'ak tä iwoye.
17Häp tä tamenej tä Lhawuk
iwohit'ala lep'altsenyajayej häp mamses,
wet tek iwohla lep'altsenyajayej
chipenhas lhäy'e tesalis.
Tsi nilhok wichi tek hap'altsentses
wet iwoye t'at m'ak tä ni'isa,
wet lhämtes tä iwoye lajit lahaya.
Mat kamaj nofwit'a Lhawuk lewäk,
tujlhache t'at tä itiyej letasnhayaj häp lhamel.
18M'ak tä ni'isa tä ikänchi m'ayhay
hätet iwoye itäj tä y'uho,
hip'ohen hon'al lhäy'e nawaj,
wet hip'ohen hal'äy tä ihi tayhi,
wet letutsaj hätet iwoye
wejsuyhomtaj tä tiyäj kaphä.
19-20Tä Lhawuk tä lajit letumfwaya
iwo lewäka, honhat y'uho t'at,
wet wichi hätet iwoye hup
tä tamchäy tä itäj nichätho.
Hin'o tufw t'at leles t'isan,
wet hip'altsenhit'a lepuhfwa.
Elh teskanej lhäk, mat kamaj nichuyu t'at.
Elh t'ek, mat yip'isit'a.
21Wet wichi tä letes Manasés
lhäy'e wichi tä letes Efraín,
lhamel hätehlat iwoyek lhatufwen t'at,
wet äp lhaip'ajtitwek tä tatayhlä Judá.
Mat kamaj nofwit'a Lhawuk lewäk,
tujlhache t'at tä itiyej letasnhayaj häp wichi.
