Israel lhayis wuj tä yen lelhakliya m'ak tä iwoyeje lepuhfwas Benjamín laka wichi
1Israel lhayis pajche hit'unhatche lhämet tä iwoye tä ihi Mispa, wet yok:
–Ihichet'ala n'aelh chik häpe chik hiw'enho lhäse hin'o tä häpe Benjamín kawichi.
2Tä paj lhamel ihoye Betel wet lhaihutwek tä ihi tä tatache Dios pajtha honatsiyej. Wuj tä äytaj letichunhayaj, wet tafwchehchä wet yok:
3–Iwuk tä ahäpe Israel laka Dios, ¿chipte tä mälhyejtso olhamel owit'äyhyaj tä in'oyejen, wet athana tatäy iyhäj olhamel tä tälhe letes tä häpehen Israel lhayis?
4Tä fwala elh lhamel nechephä tä nech'e fwamlafwaj wet yenlhi altar. Wet ilänhen itshätäy wet iwunhomche yämthilek yen n'okhayajayej Lhawuk. Häte ilänhen iyhäj itshätäy wet hiw'enho Lhawuk yämthilek lha'isyene. 5Wet tay'ätshan lhamehen wet yok:
–¿Atsi n'aiyhäj tä nihoyaye n'aji wichi tä lhaihutej Lhawuk tä ihi Mispa?
Lhamel iwoynejetso lhämet tsi pajche hit'unhatche lhämet tä yok:
–Elh chik häpek nihoyaye iyhäj tä lhaihutej Lhawuk, is chik õ'län.
Atsinhay tä õhw'enho Benjamín laka wichi tä imälhehi
6Israel lhayis wuj tä yen tichunhayaja lepuhfwas Benjamín kawichi lewit'äyhyaj. Wet lhamel yok:
–Fwalana õ'lanhi iyhäj olhamel tä tälhe letes tä häpehen Israel lhayis. 7Wet athana, ¿atsi m'ak tä y'awoye yämthilek lech'efwas ihi häp Benjamín kawichi iyhäj tä imälhehi? Tsi pajche y'awoyeje Lhawuk häp ilhämet tä y'at'unhatche tä y'onajkwe, “Ihichet'ala n'aelh chik häpe chik hiw'enho lhäse hin'o tä häpe Benjamín kawichi.” 8Tä mälhyejtso, ¿hä iche kana n'aiyhäj chik newayejn'aj wichi tä lhaihutwek tä ihi tä Lhawuk tatache tä ihi Mispa?
Wet lhamel yok:
–Jabés tä ihi Galaad, tek wo elh chik ihoye naji wichi tä lhaihutwek chik tälhe häp honhattso. 9Tsi tä õ'wo lheyisa wichi tä tälhehen honhat lhipey iyhäj, lhameltso niwohit elh chik iyej naji.
10-11Tä mälhyejtso, nilhokej wichi lhamel ichen doce mil (12.000) sip'äl tä wuj tä takhajayhen yämthilek ilänhen wichi tä ihi Jabés, lhäy'e nä'tshas, lhäy'e atsinhay tä thänhäy. 12Wet iche cuatrocientos atsinhay tä kamaj niwoya lech'efwasa tä ihi Jabés. Wet lhamel ichäje lakasthawet tä ihi Silo tä ihi Canaán.
13Wet nech'e Israel lhayis ichen iyhäj yämthilek t'ukwe häp Benjamín kawichi tä ihi chenaj tä lhey Rimón. Wet yok:
–Noj lhaka'tshayaj. N'awo lhatamseka.
14Tä mälhyejtso, Benjamín kawichi iyhäjfwas tä imälhehi tapile lepuhfwas Israel lhayis. Wet lhamel hiw'enhomche atsinhay tä itälhte Jabés yämthilek yen lech'efwasa. Mat atsinhay w'awulhiyejt'a lhamel, tsi wujpe.
15Matche tä Israel lhayis hip'altsen häp Benjamín kawichi, tä Lhawuk itiyej kanhihlä lhamel wet tatäy. 16Wet häp Israel lhayis kathänhäy tay'ätshan lhamehen wet yok:
–¿Atsi m'ak tä y'awoye yämthilek y'anlhoke iyhäj atsinhay chik lech'efwasla häp hin'ol tä atsinhay niw'awulhayej? Tsi Benjamín ka'tsinhay nofwej t'at tä y'alänhen naji. 17Isit'ak tatäy Benjamín kawichi. Iche iyhäj tä imälhehi, is chik lhamel iwo lelesa häpkhilek nittäya iyhäj Israel lhayis chik tälhe lhamel. 18Mat n'amel y'ahanhiyejt'a y'awoyneje chik y'aw'enho lhales tsinhay. Tsi pajchenaj y'at'unhatche ilhämet tä y'awoye, wet elh chik niwoyaye is chik lewit'äyhyaj ihi. 19Mat lhek tetshan, y'anchäthiyela fwala tä wichi ihoye Silo yämthilek iwo käjyajayej Lhawuk, mälhyej lakey tä iwoye nekchämpej.
(Silo ihi Betel lhip tä tafwojhiye, häp n'äyij tä tiyäje Betel lhäy'e Sikem lhip tä tumej hichä. Wet äp ihi t'at Lebona lhip tä tapinhiye.)
20Tä mälhyejtso, Israel lhayis kaniyatey ichene lhämet häp Benjamín kawichi wet yok:
–Hoyaye häp n'olafwey tä uvas ihiche tä ihi Silo. Wet yej alen'älthen, 21mat is chik awak'alhen t'at. Chik lew'enlä atsinhay tä ihi Silo tä lhamel lhaihuttshi tä ikoy, nukwephä tä leweskathen wet elhpej tachuma atsinha yämthilek lhayen lewuka. Wet chik lekatejen, mähen, äple t'at amel aka honhates. 22Wet chik lajchalis wok lepuhfwas iho n'oyehen wet ne'tehlak olhamel otetshan täjtso, oyohlak, “Olhamel olhaip'altsen amehen, is chik letäyhtej letes lhamel. Tsi täjnaj olhamel owo oka'tshayajayej häp Jabés lheley, onlhokhiyet'a atsinhay tä w'awulhej lhamel. Wet tä ka'amelak lew'enho ales tsinhay, oyok is t'at, tsi tek ates ihihlä häp ämet tä pajche let'unhatche.”
23Tä mälhyejtso, Benjamín kawichi iwoye t'at, elh weihalhapej tachuma atsinha tä ikoy wet ichäj. Wet lhamel yäple laka honhates, wet yachajo tä yenwethä hupuy wet ihiche t'at. 24Häte iyhäj Israel lhayis yikhen, yäpnhomche laka honhates lhäy'e laka wichi.
25Häp fwalas p'antetso kamaj ihichet'a Israel lhayis laka rey. Wet häp tä elhpej iwoye t'at m'ak tä lham ihuminche.
