Wichi tä Canaán lheley tä kamaj imälhehi
1Häp tähesna wichi tä Lhawuk imälhthi häp honhat yämthilek yelhteje Israel lhayis tä kamaj newachehen p'ante tä lechätilis iwo laka'tshayaja'pe Canaán wet ikalhi. 2Lhawuk imälhthi wichina yämthilek Israel lhayis leles tä kamaj nhanayej chik iwo laka'tshayaja, lhaichufwenejen laka'tshayaj wet tatayhlä wichitso. 3Cinco Filisteo lhayis kaniyatey tä imälhehi, wet Canaán lhayis lhäy'e wichi tä lew'et Sidón lhäy'e Hiv lhayis tä nilhokej lhamel yen lew'eta chenhas tä Líbano, tälhe chenaj tä lhey Ba'al-hermón pajtha nichäte chenhas kawayhi tä ihi Hamat. 4Wichina häp tä Lhawuk t'uhläk yelhteje Israel lhayis, häpkhilek kalelhäj chik lhamel iwoye p'iya lham lhämtes tä pajche Moisés yachaje lhamel lechätilis.
5Tä mälhyejtso, Israel lhayis iyej t'at Canaán lhayis, Het lhayis, Amorreo lhayis, Ferez lhayis, Hiv lhayis, lhäy'e Jebús lhayis. 6Wet Israel lhayis leles, lhäy'e leles tsinhay, tewhayeyhen wet iyejwethä häp wichitso leles, wet n'okwiyej laka dios lhayis.
Otoniel ifwayhtej Israel lhayis häp Kusán-risataim
7Israel lhayis Lewuk Dios wuj tä y'ulhanej lhamel m'ak tä ni'isa tä iwoye. Lhamel hip'ethatlä häp lham wet n'okwiyej Ba'al lepeykas lhäy'e Astarté lepeykas. 8Häp tä tamenej tä Lhawuk itiyej lewäk lhamel wet nemhit tach'ote. Wet niyat tä lhey Kusán-risataim tä ihi Mesopotamia ikalhi lhamel. Wet ocho nekchämis tä niyatej lhamel, 9pajtha lhamel lhaip'altsene Lhawuk. Wet nech'e iche hin'o yämthilek ifwayhtej lewit'äyhyaj. Häp hin'ona lhey p'ante Otoniel, Kenaz tä Caleb lech'inij häp tä lhäs. 10Wet Lhawuk laka Espíritu iho'pe häp hin'otso wet lhayen niyata. Wet lham lhäy'e Israel lhayis lhamel yikhen tä iwo laka'tshayaja, wet Lhawuk tach'ote lhamel wet lhamel ikalhi Kusán-risataim. 11Tä tajyäme täjtso, cuarenta nekchämis tä letamsek ihi t'at wichi tä ihi honhat.
Ehud ifwayhtej Israel lhayis häp letayhfwas tä ihi Moab
Tä Otoniel ileyej p'ante honhat, 12Israel lhayis yachajo tä iwoye m'ak tä ni'isa. Wet Lhawuk hiw'enho lakhajyhayaj häp niyat tä ihi Moab tä lhey Eglón yämthilek inu'pe lhamel. 13Eglón ne'tep'antek Amón lhayis lhaip'ajtej, lhäy'e Amalek lhayis, wet lhamel inuye p'ante Israel lhayis wet isoyej hupuy tä lhey Fwitsukwat. 14Wet Eglón niyatej lhamel dieciocho nekchämis, 15pajtha lhamel lhaip'altsene Lhawuk. Wet nech'e äp yachajo tä iche hin'o tä ifwayhtej letayhfwas häp lhamel. Häpe p'ante hin'o tä tats'am, wet lhey Ehud, Gera lhäs tä häpe Benjamín laka wichi.
Ifwala elh p'ante Israel lhayis ichene chinaj t'äj tä tiskanejpe häp impuestos tä Eglón t'alhe'pe. Wet lhamel itshupyene Ehud yämthilek yikchufwi chinaj t'äj. 16Tä mälhyejtso, Ehud yenlhi laka tsonhat tä lhayhil nitäkw wet medio metro tä pitaj. Tä lham yik, y'uyitchufwi lakay'uche tä itumtej lhip tä lefwomkat wet inayhtejpe lakawak. 17Tä wak'alh, nech'e yik tä ihäne Eglón häp chinaj t'äj. Wet Eglón häpe niyat tä lhäy'e lhip tä yätaj. 18Tä Ehud nichäte, yachaje chinaj t'äj wet yikch'oye, lhäy'e iyhäj tä nekche. 19Matkat tä nichäte n'ocheyälis tä tuntey tä iwhäye Gilgal, lham Ehud yäple Eglón. Tä nichäte, tahuyej wet yok:
–Iwuk, iche m'ak tä ofwel amho. Is chik ts'ilak olham lhäy'e am yämthilek ohanhat amej.
Tä mälhyejtso, niyat ne'tek lakawos yikch'oye lhamel. 20Wet tä Ehud lhäy'e Eglón ts'ilak lhamejen tä ihi niyat lewukwech'o elh tä techäj, wet Ehud ihowhäye wet yok:
–Iwuk, häp n'olhämet tä ochäj ame tälhe Dios.
Tä Eglón iläte Ehud tä iwoyetso, lham nephä tä tatayphä. 21Matkat tä Ehud häpe hin'o tä tats'am, tachuma laka tsonhat tä tumej lhip tä lefwomkat wet itshänejo Eglón lets'e. 22Wet tafwayej lew'ut tsi häpe hin'o tä lhäy'e lhip tä yätaj. Wet Ehud itonhihit'a, tä mälhyejtso tsonhat imälhehi t'at. 23Wet Ehud hip'ohiche lepelis, ithatho llave wet nech'e tiyäjche ventana. Tä inuphä, wet yik.
24Tä tajyäme, nech'e nämhen lakawos. Mat tä hiw'en tä õhp'ohiche lepelis, lhamel yenek laka niyat t'alham. 25Matkat tä lhamel hiw'en tä pajlä chik inuphä, nech'e nilhak'alwethä. Tä mälhyejtso, lhamel tachuma llave wet ifwoyenche lepe wet tiyäj lech'oye. Wet lhamel hiw'en laka niyat tä ihonhate wet y'il.
26Tä lhamel kamaj nitiyäja lech'oye, Ehud pajche yik. Wet tä tafwayej n'ocheyälis tä iwhäye Gilgal, ilethane honhat tä lhey Seirat. 27Tä nichäte p'ante honhat tä Israel, iho'pe chenaj tä ihi lhip tä lewuk Efraín kawichi. Wet yafwutche laka tson'ataj ch'u tä t'äne Israel lhayis, wet lhamel lhaihutwek. Tä wak'alh m'ak tä lhamel iwoye, nech'e nilhokej inuhchä tä tälhpe chenaj wet Ehud ichunlä lhamel. 28Wet tahuyej lhamel wet yok:
–¡Mäh n'ekhen, Lhawuk yachaj amehen atayhfwas Moab lhayis yämthilek lelänhen!
Wet lhamel yikche Ehud. Tä nichäte tewok Jordán lhipey tä n'olhijtshanw'etes, wet ihiche tä t'uye, wet tek iwahinche elh chik fwetaj inukwe. 29Wet häp lewhäytso Israel lhayis ilänhen diez mil wichi tä lew'et Moab, häp sip'äl tä takhajayhen. Wet niwohit elh chik imälhehi, nofwej tä Israel lhayis ilänhen.
30Mälhyejtso tä Israel lhayis ikalhi p'ante wichi tä Moab lhayis. Wet tä tajyäme täjtso, ochenta nekchämis tä letamsek ihi t'at wichi tä ihi honhat.
Samgar ifwayhtej Israel häp Filisteo lhayis
31Tä tajyäme Ehud, iche niyat tä lhey Samgar, häp Anat lhäs. Tä iwo laka'tshayaja, ichäjlhi hal'ä tä õ'tshänejlhi weyis wet häp tä ilänejen seiscientos Filisteo lhayis, wet ifwayhat Israel lhayis.
