Jue 4

₁Tä Ehud ileyej p'ante honhat, Israel lhayis yachajo tä iwoye m'ak tä ni'isa. ₂Tä mälhyejtso, Lhawuk nemhit tach'ote, wet Canaán lhayis kaniyat tä lhey Jabín tä lew'et hupuy tä Hasor ikalhi lhamel. Laka sip'äl kaniyat lhey Sísara wet lew'et Haroset-goyim. ₃Jabín hiw'en p'ante novecientos (900) kaletas tä chinhas tä laka'tshayajchal, wet veinte nekchämis tä yäm äytajche m'ak tä itiyej Israel lhayis. Tä lepese lhamel lhaip'altsene Lhawuk yämthilek tach'ote.

₄Wet häp fwalastso iche niyat tsinha tä lhey Débora tä iyej Israel lhayis. Lham häpe profeta wet lech'efwa lhey Lapidot. ₅Wet häp Débora yen keya tä tatayphäpej tä ichufwi fwitsuk tä õyen lheya Débora Kafwitsuk tä ihi chenhas tä ihi honhat tä lewuk Efraín kawichi. Wet hupuy tä lhey Ramá tumej lhip elh, wet hupuy tä Betel tumej lhip elh. Wet Israel lhayis ihoyepej Débora yämthilek ikalelhtho elhpej chik häpe m'ak tä yen lelhakliya.

₆Fwala elh p'ante Débora iwo chenekaye hin'o tä lhey Barac, häp Abinoam lhäs, tä lew'et Kedes tä ihi honhat tä lewuk Neftalí kawichi. Wet ifwenho tä yok:

–Lhawuk, Israel laka Dios, ne'tek lewoye täja wet yok, “Hoye chenaj tä lhey Tabor, wet hutwek diez mil hin'ol tä Neftalí kawichi lhäy'e Zabulón kawichi. ₇Wet yok, Olham ohänla ame Sísara, häp Jabín kanifwotaj kaniyat, chik lhewhäye tewok tä lhey Kisón. Nekhichela nilhok laka nifwotaj lhäy'e laka'tshayajchal tä kaletas tä chinhas, yämthilek lhamel tatay ahilähen. Mat olham oyachajila amehen.”

₈Barac nichulhche Lhawuk lhämettso wet ichene lhämet Débora wet yok:

–Chik am lenek n'okwe, owohiyela. Mat chik kaneka n'okwe, owohiyet'a.

₉Débora nichulho wet yok:

–Is t'at, oyikhila amche. Mat tä mälhyejtso, tej chik lekalhi lhatayhfwas, mat amhit'alak wichi aiwujyen. Tsi atsinhahlak Lhawuk yachaje Sísara yämthilek ilän.

Wet Débora yikche Barac wet lhamel ihoye häp Kedes. ₁₀Tä nichäte, wet Barac t'äne Zabulón kawichi lhäy'e Neftalí kawichi, wet ihutwek diez mil sip'äl tä yen laka nifwotaja. Wet Débora yikche t'at häp lhamel.

₁₁Wet fwalas p'antetso iche hin'o tä lhey Heber, häp Ken lhayis elh. Lham lhaiw'enhatej iyhäj laka wichi tä tälhe Moisés kachäti tä lhey Horeb. Wet yik tä ihoye Saanaim tä tott'aye Kedes wet itiwhäye lew'et hal'ätaj.

₁₂Wet tä Sísara ihanch'oye tä Barac tiyäjpe chenaj tä lhey Tabor, ₁₃lham ihutwek kaletas tä chinhas tä laka'tshayajchal, novecientos (900) lhamel, lhäy'e nilhokej laka nifwotaj. Wet lhamel yikhen tä tälhe häp Haroset-goyim pajtha nichäte tewok Kisón. ₁₄Wet Débora nech'e tahuyej p'ante Barac wet yok:

–¡Mäh, tsi Lhawuk ichun ahilä wet fwalana yachaj ame Sísara!

Tä mälhyejtso, Barac lhäy'e diez mil laka sip'äl lhamel inukwehchä tä tälhpe chenaj Tabor. ₁₅Tä nichäte tä letayhfwas ihi, Lhawuk istun häp yel'atas tä iton kaletas tä lewuk Sísara, lhäy'e laka nifwotaj tä lhamel nichutej häp Barac kanifwotaj. Wet häte lham Sísara inuhchä tä ihi lehi kaletaj wet inu alhoho. ₁₆Wet Barac lhäy'e laka nifwotaj ihän letayhfwas tä inukwe alhoho, lhäy'e kaletas, pajtha nichäte Haroset-goyim. Fwalatso y'inhen nilhokej, niwohit elh chik imälhehi häp Sísara kanifwotaj.

₁₇Häp niyat Jabín tä lew'et Hasor yenhit'a letayhfwaya häp hin'o tä oyämetso tä lhey Heber, häp Ken lhayis elh. Wet häp tä tamenej tä Sísara tä ilethanlä letayhfwas tä lham inu alhoho, ihoye p'ante Heber lech'efwa tä lhey Jael lewukwe tä tsänt'äj. ₁₈Wet atsinhatso ihohlä wet yok:

–¡Lhuu iwuk, hochufwi owukwe! ¡Yej noway!

Tä mälhyejtso, Sísara tiyäjchufwi lewukwe wet Jael iskat, hip'oyejpe wesaj. ₁₉Wet Sísara tahuyej atsinha wet yok:

–W'en n'oho inät, wuj tä ochim.

Wet Jael tachuma itshäwet kat'os tä ihi lehi, wet hiw'enho wet iyäyej. Tä ileyej, yachajpe wesaj tä hip'oyejpe. ₂₀Wet Sísara äp tahuyej wet yok:

–Ehi t'at lepe, wet chik iche elh chik näm, chik yok, “¿Hä iche hin'o tä ikana?”, olak, “Kha, ihichet'a.”

₂₁Matkat tä lhäy'e lhip tä y'el häp Sísara, imä, nahati wujej. Wet Jael ilanhi chinaj tä itselhäj tä carpa t'ak, wet tachuma n'okäjnhat, wet ichowalhe Sísara tä imä, wet ikäjejo t'asilis pajtha chinaj tiyäjo honhat. Wet y'il häp Sísara.

₂₂Tä paj näm Barac tä t'ukwe Sísara. Tä nichäte Jael lew'et, wet Jael ihohlä wet tahuyej wet yok:

–Lhuu, opäyen ame hin'o tä let'ukwe.

Barac tiyäjchufwi lewukwe wet hiw'en Sísara tä it honhate, pajche y'il t'at, wet chinaj tä itselhäj tälho t'at lhetek.

₂₃Mälhyejtso tä Lhawuk tach'ote p'ante Israel lhayis wet lhamel ikalhi Canaán lhayis kaniyat Jabín. ₂₄Tälhe fwalastso lhamel wuj tä itiyej m'ak tä äyteschehen häp Jabín, pajtha lhamel itäyhat.