Débora lhäy'e Barac letenek
1Fwalatso Débora lhäy'e Barac, Abinoam lhäs, lhamel ichoywethä, iten letenekna wet yok:
2“¡Wunitay Lhawuk,
tsi kamaj iche t'at hin'ol tä iyej Israel lhayis
tä lhaiwaklhathen chik iche n'oka'tshayaj!
¡Kamaj iche t'at hin'ol tä in'amejen
tä ifwunhiyejt'a n'oka'tshayaj!
3¡Ch'ahuyay n'oye, amel tä wichi alaka niyatey!
Owo otenekayej Lhawuk,
owo otenekayej häp Israel laka Dios.
4“Tä am, Iwuk, lhek tä letälhe Seír,
häp honhat tä ihi Edom,
honhat w'ahu t'at, wet pule lhaiw'enhathen,
wet nitsäyhchä inät.
5W'ahuye chenhas tä ihi tä Israel laka Dios tatache,
häp Lhawuk tä lhain'älit p'ante tä i'pe Sinaí.
6Häp ifwalas tä Anat lhäs tä lhey Samgar ihi p'ante,
lhäy'e ifwalas tä Jael ihi,
wichi nemhit inukwehen n'äyhäy tä tseschehen,
mat tiyäjchehen n'äyhäy tä takotsochehen.
7Israel lhayis yikch'oye lew'etesas, iwomlhi t'at,
pajtha olham Débora onephä,
olham tä ohäpe Israel lhayis lako.
8“Wichi ileyej p'ante Lhawuk,
wet yen laka dios lhayisa m'ayhay tä kamatachehen.
Nämhen letayhfwas wet iwo laka'tshayaja,
mat ihichet'a tefwajni n'ohun wok n'ofwamthi
chik iyej cuarenta mil (40.000) Israel lhayis.
9“¡Okäjejlhi t'at Israel lhayis kaniyatey
lhäy'e wichi tä nifwunayej n'oka'tshayaj!
¡Lewujyaj ihi Lhawuk!
10“Amel tä lheche'pe asnolis tä ipelaschehen,
lhäy'e amel tä letatachephä'pe ahowetes,
enay atichunhayaja,
häte amel tä let'äsche honhat.
11Lhek ch'ahuyaye lechos
iyhäj tä ichoywethä tä iwhäye n'opekis.
Lhamel yen teneka m'ak tä ische alhoho tä Lhawuk iwoye,
lhäy'e m'ak tä laka wichi iwoye
tä ikalhi letayhfwas.
12“¡Akhajyen, Débora, akhajyen!
¡Otle t'un, ten n'otenek!
¡Am Barac, Abinoam lhäs, nephä,
mächufwi hin'ol tä lhäythen!
13“Eh wet inunajchä Israel lhayis tä tälhpe chenaj
yämthilek inuye nifwotaj tä takhajay.
Lhawuk laka wichi iho n'oye
yämthilek tatayhlä wichi tä iwo laka'tshayajayej.
14Iyhäj Efraín kawichi inuhchä tä tälhpe chenaj
wet inukwe lakawayhi,
wet Benjamín kawichi imälheche len'äyij.
Maquir lhayis ichene laka niyatey,
wet äp nämhen Zabulón kawichi tä len'ohyaj ihi.
15Häte Isacar kawichi kaniyatey yikche Débora,
wet Isacar ikhajyen t'at häp Barac.
Tsi imälheche len'äyij tä inukwe
chenhas kawayhi tä iwo laka'tshayaja.
“Mat chik ichehen hin'ol tä lehusey wak'alh t'at
tä iyej Rubén kawichi,
16¿chipte tä letakasthen t'at
tä lhehi tson'atas lehis,
wet letach'ahuyaye tson'atas lewos
tä t'änehen leläy?
¡Iche t'at hin'ol tä t'otle t'unhihent'a
tä iyej Rubén kawichi!
17Gad kawichi imälhe Jordán lhip elhe,
letamsek ihi t'at,
wet Dan lhayis, ¿chipte tä imälheyej barcos?
Aser kawichi imälhehi lewomekitaj lhip,
wet letamsek ihi t'at tä ihi barcos kasthawetes.
18Matkat Zabulón lhayis
lhäy'e Neftalí kawichi,
lhamel nowayhit'a letapehen
tä iwo laka'tshayaja.
19“Nämhen niyatey,
häp Canaán lhayis kaniyatey.
Lhamel ihoye Taanak
tä iwhäye inät lhayis tä ihi Meguido,
wet tatayhlä Israel.
Mat niwohit m'ak chik lhamel ikatej.
20Katetsel tä ipuleye iwo laka'tshayaja.
Tä ihiche lew'etes lhamel tatay'atlä Sísara.
21Häp tewok Kisón tä pajche tä iche,
iläfwelche wet ichäj lhatayhfwas wet hich'ahen.
¡Ihusek, yej takasit mat tujlhache t'at!
¡Tsi akhajyhayaj ihi t'at!
22“¡Yel'atas lepach'ol,
äytaji lepak tä inukwe alhoho,
yikhen t'at tä tiyäjche len'äyij!
23Wet Lhawuk laka ángel yäme wet yok,
¡Is chik äytaj lewit'äyhyaj chik nichätpe Meroz
lhäy'e wichi tä ihi!
Tsi tek tach'ote Lhawuk,
tek lhaip'ajtej hin'ol tä takhajayhen.
24“¡Dios lakäpfwayaj i'amej, Jael,
tä ahäpe Heber tä Ken lhayis elh lech'efwa!
¡Dios lakäpfwayaj i'amej
tä lhewej atsinhay iyhäj
tä yen lew'eta carpas!
25Sísara t'alhch'oye inät
wet Jael hiw'enho itshäwet kat'os.
Hiw'enho lhip tä isop'anhi
tä ihi lehi tä isilataj.
26Wet tachuma chinaj tä itselhäj
tä yäytej laka carpa t'ak.
Ilanhi wet itihi takwey tä lets'amkat,
wet n'okäjnhat ihi takwey tä lefwomkat.
Ichowalhe Sísara tä imä,
wet y'ajej lhetek wet ipofwo.
Ikäjejo t'asi häp chinaj
tä itselhäj tä ichäjlhi.
27Sísara nichätwhäye
Jael käläy tä nich'olelhi,
wet y'il.
28“Sísara lako nilhak'alhi
tä niteläjlä häp lhäs,
wet iyahinche laka ventana wet yok,
¿Chipte tä ninäma lehi kaletaj?
Tafwaype lewhäy tä näm tä tälhe laka'tshayaj.
29Atsinhay tä atäfwnhatses tä iyej nichulho,
wet Sísara lako yachajopej tä yok,
30Ey'a, oyenek m'ak tä tamenej tä ninäma olhäs,
elat nahayej tä hiw'enhomche laka sip'äl
häp m'ak tä lewuk wichi tä lhamel ilänhen.
Hiw'enhatejen lhamel häp atsinha lhutshay tä lakwenkay,
wet lham Sísara hiw'enhat lhamej wesas tä isis,
häp wesas tä õ'lesaynhiche,
häp tä iti lhamej
tä isoyej lhamel tä ilänhen.
31“¡Iwuk, is chik mälhyej'attso
tä tatäy nilhokej atayhfwas!
Wet wichi tä aihumin,
is chik mälhyej at iwoye ifwala tä isi.”
Tä tajyäme täjtso, cuarenta nekchämis tä letamsek ihi t'at wichi tä ihi honhat.
