Lhawuk ne'tek Gedeón ichenhen iyhäj nifwotaj
1Gedeón, tä nech'e õyen lheya Jeruba'al, lhäy'e nilhokej hin'ol tä iyej, lhamel nechephä tä nech'e fwamlafwaj wet yikhen. Tä nichäte inät tä ihi lhip tä lhey Ochettiche, lhamel iwo lew'etawhäye. Wet Madián lhayis lhamel iwo lew'eta tä tumej tafwojhiye, lhip tä iwhäye chenaj tä ihi Moré.
2Wet Lhawuk tahuyej Gedeón wet yok:
–Lhek yahinya wujpey wichi tä nek amche. Chik mälhyejtso, wet chik oyachajila ame häp Madián lhayis yämthilek Israel lhayis ikalhi, lhamel lhaichäjlawethä wet fwetajla lhamel t'at tä is lhamej wet tafwayej letayhfwas. 3Tä mälhyejtso, fwenho wichi, Elh chik ilät lhame tä noway, is chik yäpil.
Wet Gedeón iwoye, ifwenho laka nifwotaj tä iyej wet yok:
–Elh chik häpek iläte tä t'otle nit'una, is chik yäpil.
Tä mälhyejtso, iche veintidós mil (22.000) sip'äl tä yäpil, wet imälhehi diez mil (10.000).
4Matkat Lhawuk yachajo tä tahuyej Gedeón wet yok:
–Kamaj wujpey aka sip'äl. Athana häne lhip tä inät ihi wet lhamel iyähihena. Wet olhamlak otetshan, wet opäynhila ame iyhäj tä yikhila amche lhäy'e iyhäj tä is chik yäpil.
5Tä mälhyejtso, Gedeón ihäne lhip tä inät ihi yämthilek nilhokej iyähen. Wet Lhawuk tahuyej Gedeón wet yok:
–W'enhat iyhäj tä ihäne takwech'o inät tä itsäylhaye lak'aj wet hätet iwoye asinäj tä iyä. Wet äp w'enhat lhamel tä lakamchetey itiyeji honhat tä hits'uhi.
6Tä mälhyejtso, iche trescientos häp lhamel tä ihäne takwech'o tä itsäylhaye lak'aj inät. Mat nilhokej iyhäj lakamchetey itiyeji honhat tä hits'uhi. 7Wet Lhawuk tahuyej Gedeón wet yok:
–Häp trescientos hin'olna, häpkhilek otch'ote yämthilek ifwayhthen Israel lhayis wet ikalhi Madián lhayis. Mat häp iyhäj, is chik lhamel yäpil t'at.
8Tä mälhyejtso, Gedeón ne'tek nilhokej iyhäj yäpnhomche lew'etes. Mat chunkat õ'soyejwethä lhäkwey lhäy'e lefwolis tä tson'ataj ch'ul tä iyejwethä. Wet nech'e ts'ilak iyhäj tä imälhehchä, wet lhamel iho'pe chenaj tä atojphä wet Madián lhayis ilech'oye tä ihi lakawayhi.
Dios ihantej Gedeón tä kalelhäj tä ikalhihila Madián lhayis
9Häp honatsitso Lhawuk tahuyej Gedeón wet yok:
–Nephä, mäh nuye häp Madián lhayis, tsi olham oyachaj amehen. 10Mat chik kamaj lenowaye lhamel, nuhchä, äy'e akawo Fura, wet hoye lhamel tä ihi lhip tä lhaihuthiwek. 11Wet leläthiyela lhamel lhämtes tä yämwethä, häpkhilek nem lenoway yämthilek lenuye lhamel.
Tä mälhyejtso, Gedeón lhäy'e lakawo Fura lhamel inukwehchä tä tälhpe chenaj wet nichäte lhip tä letayhfwas ihi. 12Wet häp Madián lhayis lhäy'e Amalek lhayis, lhäy'e wichi tä lew'et hichä, nilhokej lhamel tapoyej lakawayhi, hätet iwoye chol tä wuj tä i'pe honhat. Wet wujpey leläy camellos, hätet iwoye holo tä iwhäye tewok. 13Tä Gedeón nichäte lhip tä lhamel ihi, wet iläte elh sip'ä tä yäme lefwilhek, wet yok:
–Lhek tetshan, otfwilhanne, ow'en pan tä häpe cebada tä nich'olekwe honhat pajtha nichäte t'at lhaw'etna, wet n'owukwe tä tsänt'äj tä taj nichät katsi.
14Tä elh iläte, wet nichulho wet yok:
–¡Täjtso häpe t'at Gedeón lefwajnhat, lham tä häpe Joás lhäs, Israel kanifwotaj kaniyat! ¡Dios yachaje t'at lham häp Madián lhayis lhäy'e imälhewek nifwotajna!
15Tä Gedeón iläte hin'o tä yäme lefwilhek, lhäy'e m'ak tä häpe, lham iwunit Lhawuk. Wet yäple lhip tä Israel lhayis ihi wet yok:
–¡Mähen! ¡Lhawuk hiw'en n'amhohen Madián lhayis!
Gedeón ikalhi Madián lhayis
16Wet Gedeón hiw'enhathen laka nifwotaj, itihipej cien tä hiw'enhat iyhäj. Wet hiw'enhomche lefwolis tä tson'ataj ch'ul lhäy'e lhäkwey tä n'ochäkwis tä y'uhomche ihiche. 17Wet tahuyej lhamel wet yok:
–Chik olham onchäte lhip tä lhatayhfwas ihi, yahinayla m'ak tä owohiyela wet tenaylan'o. 18Chik olhamel oyafwutchehen ofwolis, häte amel tä lelunej lhamel afwutchehen afwolis wet änhen, oyaykwe, “¡Lakhajyhayaj ihi Lhawuk, lhäy'e Gedeón!”
19Wet mälhyejtso tä Gedeón lhäy'e cien laka sip'äl tä yikche, lhamel nichäte lhip tä Madián lhayis ihi. Wet lewhäytso lhamel iwo iyhäja sip'äl tä t'uye tä nichäte tä honaj chowej. Wet Israel lhayis yafwutchehen lefwolis wet y'ajomche lhäkwey tä ichäjwethä. 20Wet nilhokej iyhäj tä ilunej, lhamel häte iwoye täjtso. Wet nech'e ichäjiwethä takweyey tä lets'amkat häp lechäkwis tä y'uhomche, wet lefwolis ihi takweyey tä lefwomkat. Wet t'änhen tä yok:
–¡Lakhajyhayaj ihi Lhawuk lefwajnhat, lhäy'e Gedeón lefwajnhat!
21Wet lhamel ihichet tä ihiche tä ilunej letayhfwas, wet nilhokej Madián lhayis kanifwotaj tä wuj t'änhen wet inukwe alhoho. 22Wet trescientos Israel lhayis ilehiyejt'a tä yafwutchehen lefwolis, wet Lhawuk nech'e itayhetwek Madián lhayis wet lhamel t'at tä lhailänejen lefwajnhates. Wet inukwe alhoho pajtha nichäte Bet-sita tä ihi n'äyij tä tataye Serera, wet pajtha nichäte Abel-mehola lhip tä iwhäye Tabat.
23Tä mälhyejtso, Gedeón iwo chenekaye Neftalí kawichi lhäy'e Aser kawichi lhäy'e Manasés kawichi, yämthilek lhamel ihänwethä Madián lhayis. 24Häte iwo chenekaye Efraín kawichi tä ihi chenhas wet yok:
–¡Mähen, nuhchä amel wet tayhlä Madián lhayis! ¡Uyehen n'olhijtshanw'etes tä ihi tewok Jordán pajtha lechätaye lhip tä Bet-bara, yämthilek laj len'äyija Madián lhayis tä fwetaj yikhen!
Tä mälhyejtso, Efraín kawichi iwoye, 25wet itsokwethä Madián lhayis kaniyatey, elh lhey Tsetwo wet elh lhey M'awotaj. Wet lhamel ilän Tsetwo tä i'pe chenaj tä fwalasna õyen lheya Tsetwo Kachenaj. Wet ilän M'awotaj tä ihi lhip tä lhey iyej, häpe t'at lhip tä õt'äsi uvas tä õyen hat'esa. Wet tä lhamel ileyej tä takähännhej Madián lhayis, wet lhamel ihäne Gedeón tä tumej Jordán lhip elh häp Tsetwo lhetek lhäy'e M'awotaj lhetek.
