Gedeón itsokwethä Madián lhayis laka niyatey wet ilänhen
1Efraín kawichi tawäkwäywethä, wet tahuyej Gedeón wet yok:
–¿Chipte tä ka'äna n'oyehen tä lewo aka'tshayajayej Madián lhayis?
2Mat Gedeón nichulho lhamel wet yok:
–¿Hä tek lehanayej m'ak tä amel lewoyaye tä inu'pe m'ak tä olham owoye? Tej tä niwuja m'ak tä amel lewoyaye, mat laha inu'pe m'ak tä olham owoye. 3Tsi Dios yachaj amehen Madián lhayis kaniyatey, Tsetwo lhäy'e M'awotaj. Mat m'ak tä olham owoye w'awulhihit'a täjtso.
Tä Efraín kawichi iläte Gedeón, lhamel ileyej tä nichuwete.
4Wet Gedeón nichätho tewok Jordán wet yistho, lhäy'e trescientos sip'äl tä iyej. Tej tä wuj tä y'enhen, mat ilehiyejt'a tä takähännhej letayhfwas. 5Tä nichäte hupuy tä lhey Sukot, wet Gedeón lhaip'altsene wichi tä ihi wet yok:
–Woye tä owoye, w'enho m'ak chik tufw häp oka sip'äl. Tsi lhamel wuj tä y'enhen, häp tä olhamel otkähännhej Madián lhayis laka reyes, häp Zeba lhäy'e Salmuna.
6Matkat niyatey tä ihi Sukot nichulho wet yok:
–¡Tajlhamat chik amel lesakanayej Zeba lhäy'e Salmuna, häpkhilek nech'e ow'enla amhohen m'ak chik letufw!
7Tä Gedeón iläte, wet yok:
–¡Chik Lhawuk hiw'en n'oho häp Zeba lhäy'e Salmuna, otpinla amehen wet owasthiyejichela asanis ch'uthanil lhäy'e amlhäj lhawayuk!
8Wet lhamel yikhen, ihoye hupuy tä Penuel. Tä nichäte wichi tä ihi, lhamel lhaip'altsene wet yok:
–Woye tä owoye, w'en n'ohohen m'ak chik otufw.
Matkat wichina lhämet hätet iwoye iyhäj tä ihi Sukot. 9Wet Gedeón tahuyej lhamel wet yok:
–¡Chik okalhi otayhfwas, otpinla alhoho wet owasthihila hup tä atojphäni!
10Wet Zeba lhäy'e Salmuna, lhäy'e quince mil (15.000) laka sip'äl, lhamel ihi honhat tä lhey Karkor. Häpe nifwotaj tä lew'et tumej hichä iyhäj tä imälhehi, mat häp iyhäj tä ciento veinte mil (120.000) nofwej tä y'inhen. 11Wet Gedeón lhäy'e laka sip'äl lhamel inukwe n'äyij tä ifwache ts'anis, tumej Noba lhäy'e hupuy tä lhey Atojphä lhip tä tumej hichä. Wet tä nichäte letayhfwas, lhamel iselkat tä inuye, tsi Madián lhayis tek yenek nämla Israel lhayis. 12Wet rey Zeba lhäy'e elh tä lhey Salmuna, lhamel yikhen tä inukwe alhoho, fwetaj ilethanhen. Matkat Gedeón ihänwethä wet itsokwethä. Wet tä laka nifwotaj hiw'en laka reyes tä õ'sakanejen, lhäy'e lhip tä nowayhen.
13Tä Gedeón ileyej tä iwo laka'tshayaja, lhamel yäpil, inukwe n'äyij tä tiyäjche chenhas kawayhi tä ihi Heres. 14Wet näm mamse, wet lhamel itsoklhi wet tay'ätshane tä yok:
–¿Atsi hupuy tä haw'et?
Wet mamse yok:
–Sukot.
Wet lhamel tay'ätshaneje häp hin'ol tä häpehen niyatey tä ihi Sukot. Wet mamsetso ilesayen lhamel lheyis, lhäy'e hin'ol tä thänhäy lheyis, setenta y siete lhamel. 15Wet Gedeón lhäy'e laka sip'äl lhamel yikhen tä ihoye Sukot. Tä lhamel nichäte, tahuyej hin'ol wet yok:
–¿Hä letichunache ämet tä äytajche tä lhoyaynajkwe, “Chik lesakanej Zeba lhäy'e Salmuna, nech'ehilak ow'en amhohen m'ak chik letufw”? ¿Hä letichunache tä kaw'enayahonaj lhäk oka sip'äl, tä lhamel wuj tä y'enhen? ¡Lhek yahin, ikana Zeba lhäy'e Salmuna!
16Wet Gedeón nech'e tachuma ch'uthanil lhäy'e amlhäj lhawayuk, wet itasnejwethä häp hin'ol tä thänhäy lhäy'e niyatey tä ihi Sukot. 17Häte iwasthi hup tä atojphä tä ihi Penuel, wet ilänhen wichi tä lew'et hupuytso.
18Wet nech'e tay'ätshane rey Zeba lhäy'e rey Salmuna wet yok:
–¿Chin'aj mälhyej t'isan häp hin'ol tä amel lelänhen tä ihi Tabor?
Lhamel nichulho wet yok:
–Tet iwoye am. Elhpej tet iwoyek niyat lhäs t'at.
19Wet Gedeón yok:
–Häpehen opuhfwas. ¡Opuhfwas tä oko leles tä amel lelänhen! ¡Oyäm matche olhämet, mälhyej tä Lhawuk iläy, oyok, Chik amel kalänhiyahen n'aji, häte olham tek olänhihenn'e amel athana!
20Tä ileyej tä iwoyetso, tahuyej lhäs tä thaläkw tä lhey Jeter, wet yok:
–¡Länhen!
Matkat tä Jeter kamaj häpe elh tä mamse t'at, t'otle t'unhit'a, häp tä tamenej tä tek itonhi lefwajnhat. 21Tä mälhyejtso, Zeba lhäy'e Salmuna tahuyej Gedeón wet yok:
–Is chik am tä lelänhen olhamel, chik ahäpe hin'o tä t'otle t'un.
Tä mälhyejtso, Gedeón yike wet ilänhen. Wet tachuma m'ayhay tä isis tä yäytejen camellos tä lew'utey lew'ol. 22Wet Israel lhayis tahuyej Gedeón wet yok:
–Tä am lefwayhat n'oyejen Madián lhayis, olhamel ot'uhläk am lhäy'e ales häpehen t'at oka niyatey.
23Mat Gedeón nichulho wichi wet yok:
–Olham lhäy'e oles tek olhayenla niyata amejen. Lhawuk häpkhilek amel aka Niyat. 24Tajlhama, ot'alhej amehen chik lew'en n'oho n'och'ote lheley tä amel letachumahen tä lewuk lhatayhfwas.
Häp n'och'ote lheleytso häpe oro tä ihiche lech'otey sip'äl tä Israel lhayis letayhfwas, mälhyej lakey wichi tä lew'et ts'anis.
25Wet Israel lhayis nichulho Gedeón wet yok:
–Is t'at, olhamel ow'enla amho.
Wet hich'en katsi wesaj wet iskonpe nilhokej n'och'ote lheley tä pajche tachumahen. 26Wet iche diecinueve kilos häp n'och'ote lheley tä oro. Wet häte iche m'ayhay iyhäj tä isis, lhäy'e wesas tä isis tä Madián lhayis laka reyes lew'uyis, lhäy'e m'ayhay tä õyäytejen camellos lew'ol. 27Wet Gedeón yenejlhi efod häp orotso, wet itihi lew'et tä lhey Ofra. Wet häp efodtso tamenej nilhokej Israel lhayis tä ileyej häp Lhawuk, wet häte tamenej Gedeón lhäy'e lew'et lheley tä wetayej m'ak tä is alhoho.
Gedeón ileyej honhat
28Mälhyej p'antetso tä Israel lhayis ikalhi Madián lhayis, wet nemhit iche ifwalak lhamel fwetaj iwoye m'ak chik häpe. Pajtha cuarenta nekchämis tä letamsek ihi t'at wichi tä ihi honhat tä kamaj iläy Gedeón.
29Gedeón ihi t'at honhat tä lew'et, 30wet iche setenta leles tsi wujpey atsinhay tä lech'efwas. 31Wet häp atsinha tä iyej tä ihi Sikem häte iwo lhäsa, wet Gedeón yen lheya Abimelec. 32Wet Gedeón ileyej honhat tä häpe hin'o tä hich'ut t'at. Wet õ'tihi lajcha Joás p'itsekw'et tä ihi Ofra, häp Abiezer leles tä lepes lheley lew'et.
33Wet tä y'il p'ante Gedeón, Israel lhayis yachajo tä ileyej Lhawuk wet n'okwiyej Ba'al lhayis, häp dios lhayis tä kamatachehen. Lhamel tatshupiye Ba'al-berit wet yen häpeya laka dios, 34wet hip'ethatlä Lhawuk tä laka Dios tä ifwayhtejpej letayhfwas tä wujpey. 35Wet lhamel ileyej tä yen tichunhayaja m'ak tä Gedeón iwoye tä ifwayhthen lhamel, wet nemhit itiyej lep'altsenyaj Gedeón lew'et lheley.
