Lhawuk lhämet tä itech'aynej n'okawak
1Lhawuk yäm n'oye tä yok:
–Mäh chäj amho akawak tä isilataj, wet nayhita amej, mat yej khalhyena.
2Wet olham ochäj okawak, mälhyej tä Lhawuk ne'tek owoye, wet onayhit lhamej. 3Wet nech'e Lhawuk yachajo tä yäm n'oye tä yok:
4–Chuma akawak wet mäh hoye häp tewokitaj tä lhey Éufrates. Chik lechäte, askata akawak, uyitchela nakse.
5Wet oyik tä ohoye tewokitajtso wet oihi tä oskat okawak, mälhyej tä Lhawuk ne'tek owoye.
6Wet tajyäme wujpe ifwalas, wet Lhawuk yachajo tä tahuy n'oyej tä yok:
–Mäh äple häp tewokitaj Éufrates, chäja alhoho akawak tä leskat tä letihi nakse täjte oyok, “Askathi lhiptso.”
7Wet oyik tä ohoye tewokitajtso, wet tä onchäte lhipte otihi, ofwiläjch'oye tä ihi honhat wet ow'en okawaktso, ihi t'at lhipte otihi tä oskat. Tha häp nemhit is, wasi, imälhewek tä nemhit õ'chumyenlhi. 8Tä mälhyejtso, Lhawuk yachajo tä tahuy n'oyej 9wet yok:
–Häp tä mälhhiyejattso tä olham okänchihla wichi tä ihi Judá lhäy'e Jerusalén tä lhamel wuj tä lhaichäjwethä. 10Oka wichi tä ni'isahenna lechowhal t'unhen, lhamel lhaifwonlä olhämtes wet iwoye m'ak tä lhamel letichunhayajay, wet ihänlhi iyhäj dios lhayis tä m'ak nitälhaye wet häp tä iwujyen. Wet häp tä otech'aynhiyeja lhamel akawakna tä imälhewek tä nemhit õ'chumyenlhi. 11Tsi tä lenayhitte amej akawakna wet let'unthi, wet häp tä mälhyejtso tä olham op'ajtitte lhamej nilhokej wichi tä Israel lhayis lhäy'e Judá lheley, häpkhilek häpe t'at oka wichi. Tsi ot'uhtehläk lhamel itäfwnhat n'oyej wichi iyhäj tä ihiche honhatil, häpkhilek wichitso iwujyenn'o. Tha häp tä oka wichi tach'ahuhit'a n'oye. Olham tä Lewukn'o olhämet täjtso.
Lhawuk lhämet tä itech'aynej iyäte
12Wet Lhawuk äp tahuy n'oyej wet yok:
–Jeremías, fwenho Israel lhayis olhämetna tä ohäpe Lewuk Dios. Is chik lhok, “¿Hä lew'en häp iyäte, iwoye t'at chik õ'tsäche hat'es wet õyäm tapoyej?” Häp Israel lhayis nichulhla amho tä yohlak, “¿Hä lefwetaj olhamel n'am hanej tä elh chik häpe iyäte iwoye t'at tä õ'tsäche hat'es wet õyäm tapoyej?” 13Wet am lechulhihola wet lhohlak, “Lhawuk yok, Owohla m'akayej nilhokej wichi tä ihi honhatna, tehlat iwoye tä w'oknhasej hat'es, lhäy'e niyatey tä reyes tä ihi n'oniyatw'ette David ihi, lhäy'e sacerdotes, profetas, lhäy'e nilhokej wichi tä ihi Jerusalén. 14Wet owasthihichela tä otech'aynej häp iyätey tä wasiche, wet wichi tä thänhäy lhäy'e leles tan'isiyeja. Wet nemla otiyej op'altsenyaj, nofw tä otiyej ohumnhayaj, otäyhthihena t'at lhamel. Olham tä Lewukn'o olhämet täjtso.”
Yej alechäjwethä, mat wujyen Dios
15¡Israel lhayis, Lhawuk t'at tä yämlhi amhohen!
Yeja alechäjwethä, tajlhama tä
äm matche tä letach'ahuye lhämet.
16Wujyenay Awuk Dios tä kamaj ninämeta honatsi,
häpkhilek kachätahen tä ichalajche'pe tachenhas.
Tsi chik ka'ena Awuka häp lham,
wet häp isi tä let'ukwe ihit'ala amejen,
tsi honatsi t'at.
17Chik amel alechäjwethä wet kach'ahuyaye Awuk,
olham oweskathiyeja tä otafwlhi,
ottet'ilis nitsäyhichelahchä.
Tsi häp tä õyen kwenkaya Lhawuk laka wichi,
wet õ'häne honhat tä kalew'eta.
Dios lhämet tä iwoyeje rey lhäy'e lako
18Lhawuk tahuy n'oyej wet yok:
“Fwenho olhämetna häp rey
lhäy'e lako tä niyat tsinha.
Ok, Is chik lenuhchä
tä lhe'pe n'oniyatyaj lew'et.
Athana is chik letatachephä'pe honhat,
tsi häp tä coronas tä isis tä iche'pe ethey
nem iche'pe ethey.
19Häp hupuy tä ihi honhat lhip tä tumej tapinhiye,
häp tä õhp'ohiche,
wet nemhit iche elh chik tiyäjche lhipeytso.
Nilhokej Judá lheley tä õ'chäje
honhat tä kalew'eta, õ'lhokontshi lhamel.”
Jerusalén lewit'äyhyaj
20Lhawuk yok:
“Yahinphä, Jerusalén, lew'enlahlä
lhamel tä atayhfwas tä tälh tafwojyhiye.
Aka wichi tä oy'uhyen ame tajyäme, yikhen,
õ'hän kanhi lhamel tä alechäjejlhi.
21¿Chihla lewoye chik oyen aka niyateya
wichi tä w'enha lhamejen
tä let'alhejenaj lech'otyaj?
Amälhhiyeja iwoye atsinha tä eyte iwohi lhäsa,
wuj tä iwo leteläythayaja.
22Wet chik letay'ätshan ame tä lhok,
¿Atsi m'ak tä tamenej
tä in'oyej m'ak wit'äyhyajna?,
is chik lehan amej tä hach'isukyajay
tä tamen amej tä i'amej täjtso.
Tet iwoyek õ'aip'ajtitchä wet õ'aits'ilkatche.
23Chik iche hin'o tä ichalaj,
ikalhihit'a chik ilehat lhamche tä ichalaj,
tsi lhamyaj t'at.
Wet hay'äj ihanhiyejt'ak ilehat lhamej lefwukus,
tsi lhamyaj t'at.
Wet amel tä akni'isahen,
lehanhiyejt'ak lewoye m'ak tä is,
tsi lhamyaj t'at.
24Wet häp tä oaifwtsatkatla'pe honhat,
oaitech'aynhiyeja huphas
tä leyalh tä tälhe ts'anis ichäjchetshi.
25Häp täjtso akapes tä otshupyenej amehen.
Olham tä Awukn'o häp tä owoyetso.
Tsi häp tä lep'ethat n'ohlä
wet let'ekhaye n'ocheyälis tä m'ak nitälhaye.
26Ofwoynhiphäla haw'uy yämthilek
n'äl tä ats'ilakche wet han'äfwlhi ihi.
27Ow'en t'at m'ak tä hich'atej tä ni'isa tä lewoye.
Tsi häp tä lele n'oyej tä Awukn'o
wet lehoyepej tachenhas lhäy'e häp alhotas
tä lewo akeyayej dios lhayis tä kamatachehen.
Atet iwoye atsinha tä itiyej lakey elh ch'efwa,
wet äp atet iwoye yel'ataj tä ikäne elh.
¡Jerusalén lheley, awit'äyhyaj ihihila!
¿Chihlatek nem akok'ayehen?”
