Õ'toyenlä häp n'otäyhyaj
1Lhawuk yäm n'oye tä yok:
–Tejin'ek Moisés lhäy'e Samuel ikana tä y'alhyen n'oye wichina, mat otihiyejt'a op'altsenyaj lhamel. ¡Chen kanhi wichi, is chik yik n'och'oye! 2Chik iche elh tä tay'ätshan ame tä yok, “¿Chihla olhamel ohoye?”, olak, “Lhawuk lhämet yok,
“Lhamel tä y'inhiyejena äytes lhayis,
äytesla t'at chik ilänhen.
Wet iyhäj tä õ'länhiyejena n'oka'tshayajchal,
n'oka'tshayajchalla t'at chik ilänhen.
Wet lhamel tä y'inhiyejena nehläs,
nehläsla t'at chik ilänhen.
Wet lhamel tä õyenla kwenkaya,
õ'hänhiyela t'at honhat tä kalew'eta.
3“Olham tä Lewukn'o oyok, Ochenhiyela cuatro häp olänyaj tä w'enha lhamejen. Elh tä ichun häpe t'at n'oka'tshayaj tä olänhiyeja lhamel, wet asinhäs äp itonhichehena honhat häp lep'itseyhay, wet afwenchey tä n'okotses äp tufwihena, wet äp itshätäy tä fwitses tufwihena m'ak tä afwenchey imälhthi. 4Wet oka wichina häpkhila m'ak tä lhäy'e lhip tä tanhoch'ay, wet nilhokhiyeja häp wichi tä i'pe honhat ikokyenhiyela lhamel. Häp m'ak tä tamenej tä otiyej lhamel häp lewit'äyhyajayna, häp tä Judá laka rey Manasés, häp Ezequías lhäs, iwoyehte m'ak tä matche tä ni'isa tä ihi Jerusalén.
Jerusalén lewit'äyhyaj tä tälhe n'oka'tshayaj tä õ'tiyej
5“¿Atsihilak aip'altsenhen,
amel tä aJerusalén lheley,
wet atsihilak aihowatshanhen?
¿Atsihilak nilhak'alejlhi haw'atshancheyaj?
6Amel lele n'oyej wet awhol lethat n'ohlä.
Nemhit oteläyit amejen, häp tä tamenej
tä oneyhatphä otkwey tä oaitäyhthen.
7Otonphä amel tä oaitälhtho haw'etes
wet oaifwtsatkatpe honhat,
oaitech'aynej huphas tä leyalh ichäjchetshi.
Oaitäyhthen, lhäy'e ales tä olänhen,
tsi häp tä amel lelehichet'a akeyis.
8Oyäm wujpey tesalis tä i'amejen,
inu'pe holo tä iwhäye tewok.
Atsinhay lhäy'e leles tä mamses tan'ischewek,
lewit'äyhyaj ihi tä ifwalayej.
Yokwet ochätyenpe lhamel m'ak tä äytaj
lhäy'e tä tanhoch'ay.
9Häp atsinhay tä nitäkw leles,
häp lewelakyaj nichätpe lhamel wet leyalh tatäy.
Wet len'äfwlhi ihi, nem hiw'en isi,
tajlhamat honatsi tä wuj.
Wet chik iche elh tä kamaj iläyhi,
opäynhiyela letayhfwas häpkhilek ilän.
Olham tä Lewukn'o olhämet täjtso.”
Jeremías wuj lelhakli
10Yako, isi p'antek kawoya äsa,
isi p'antek n'am newche,
tsi ohäpe hin'o tä nilhokej wichi
tä i'pe honhat yen tayhfwaya.
Ihichet'a elh chik ocheyäjäntej oka chinaj t'äj,
wet ihichet'a elh chik icheyäjänit n'oyej.
Mat nilhokej t'at lhamel
tä iti n'oyej lhämet tä ni'isa.
11Tä Lhawuk iläte olhämetna, wet nichulh n'oho wet yok:
“Olham ot'uhla ame wet aisej t'at.
Chik ochätyenla'pe lewit'äyhyaj atayhfwas,
wujla lhamel lelhakli,
wet lhaip'altsenla ame.”
12Wet Lhawuk tahuyej laka wichi wet yok:
“Ihichet'a elh chik ihanej
chik iwasthi chinaj tä t'un.
Wet häp tä tehlattso,
amel tek lehanhiyeja chik lekalhi
atayhfwas tä takhajayhen
tä tälhe honhat tä tafwojyhiye.
13Tä wuj tä lewo hach'isukyaja
tä nilhokpe aka honhat,
oyachajiyela atayhfwas
nilhokej m'ak tä akäywet,
wet ot'alhit'alach'oye laha.
14Wet oayenla atayhfwas kwenkaya
tä lhehihla honhat tä katäfwela'pe.
Tsi äytaji owäk,
tehlat iwoye itäj tä n'oma,
wet lenofwiyeja.”
Jeremías t'änch'oye Lhawuk
15Iwuk, am tä lehanej m'ak tä in'oyej.
Tichun n'okwe wet w'en n'oho hach'otyaj.
Wo ohaya m'ak tä iyhäj tä ihänn'o iwoyej n'oye.
Teläyit n'oyej, yej tach'anlhayek lhamel ilänn'o,
tsi lehanej tä ohumnhayaj tä oti amej
häp tä tamenej tä oteläytej n'oläkwyhanyajay.
16Wet tä lhämlhi n'oho,
wet olham mälhyej chik otuj t'at ämtes
wet wuj tä okäjejlhi,
tsi häp tä oalewuk t'at,
Dios tä laj atumfwaya.
17Owohit'a t'unfwaya wichi
tä ts'ilak t'at lakäjyaj tä iwoye,
wet tälhe lewhäyhte let'ä n'ohi,
olhaiw'enhatlä lhamel wet ots'ilak t'at,
tsi awäk tä tapo n'oyej häp tä otiyej wichi.
18Häp m'ak tä olät lhameje
ihanhiyejt'ak nojphä, lecha ihichet'a.
Chik olänej kacha, nemhit isej.
N'älej tä lekan n'oyej,
atet iwoye inätw'et tä y'im, tamchäy t'at.
Lhawuk ikhajyen Jeremías
19Wet Lhawuk nichulh n'oho wet yok:
“Chik letapil n'oye,
nech'e olham oyachajihola tä otchum ahilä
wet yachajiholak letach'ote ochumet.
Chik leleche ämtes tä m'ak nitälhaye,
wet lewoye ämtes tä laha ihi,
wet yachajiholak oayen olhämetwoya.
Wichitso is chik lhamel tach'ahu ame,
wet am yej tach'ahuye lhamel.
20Oaitech'aynhiyeja n'olafwek tä chinaj tä takhajay,
häpkhilek lhamel nikalha amhi.
Lhamel iwohla laka'tshayaja amej,
mat tumhit'ala ahilä.
Tsi olham tä oi'amej,
ot'uhla ame wet oaifwayhthila.
Olham tä Awukn'o olhämet täjtso.
21Oaifwayhthiyeja wichi tä ni'isahen
lhäy'e tä fwitses.”
