Recab lhayis is m'ak tä iwoye
1Häp ifwalas tä Joaquim, Josías lhäs, häpe Judá laka rey, Lhawuk tahuyej Jeremías wet yok:
2–Is chik lehoye häp wichi tä Recab lhayis wet ämhoplhi lhamel. Wet is chik lehänchufwi elh häp Owukwe lech'o, wet tsäyhomche lhäthis häp hat'es häpkhilek lhamel iyäyej.
3Wet olham Jeremías oyik tä ot'ukwe häp Jaazanías, olheyfwa Jeremías lhäs tä Habasinías lecheyäs, lhäy'e häp lepuhfwas, lhäy'e leles, wet lhäy'e nilhokej häp Recab lhayis. 4Wet ohäne häp Lhawuk Lewukwe lech'o elh tä lakawo Hanán leles tä lew'et. Hanán häpe Igdalías lhäs. Wet hup lech'otso hap'akej häp hup lech'o elh tä Lhawuk Lewukwe laka niyatey lew'et. Wet i'pe hup lech'o elh tä lew'et Maasías, Salum lhäs, tä häpe Lhawuk Lewukwe lepewo. 5Wet otchuma n'olhäthis, otihiche tä Recab lhayis tatache, wet otsäyhomche hat'es wet oyok:
–Is chik amel leyäyej.
6Wet lhamel yok:
–Olhamel oyähiyejt'a hat'es, häp tä otes p'ante Jonadab, Recab lhäs, n'äyej p'ante n'ohohen hat'es. Isit'a chik olhamel oyäyej ifwala chik häpe, lhäy'e oles. 7Wet äpte n'äyej n'ohohen chik oyenchelhi owukwey lhäy'e chik otutcheyhen. Wet isit'a chik otihchä uvas lhiley wok oyenchelhi olafwey tä uvas lhiley lew'etes. Wet t'uhläk nilhokej ifwalas tä olhamel oi'pe honhatna tä oyen wukweya häp tsänt'ähes, häpkhilek pitaj ow'atshancheyaj tä olunpe honhat tä oihina tä otet iwoye wichi tä kalew'etesa honhat tä ihi.
8“Wet matche tä olhamel owoye otes Jonadab lhämet p'ante iwoye. Olhamel oyähiyejt'a hat'es, lhäy'e och'efwas, lhäy'e oles. 9Wet tek oyenchelhi owukwey lhäy'e olafwey tä uvas lew'etes, otutcheyhihent'a. 10Olhamel oyen at wukweya tsänt'ähes, häp tä olunhen t'at, akalelhäjit'a olhamel ow'et. Matche tä owoye nilhokej häp otes Jonadab lhämtes p'ante iwoye tä is chik mälhyejtso m'ak tä olhamel owoye. 11Mat tä Babilonia laka niyat Nabucodonosor inuye honhat, wet häp tä olhamel oyok, Mäh n'ahoye Jerusalén, häp tä n'alethanlä sip'älis tä nifwotas tä Babilonio lhayis lhäy'e häp Aram lheley. Wet häp tä tamenej tä olhamel oihi Jerusalén.”
12Wet häp tä Lhawuk tahuyej Jeremías wet yok:
13–Olham tä Awukn'o tä laj otumfwaya tä ohäpe Israel laka Dios, one'tek lehoye Judá lheley lhäy'e häp wichi tä ihi Jerusalén, fwenhola lhamel tä is chik lhaichufwenej tä iwoye olhämtes tä one'tek iwoye. 14Olak, Häp wichi tä tälhe letes Jonadab, Recab lhäs, lhamel iwoye t'at letes lhämet tä n'äyejo hat'es chik lhamel iyäyej. Wet pajtha ifwalasna tä niyäyayej hat'es tsi matche tä iwoye letes lhämet. Mat amel tä ahäpehen Judá lheley, olham tä Awukn'o oy'enhiyejt'a tä ofwel amhohen olhämtes, mat lewohiyet'a. 15Yachajopej tä ochen amehen okawos profetas, häpkhilek iwo siläta amejen olhämtes tä oyok, Elh tefwajpeji amel leyache akeyis tä ni'isachehen tä lewoyaye wet enaylhi m'ak tä is. Leyayej tä lhen awuhuya dios lhayis iyhäj wet yej n'okwiyej lhamel. Wet chik mälhyejtso m'ak tä lewoyaye, wet häpkhilek lajit lepesa tä lhewhi t'at honhat tä olham ow'enhohte achätilis lhäy'e tä ow'en amhohen. Mat amel tek letach'ahu n'oye wet lewohiyet'a olhämet.
16“Wichi tä tälhe letes Jonadab, lhamel wuj tä iwoye letes lhämtes. Mat häp Israel lhayis iwohiyet'a olhämtes tä ofwenho lhamel. 17Häp tä tamenej tä olham tä ohäpe Awuk tä laj otumfwaya tä Israel lhayis laka Dios, oyok, Ochenhiyela Judá lheley lhäy'e wichi tä ihi Jerusalén nilhokej häp lewit'äyhyajay tä pajche oyäme. Tsi häp tä oyämhoplhi lhamel, wet iwohiyet'a olhämet. Wet tä ot'änch'oye lhamel, wet nichulhit'a n'oho.”
18Wet Jeremías tahuyej häp Recab lhayis wet yok:
–Häp Lhawuk tä laj letumfwaya tä Israel lhayis laka Dios, lham yok, “Matche tä amel lewoye nilhokej häp ates Jonadab lhämtes lhäy'e lechufwenyajay tä iwoyehte. 19Häp tä tamenej tä olham tä ohäpe Awuk tä laj otumfwaya tä Israel lhayis laka Dios, matche olhämet tä oyok, Ihichet'ala ifwala chik häpe chik Jonadab leles elh chik häpe newahi olham ochumet.”
