Jer 47

“¡Lhek yahinya! Nek t'at

häp inät tä tälh tafwojyhiye,

wuj tä iläfwelche wet t'ulhla'pe honhat.

Wet ilänla Filisteo lhayis lhäy'e lew'etes,

lhäy'e nilhokej häp m'ak tä ihi laka honhat.

Wet nilhokej lhamel t'änhiyejawethä lhafwyhayajay,

tsi häp tä wuj lelhakli tä iyej lhamel.

₃Tsi yel'atas tä n'oka'tshayajchal

lefwus t'ähes tä wujpey lepak tä tamenej,

lhäy'e häp kaletas tä wujpey

takäläy lepak tä te iwoye

pelhay tä t'ajan tä äytajiy.

Wet hin'ol nemhit ikalhi chik nahayej leles,

iwom at katsi wet yikhen,

tsi häp tä nitumahlä letayhfwas.

₄Tsi nichäte ifwala tä olham

ochene lewit'äyhyaj häp Filisteo lhayis,

wet owasthi häp Tiro lhäy'e Sidón,

lhäy'e nilhokej wichi iyhäjfwas

tä imälhehi tä lhaip'ajtej lhamel.

Tsi olham nech'e otifwej Filisteo lhayis,

häp wichi tä letetsel tälhehte

lhiletaj tä lhey Creta.

₅Häp wichi tä lew'et Gaza

lhamel yähäs lhetek w'oley,

wet Askalón yok tam

tsi häp tä õ'chäj wichi, õyen kwenkaya.

Amel tä nofw akhajyhayaj

tä nemhit lehanej lewoyneja

chik letatayhlä atayhfwas,

¿chihlatek leleyej tä alesajwethä?

₆Wet lhok, ¡Ay Israel lewuk dios lefwajnhat!

¿Chihlatek iwo t'elakw'eta n'amejen?

¡Is chik Israel lewuk dios

yachajche lehi häp lefwajnhat

häpkhilek iwo letamseka!”

₇Mat Lhawuk yok:

“¿Chiwoye chik owo letamseka ofwajnhat

tä olham t'at tä ochene Askalón häpkhilek tatayhlä,

lhäy'e nilhokej häp wichi

tä iche lewomekitaj lhipey?

Tsi pajche wak'alh tä mälhhiyejatso

häp m'ak tä owohiyela.”