Moab letäyhyaj
1Häp täja lhämet häp Lhawuk tä laj letumfwaya tä Israel laka Dios tä itayhte häp Moab, wet yok:
“¡Lewit'äy ihi hupuy tä lhey Nebo, wasi t'at!
¡Wet lhip tä lhey Hupuy Täkwfwas õ'sakanej t'at,
õhn'äfwlhat laka wichi wet wasi hup tä takhajay!
2Nofw Moab len'ohyaj, letayhfwas ihi Hesbón
tä iwo chowhala'pe laka'tshayaj
tä iwohiyejela häpkhilek Moab nemhit iche.
Wet am, Madmén, õ'aitäyhthila t'at,
lhohlak tam wet n'oka'tshayaj ilehit'ala amej.
3“Wichi tä ihi Horonaim t'änhen wet yok,
¡Õ'känchi, matche tä õ'wasthi!
4Tsi Moab wasi wet wichi lhafwyhayajay
pitsaje t'at pajtha nichäte Zoar.
5Wichi tä iho'pe lhip tä atojphä tä lhey Luhit
lhamel wuj tä tafwchehchä.
Wet iyhäj tä inukwe n'äyij tä ihoye Horonaim
matche tä t'änwethä tä hiw'en hupuy tä wasiche.
6¡Mähen! ¡Afwayhthen! ¡Atonitchehen,
atech'aynej amlhäj lhawayuk tä ihi ts'anis!
7“Wet Moab lheley,
amel wuj tä let'ekha amehen tä atkhajayhen,
wet let'ekhaye akäywet tä wuj tä lew'en.
Häp tä tamenej tä õ'sakanla amejen,
wet aka dios Quemós õ'hänhiyela
häp honhat tä kalew'eta,
lhäy'e laka sacerdotes,
wet lhäy'e häp wichi tä len'ohyaj iyeji.
8Wet nilhokhiyeja häp hupuy tä õ'wasthiche,
ihichet'ala elh chik tefwayej n'oka'tshayaj,
wet tachenhas kawayhil
lhäy'e honhat tä w'awulhchä wasihichela.
Tsi häp tä olham tä ohäpe Dios
tä Israel Lewuk olhämet täjtso.
9Is chik letshänhihchä tunte
tä n'olesaynhay ihi häp Moab,
tsi häp tä õ'wasthihila.
Õ'känchihla laka hupuy
wet ts'ilakhilat lhipey,
wet nemhit ihichela wichi
chik yenla lew'etesa.”
10¡Is chik lewit'äyhyaj ihi häp hin'o tä n'etäjej Lhawuk lechumet! ¡Is chik lewit'äyhyaj ihi hin'o tä lhaknip'ajtayej wichi tä ilänhen Moab lheley!
Matche tä wuj Moab lewit'äyhyaj
11Häp Moab nilhokej ifwalas tä letamsek ihi. Ihichet'a ifwala chik letayhfwas ihäne honhat tä w'enha lhamej. Tet iwoye hat'es tä õ'tsäyho n'olhäthi tä õkniyäyayej tä äp õknitsäyaho elh n'olhäthi. Wet häp tä tamenej tä tet iwoye hat'es tä akäj, tatäyhit'a lakäjyaj lhäy'e lenij tä akäjche. 12Mat Lhawuk yok:
–Nichäthiyela lewhäy tä ochenhiyela wichi tä iwohla iyhäja lehis häp hat'estso, wet lehis tä nem lheley ihiche wet õ'wasthihichela. 13Wet Moab len'äfwlhi ihihilatpe häp lecheyä Quemós, tehlat iwoye Israel lhayis tä n'äfwelhte'pe häp Betel tä wuj tä lhamel t'ekhaye.
14“¿Chiwoye tä amel lhok,
Olhamel ohäpehen wichi tä n'oka'tshayajchal,
otkhajayhen tä oihi n'oka'tshayaj
chik ottayhlä otayhfwas?
15Nämhen t'at häp wichi
tä iwasthi Moab lhäy'e laka hupuy,
wet laka mamses tä takhajayhen y'inhihena.
Olham tä ohäpe Rey tä lhamya
wet äp Dios tä laj letumfwaya,
olham tä olhämet täjtso.
16Atott'at alhoho Moab letäyhyaj,
pajiyejt'alak näm.
17Nilhokej amel tä lhehiche
honhatil tä iwhäye Moab,
afwchehchä'pe.
Nilhokej amel tä letäfwelej
Moab len'ohyaj tä letoyaj iyeji,
äyen wet lhok,
¡Lhek yahinya chipte tä
õ'känchi len'ohyaj tä iyej!
¡Nofw lakhajyhayaj, tatäy lewujyaj!
18“Ayhatchä han'ohyaj,
amel tä haw'et Dibón,
tayhichephä honhat.
Tsi häp tä nek t'at Moab letäyhyajwo
tä nek amehen tä tatay ahilähen,
häpkhilek iwasthiche awukwey tä aletnhawtes
tä lhäm tach'opwayhen tä lhenchelhi.
19Amel tä haw'et Aroer,
kasitwhäye n'äyij wet yahinche.
Wet ätshane wichi tä nekche
tä ilethanlä letayhfwas,
ok, ¿Atsi m'ak tä awit'äyhyaj?
20Wet lhamel yohlak, ¡Õ'kalhi Moab, wasi!
¡Afwchehchä, äyen,
wet wo silätaye tewok Arnón
tä Moab wasi wet nemhit iche!
21“Nichäte lewhäy häp okalelhthayaj
tä otiyej hupuy tä ihi honhat tä w'awulhchä
tä lheyis Holotaj, Jahas, Waj T'änyaj,
22-23Dibón, Nebo, Bet-diblataim,
Hupuy Täkwfwas, Bet-gamul, Bet-meón,
24Keriot, Bosra,
wet lhäy'e nilhokej häp Moab
laka hupuy tä atott'ahomche
lhäy'e iyhäj tä atosehen.
25Owo okalelhthayajayej Moab lakhajyhayaj tä nofw,
wet tatäy leniyatyaj.
Olham tä ohäpe Dios tä matche tä owoyetso.
26“Is chik õ'yäynej hat'es häp Moab lheley,
tsi lhaichäjlhi n'oyej tä tatay n'ohlä
tä ohäpe Dios tä matche.
Wet häp tä lhamel nich'olehihilawethä lech'uyhtes,
häpkhilek nilhokej wichi tä iläkwi.
27Amel tä aMoab lheley,
tichunache aläkwyhanyaj
tä letiyejte Israel lhayis,
wet lhen ämeta tä len'äyihomche lhamel,
wet lhen at häpeya häp etantses.
28Athana is chik amel lhekch'oye awukwey
wet en haw'etesa tachenhas.
Is chik ate iwoye hokwinhas
tä iwo lhupisahiche chowhay
tä ihiche tachenhas.
29Olham wuj tä ontäfwelej häp Moab lheley
tä matche tä lhaichäjwethä,
lhamel lhaiwujyenhen, lhainuhatpe iyhäj,
fwetaj newache elh chik w'awulhi.
30Ontäfwelej t'at lakeyistso,
mat wohit'a m'ak chik tälhe,
wet lajit lahaya lhämtes tä iwoye.
31Häp tä tamenej tä oy'äyen wichi tä ihi Moab,
lhäy'e häp wichi tä ihi Kir-hares.
32Otafwlhi'pe uvas lew'etes tä ihi Sibma,
lhäy'e häp Jazer tä otafwlhi'pe.
Tsi Sibma lheley wuj tä lhaichäjwethä,
tet iwoyek uva lhiley lehäynhay yikhen
wet tiyäj w'echehi Lewomekitaj Nosoy
pajtha nichäte Jazer.
Mat athana nofw t'at häp lhay,
tsi nämhen wichi tä itäyhat
nilhokej m'ak tä ihi n'olafwek.
33N'ot'änyajay tä wichi lakäjyaj
nofw t'at tä ihiche n'olafwey
lhäy'e yachuyajw'etes tä ihi Moab,
wet hat'es nech'e y'imche t'at
tä ihiche n'okapuchehis.
Ihichet'a hin'o chik häpe chik t'äsi uvas
häpkhilek yen häpeya hat'es,
wet nemhit iche n'otenek
tä n'okäjyaj letenek chik pitsaje.
34Häp wichi tä ihi Hesbón
lhamel wuj tä t'änejwethä
m'ak tä äytajchey tä iyej lhamel.
Wet wichi iyhäj tä ihi lhip tä lhey Dios Wujyaj,
lhäy'e iyhäj tä ihi Jahas,
lhamel iläte n'ot'änyajtso,
wet lhäy'e wichi tä ihi Zoar
pajtha nichäte iyhäj tä lew'et Horonaim
lhäy'e Eglat-selisiya.
Tsi häp tä inätw'etes
tä ihi Nimrim nemhit inät ihiche.”
35Wet Lhawuk äp yok:
“Otifwiyeja häp wichi tä ihi Moab,
häp tä lhamel ihoye
len'okhayajw'etes tä i'pe tachenhas
häpkhilek yen t'awayhtesa laka dios
häp lhamel leles tä ilänhen
lhäy'e häp incienso tä iwun.
36Otafwlhi'pe Moab
lhäy'e häp wichi tä ihi Kir-hares,
otet iwoye hin'o tä yafwutche lefwol
tä iten wichi tä elh ileyej honhat letenek,
tsi häp tä Moab lakäywet tä ihutwek tatäy.
37Wet nilhokej lhamel yähäs
lhetek w'oley lhäy'e lepäsey,
wet isajejwethä m'ak tä y'uyhen häp takwech'ol,
wet taw'uyhiche wesaj tä yelaj.
38Wichi tafwchehchä tä ilunlhi'pe lewukwey
lhäy'e tä ilunwethä honhate.
Tsi häp tä olham tä owasthi Moab,
otech'aynej n'olhäthi tä õknichumyenalhi.
Olham tä ohäpe Dios tä Israel Lewuk olhämet täjtso.
39“¡Is chik let'äyen häp Moab tsi matche tä wasi!
Laka wichi itilhakhiche tsi len'äfwlhi ihi,
wet wichi tä ihiche honhatil tä iwhäye
iläkwi wet yen häpeya m'ak tä tanhoch'ay.”
40Wet Lhawuk äp yok:
“Yik t'at häp Moab letayhfwas,
tet iwoye afwenche tä iyhäjkottaj,
hich'enhi lhafwis, yike t'at Moab.
41Nilhokej hupuy lhäy'e n'olafwey
tä tuntey tä atoschephä
lhäy'e tä tach'opwayhen,
letayhfwas isakanhiyeja.
Wet nilhokej Moab kahin'ol tä n'oka'tshayajchal
tachetteyhiyejchehena lenowayhyaj,
tet iwoye atsinha tä iwo lhäsa.
42Õ'wasthihila Moab wet nemla iche,
tsi häp tä laka wichi
lhaichäjwethä wet tatay n'ohlä.
43Wet häp tä olham tä ohäpe
Dios tä Israel Lewuk oyok,
Häp wichi tä lew'et Moab tehlat iwoye itshätäy,
hin'ol tä lhayen chowalhnhasayej takähännhej t'at.
Wok elat nichäte chowej,
wok t'äsi niyäkw tä õyenej.
44Wet elh chik chowalhnhas nisakanayej,
häp tä nichäthiyela chowej.
Wet elh chik isakanphä tä inuphä
tä ihi chowej, t'äsihila niyäkw.
Tsi olham tä ochätyenla'pe
lewit'äyhyaj häp Moab lheley.
Olham tä ohäpe Dios tä Israel Lewuk olhämet täjtso.
45“Iche wichi iyhäj tä w'et lhaitonchetshi t'at
tä yikhen tä t'ukwe leletnhawet,
lhamel fwetaj ilethane Hesbón.
Mat Hesbón tä rey Sehón laka hupuy ihi t'at itäj.
Wet yik t'at itäj, ihämit Moab lakatchenhas,
honhat tä wichi tä äkleyhtses lew'et.
46¡Awit'äy i'amejen, amel tä Moab lheley!
¡Amel tä len'okwiyej Quemós, attäy t'at!
¡Aka mamses, aka lhutshay,
õ'häne t'at n'okwenkanyaj!
47“Mat häp ifwalas tä tatay alhoho
owohla elha m'ak tä owoyeje Moab,
nech'e häp m'ak tä isila tä owoyeje.
Olham tä ohäpe Dios tä Israel Lewuk olhämet täjtso.”
Häp täja lepes häp Lhawuk lhämet tä lakalelhthayaj tä itiyej Moab.
