Lhawuk lhämet tä yämeje Babilonia letäyhyaj
1Häp täja häp Lhawuk lhämet tä ifwenho profeta Jeremías tä yämeje Babilonia lhayis lhäy'e laka honhat. Wet yok:
2“Wo siläta honhatil
häpkhilek nilhokej wichi ihanej.
Wo atetnekayej tä lefwenho
wet yej wo m'ak chik leskatho, ok,
¡Babilonia õ'sakanej t'at!
Lhamel lewuk dios tä lhey Marduc
nech'e õyen at läkwika
wet lhäy'e lhip tä lenowayhyaj ihi.
Matche, lecheyälis õyen at läkwika
wet lhäy'e lhip tä nowayhen.
3Tsi häp tä wichi tä tälhe
honhat tä tumej tafwojyhiye,
lhamel nekhen t'at tä tatayhlä wichina.
Wet yenlat ts'anisa häp honhatna,
wet nemhit ihichela hin'ol wok itshätäy
chik yachajihola chik yenla lew'eta.
Tsi nilhokhiyeja lhamel tä noway
wet yämla matche tä yikhen.”
Israel lhayis yäpnhiyela laka honhat
4Lhawuk lhämet yok:
–Chik nichäthiyela ifwalatso, wet Israel lhayis lhäy'e häp Judá lheley lhamel nech'e lhaip'ajthilawek, tafwichelatchä tä t'u n'okwe tä ohäpe Lewuk Dios. 5Lhamel tay'ätshanhiyejlhila häp n'äyij tä tataye Sión, wet lhamel yikhihena tä ihoye tsi yohlak, “Mäh n'ahoye Lhawuk. Is chik y'achajo tä y'alhaip'ajtej wet n'awoyeje ilhämet tä matche.”
6“Oka wichihte tet iwoye tson'atas tä wetahen. Tson'ataswos tä yikchufwi, lhamel tä nit'amajayej, iwetahat'atwethä tä ihi tachenhas. Wet tson'atas w'et tiyäjehen t'at tachenhas pajpejtha nemhit ihanej ihi lehi. 7Wet chik letayhfwas nilhoke lhamel, wet tufwen. Wet yok, N'amenhit'ak lhates, lhamel t'at tä letes häp tä iwo lech'isukyaja, tatayhlä lewuk dios tä häp tä matche tä t'uye wet letetsel mhaji wuj tä t'ekhaye.
Lhawuk iwohla len'äyija laka wichi
8“¡Mähen, amel tä lhehi Babilonia,
häp honhat tä kahaw'eta!
Is chik atet iwoye kayla lhayis tä hin'ol
tä lhayen lhetekayej n'olhoksek.
9Tsi häp tä olham oneyhthiphäla
häp wichi tä takhajayhen
tä tälhe honhatil tä tumej tafwojyhiye,
wet häp tä lhamel lhaip'ajthilawek
tä inuye Babilonia,
wet lhaipiynhilahlä wet ikalhihila t'at.
Tsi häp tä ihoyanlä tä iwo laka'tshayaja,
wet wuj tä takwey isejiche lelutsej hal'ä.
10Wet isohla Babilonio lhayis lakäywet,
pajla'tha nemhit ichuttej
tä ihutwek tä tachuma.
Olham tä Awukn'o olhämet täjtso.
Babilonia letäyhyaj
11“Amel tä ahäpehen Babilonio lhayis,
lesoyejte oka wichi lakäywet
wet wuj tä a'akästewethä.
Letiyäjchephähte, atet iwoye
tolo les tä tiyäjchephä
tä akäswethä tä ihi hal'ä tälhes,
wet let'änhente, atet iwoye
yel'atas tä y'iphen.
12Mat amel aka honhat tä lechäthichehchä,
wuj tä len'äfwlhi ihihila.
Nofw t'at lewujyaj, ts'anisla t'at
wet nemla wichi ihi.
13Tsi häp tä olham tä otwäkwäyhiyela,
osohiyeja wichi tä ihi,
wet matche tä ts'anisla.
Nilhokej lhamel tä inu lhipche
inuhthila lhamhohen chik hiw'en
lewit'äyhyaj tä wuj tä iyej,
wet lhamel yafwuthichehena lepästey.
14“Amel tä lechäjwethä alutses hal'äy,
apiyen, lunej Babilonia.
Unthomche alutses, äm nofwej
hach'ähal tä letiyäjej,
häp tä Babilonio lhayis
tatayej n'ohlä lech'isukyajay
tä ohäpe Israel Lewuk Dios.
15Änhen, nilhokej amel tä lewo aka'tshayaja
tä lelunej t'at lhamel lew'etes.
¡Babilonia lhayachaje letayhfwas!
¡Nichätche kanhi n'olafwey tä tuntey
lhäy'e lech'utey tä takhajayhen!
Olham tä owo hayahlä,
wet amel tä lewo ohaya,
woyneja t'at m'ak tä lhamel iwoyejepej
häp iyhäj tä lhamel ikalhi.
16Yej mälhthi elhaj häp wichi
tä utchenhas tä ihi Babilonia,
wok hin'o tä ilanhi yachuyaj lhay.
Nilhokhiyeja wichi tä tälhe iyhäj honhatil
tä iyej Babilonio lhayis,
chik hiw'enla n'oka'tshayaj tä ihämit lhamel,
elhpej inuhla alhoho,
yäpnhiyelat honhat tä lew'et.
Israel lhayis yäpnhiyela laka honhat
17“Israel lhayis tet iwoye tson'atas tä wetahen tä t'owalhas ihänwethä. Asiria laka rey häp tä ichunte tä tufwen, wet tä paj wet nech'e Nabucodonosor, Babilonia laka rey, tä äp tufwen wet yokwajiche lhiley. 18Häp tä tamenej tä olham tä ohäpe Israel Lewuk Dios tä laj letumfwaya, otasnhila häp Babilonia laka rey lhäy'e laka honhat. Otech'aynhiyeja Asiria laka rey tä otasinte'pe lakey tä ni'isa tä iwoye. 19Wet onachajihomchela lew'etes häp Israel lhayis, nech'e lhamel ihihichela t'at häp honhat tä lhamel laka honhat. Lhamel tehlat iwoye tson'atas tä wuj lhäk tä nilhoke tä ihi häp Carmelo, lhäy'e Basán, lhäy'e Galaad, lhäy'e häp tachenhas tä ihi honhat lhipey tä lewuk wichi tä tälhe letes Efraín. 20Olham tä ohäpe lhamel Lewuk oyok, Chik nichäthiyela lewhäytso, nofwila Israel lhayis lech'isukyajay lhäy'e m'ak tä ni'isa tä Judá lheley iwoye. Tsi olham otäyhthiyeja letes häp lhamel tä imälhehi.
Lhawuk iwasthihila Babilonia
21“¡Nuyaye häp Merataim
lhäy'e wichi tä lew'et Pekod!
¡Hänaywethä, tifwej tä lelänhen!
¡Woye nilhokej olhämet tä ofwel amhohen!
¡Olham tä Awukn'o tä osukun amejen
chik letäyhthen lhamel!
22Imälhewek honhat tä iläte n'oka'tshayaj lepak,
wet matche tä ihämit wichi.
23Babilonia tet iwoyehte n'okäjnhat,
tsi õ'wastejiche nilhokej honhatil.
Wet athana tha wasi,
ts'ilak at lhipey tä imälhehi.
Wet nilhokej wichi tä ihiche honhatil
tä lenowayhyaj ihiche tä hiw'en
m'ak tä lewit'äyhyaj häp Babilonia.
24Babilonia, am t'at tä oti ahilä
oka niyäkw tsi oayen.
Wet tä kahanayej ihi pajtha
let'iseltej t'at tä let'äsi,
osakan at amej wet oayäyit t'at,
tsi häp tä letatay n'ohlä
tä ohäpe Israel Lewuk Dios.
25Ofwoyenche lepe häp hup
tä oka'tshayajchal ichufwi,
otonphä olutses tsi wuj tä owo wäkwa.
Tsi häp tä olham tä ohäpe
Israel Lewuk Dios tä laj letumfwaya,
iwohiyet'ak n'am wo ochumeta
tä ihi Babilonia lhayis laka honhat.
26¡Amel nuye nilhokej honhattso
lhipey tä wichi ihiche!
¡Fwoyenchehen lakapuchehis!
¡Hutwek wichi wet tifwej tä lelänhen!
¡Yej mälhthi elh!
27¡Häne n'olänyajw'et
nilhokej laka sip'älis wet länhen!
¡Lewit'äy ihi lhamel!
¡Nichäte t'at ifwala tä lewhäy
tä otiyej otasnhayaj!
28“Lhek ch'ahuyaye lepakas wichi
tä lhayämthen tä tälhe Babilonia
pajtha nichäte Sión.
Lhamel yen at lhämeta
m'ak tä Lhawuk Dios iwoyeje Babilonia,
tä laha häp m'ak tä ni'isa
tä Babilonio lhayis iwoye
tä iwasthi Lhawuk Lewukwe.
29“¡Äne nilhokej wichi
tä ichäjwethä lelutses hal'äy,
häpkhilek inuye Babilonia!
¡Apiyen, lunej hupuy,
häpkhilek newache elh chik yäm!
¡W'enho laha m'ak tä ni'isa tä iwoye!
¡Woyneja t'at m'ak tä lhamel iwoyepej!
Tsi häp tä lhaichäjejwethä tä tatay n'ohlä
tä ohäpe Israel Lewuk Dios tä N'ot'amajchet.
30Häp tä tamenej tä õ'länhihena
laka mamses tä ichehen hupuy kawayhil,
wet nilhokej hin'ol tä n'oka'tshayajchal
tä nofwiyeja t'at ifwalatso.
Olham tä ohäpe Dios tä Israel Lewuk olhämet täjtso.”
31Lhawuk Dios tä laj letumfwaya äp yok:
“Ahäpe wichi tä lhaichäjwethä.
Nech'e ottay ahilähen,
tsi nichäte ifwala tä lewhäy tä oaitasnhen.
32Tä ahäpe wichi tä lhaichäjwethä,
letanhäphänhila wet lechätlat katsi,
wet ihichet'ala elh chik aineyhthiphäla.
Wet owunhiyejola itäj nilhokej aka hupuy,
wet itäjtso ihämthila nilhokej m'ayhay tä i'awhäye.”
Lhawuk tä lakhajyhayaj ihi ifwayhthila laka wichi
33Lhawuk tä laj letumfwaya äp yok:
“Wichi tä Israel lhayis, lhäy'e häp Judá lheley,
wuj tä lhamel iteläytej tä õyen kwenkaya.
Letayhfwas itsokwethä wet tek inuhatchephä.
34Mat häp Elh tä ilanhichela lhamel
häpe Elh tä wuj tä lakhajyhayaj ihi,
tä häpe t'at olham tä ohäpe
Dios tä laj otumfwaya.
Olham t'at tä otch'othiyela lhamel,
ow'enhihola letamsek häp laka honhat,
mat ow'enhihola Babilonia lheley häp lelhakli.”
35Lhawuk äp yok:
“¡Wo aka'tshayajayej Babilonia,
lhäy'e häp wichi tä ihi,
lhäy'e laka niyatey,
lhäy'e wichi tä fwetaj ihan honhatejen!
36¡Wo aka'tshayajayej wichi tä han'ältshantses,
häpkhilek n'äl tä ch'isukwis t'at!
¡Wo aka'tshayajayej laka sip'älis,
häpkhilek tachettiyejchehen lenowayhyajay!
37¡Länhen lew'utey yel'atas,
wasthiche lehis kaletas tä laka'tshayajchal!
¡Wo aka'tshayajayej niyat elh
kasip'älis tä tach'ote lhamel,
häpkhilek tet atsinhay!
¡Wo aka'tshayajayej Babilonia lakäywet wet soyej!
38¡Wo aka'tshayajayej tewok lhayis,
häpkhilek y'imche!
Tsi Babilonia häpe honhat
tä n'ocheyälis lew'et,
hich'isukyenhen wichi.
39“Häp tä tamenej tä Babilonia, nech'e siläkhä lhayis, m'awolis, lhäy'e häp wänlhäs, lhamel iwohla lhokweyahi. Wet nemla yachajok wichi ihi, ihichet'ala hin'o chik häpe chik t'uhlahläk yen lew'eta. 40Wet tehlat iwoye Sodoma lhäy'e Gomorra täjte otäyhthen, lhäy'e hupuy iyhäj tä iwhäye. Nemla iche wichi chik yenla lew'eta, wet nemla inukwe honhattso chik ilunhihena. Olham tä ohäpe Dios tä Israel Lewuk olhämet täjtso.
Wichi iyhäj isohla Babilonio lhayis laka honhat
41“Lhek yahinlä wichi tä wuj tä tälh tafwojyhiye.
Nekhen nifwotas tä lhaikhajyenhen
tä tälhe lhip tä matche tä atofwey,
lhäy'e häp reyes tä wujpey.
42Lhamel wak'alh tä ichäjwethä laka'tshayajchal
tä lelutses hal'äy lhäy'e lefwajnhates.
Matche tä fwitses lhamel wet lajit lep'altsenyaja,
wet tä nekhen tä iche'pe lew'utey yel'atas,
tet iwoye lewomekitaj tä lepak äytaji,
wet wak'alhen tä iwo laka'tshayajayej Babilonia.
43Wet tä Babilonia laka rey
ihanej tä nämhihena nifwotas,
nichätej at katsi lenowayhyaj.
Wuj tä lelhakli ihi wet äytaj letichunhayaj,
tet iwoye atsinha tä iwo lhäsa.
44“Olham opajit'ahlä, onämla, otehlat iwoye t'owalhaj tä inuphä tä tälho hon'al tä wusche'pe tä iche tewok Jordán lhipey tä tiyäje honhat tä hup tä w'atshan ihi. Wet oyokwesichephäla Babilonia lheley, wet oyenla laka niyata hin'o tä olham t'at tä ottshupiye. Tsi ihichet'a hin'o chik w'awulh n'ohi, wet ihichet'a elh chik ihanej iwoyneja chik iti n'oyej lakalelhthayaj, wet ihichet'a tson'ataswo chik ihanej iwoyneja chik tatay n'ohlä. 45Lhek ch'ahuyaye m'ak tä olham tä Israel Lewukn'o owohiyejela Babilonia, lhäy'e häp m'ak tä owaklhat tä owohiyejela wichi tä ihi. Tej tä leles tä õ'chäjiyela honhat elh tä kalew'eta, lhäy'e häp honhat tä lhamel lew'et tä õ'wasthihila. 46Lepak äytajihla häp Babilonia chik õ'sakanej, wet honhat w'ahuhilhila, wet wichi tä ihiche honhatil iläthiyela n'ot'änyajay.”
