Jer 51

₁Lhawuk yok:

“Olham ochenhiyela leyalh tä n'otäyhyajwo

häp Babilonia lhäy'e wichi tä ihi.

₂Ochenhiyela letayhfwas wet itech'aynhiyeja

häp trigo tä õ'tihlä leyalh t'ähes tä õ'saphi.

Wet letayhfwastso one'tehlak yäm nofwej

häp wichi tä ihi honhatna.

Lhamel inuhiyela nilhokej honhatna lhipey

chik nichäte ifwala tä lewhäy tä olhaklithen lhamel.

₃¡Waklhathen alutses hal'äy,

wo hat'okwep'otesa, nuye lhamel!

¡Yej p'altsen mamses tä ihi Babilonia,

äm nofwej laka sip'älis tä lelänhen!

₄Imälhehilawek häp honhat tä Babilonio lhayis kahonhat

tä n'op'itseyhay ihichehena t'at häp hup kawayhil.

₅Tsi tej tä Israel lhayis lhäy'e häp Judá lheley

matche tä yäm tapoyejej

lech'isukyajay häp laka honhat,

olham tä ohäpe Lewuk Dios tä laj letumfwaya,

Israel T'amajchet, kamaj oiyej t'at lhamel.

₆“¡Mäch'oye Babilonia, kelchetshi,

afwayhthen, elh weihalhapej amel!

Isit'ak lhamel lech'isukyajay

tamen amejen chik let'inhen.

Tsi nichäte t'at lewhäy tä owo hayahlä lhamel,

wet ikathiyeja t'at laha

tä t'uhawetej m'ak tä iwoye.

₇Babilonia mälhyejte iwoye

n'olhäthi tä oro tä ihi otkwey,

wet nilhokej wichi tä i'pe honhat

tä w'oknhas tä iyähi.

Lhamel iyäyej hat'es tä ihi,

wet tatäy letichunhayajay,

nemhit ihan honhatejen.

₈Mat yokwet tatäy Babilonia, wasi.

Äyen, chäje kacha, wo chaya lelätshay,

chejphä wet iches.”

₉Pajche olhamel owo chaya lelätshay

häp Babilonia, mat ichesit'a.

¡Teji, mäh n'ekch'oye!

Is chik elhpej yäple honhat tä lew'et,

tsi häp tä n'okalelhthayaj tä õ'tiyejpe

m'ak tä ni'isa tä iwoye, pajtha nichät puleye,

wet atojphä pajtha nichäte t'at

häp pules tä wey'ähen tä leyalh ihutwethä.

₁₀Lhawuk tä tamenej tä y'akalhi tä yachajo

tä n'ahäpehen m'ak tä n'ahäpehente.

Lhuyay, mäh n'ahoye Jerusalén,

n'afwenho wichi tä Lhawuk Dios

iwoyej n'amehen m'ak tä matche tä is.

₁₁Lhawuk t'uhläk itäyhat häp Babilonia,

hin'omhatejwethä reyes tä ihi honhat tä lhey Media,

häpkhilek iwo haya m'ak tä Babilonio lhayis

iwoyeje lham Lewukwe tä ihi Jerusalén.

¡Waklhathen hach'ähal,

p'oyej atapehen n'oka'tshayajchal!

₁₂¡Neyhatphä aka bandera,

ti'pe häp Babilonia lelafwek tä tuntey!

¡Ísej iyhäj wichi tä t'uye lepelis,

lhäy'e n'ofwolwos is chik äpte lhamel ihiche lepelis!

¡Wet weskatchechufwi tä amel lehochechufwi

hupch'ol les tä iyejen n'olafwek lepe lhipey!

Tsi wak'alh m'ak tä pajche Lhawuk

t'uhläk iwoyeje Babilonia lheley.

₁₃Häp am, Babilonia, tä lhewhäye tewokitas

wet matche tä wuj akäywet tä lew'en,

näm t'at akapes, nofw tä lhewche.

₁₄Häp Lhawuk tä laj letumfwaya

hit'unhatche lhämet tä yok:

“Oyämla tapo amej atayhfwas, tehlat iwoye chol,

wet lhamel itenla letenek

tä t'ichoylhi amej tä ikalh amhi.”

₁₅Lhawuk lakhajyhayaj ihi, yenlhi honhat,

wet lehanyaj tä wuj tä iyej hit'unteji honhat.

Wet tä matche tä ihanej m'ak tä yenlhi,

yäm tsajo häp pule.

₁₆Lepak tä äytaji hiw'ahhathi inät tä ihi pule.

Inuhatphä pules tä tälhe honhat lepesey,

wet yenlhi lep tä nekche pelhay,

wet itälhtho leyalh häp lew'et tä ihi.

₁₇Hin'o isit'a m'ak tä iwoye, ihanhit'a honhatej.

Lham tä ikan lhamej tä yenlhi lecheyä,

tsi khit'a m'ak tä matche wet lehusek ihihit'a.

₁₈Lajit lahaya, n'ot'ischeyek t'at,

nichäthiyela lewhäy chik Lhawuk itäyhat.

₁₉Tsi matche tä tehit'a iwoye Jacob laka Dios

tä lham tä yenlhi nilhokej m'ayhay tä iche.

Wet lham tatshupiye Israel lhayis tä yen laka wichiya,

Lhawuk tä laj letumfwaya häp tä lhey.

₂₀Lhawuk yok:

“Babilonia, ahäpe okäjnhat,

olutsej tä oka'tshayajcha.

Am tä oayen lechaya nilhokej honhatil tä owasthiche,

lhäy'e n'oniyatyajay tä i'pe honhat tä otäyhat.

₂₁Am tä oayen lechaya yel'atas

tä n'oka'tshayajchal tä olänhen,

lhäy'e häp lewuhuy tä iche'pe,

lhäy'e kaletas tä n'oka'tshayajchal tä owasthiche,

lhäy'e häp wichi tä ihiche.

₂₂Am tä oayen lechaya

hin'ol tä olänhen lhäy'e atsinhay,

lhäy'e hin'ol tä thänhäy lhäy'e n'atfwas,

hin'ol mamses lhäy'e atsinha lhutshay.

₂₃Am tä oayen lechaya tä olänhen

tson'ataswos lhäy'e häp leläy,

lhäy'e chumhas tä isaji honhat

lhäy'e häp lech'otfwas tolo lhayis.

Wet am tä oayen lechaya tä olänhen

niyatey lhäy'e lech'otfwas.

₂₄“Mat athana oka wichi hiw'enla

tä Babilonia lhäy'e wichi tä ihi

ow'enhihola laha häp m'ak

tä matche tä ni'isa tä iwoyejehte Jerusalén.

Olham tä ohäpe Dios tä Israel Lewuk olhämet täjtso.

₂₅“Am, Babilonia, atet iwoye

tachenaj tä n'otäyhyajwo,

lehämit nilhokej honhat tä letäyhat.

Mat olham tä ohäpe Dios tä Israel Lewuk

nech'e ottay ahilä.

Oneyhthiphäla otkwey wet oaitasnhila,

oaihuthilhila, oaithatlahchä tä lhe'pe tachenhas,

wet nech'e ahäpkhila t'at tachenaj fwiyho.

₂₆Äp ihichet'ala tunte tä afwiyho

chik isila chik õyenejlhi hup.

Nech'e ahäpkhila t'at ts'anis yämlek tiyäj'attsiy.

Olham tä ohäpe Dios tä Israel Lewuk olhämet täjtso.”

“¡Wo atetnekayej honhat tä amel lenuye!

¡Tshänhihchä bandera, afwutchehen afwolis!

¡Awaklhathen, amel tä lhehiche honhatil,

häpkhilek lenuye Babilonia!

¡Änehen Ararat lheley, lhäy'e Miní lheley,

lhäy'e wichi tä lew'et honhat tä Askenaz,

häpkhilek nekhen tä iwo laka'tshayajayej Babilonia!

¡Wet enlhi sip'älis kaniyat tä lham

tä yikhilachufwi n'oka'tshayaj,

wet chen nifwotas tä iche'pe yel'atas

häpkhilek tet iwoye chol tä fwitses!

₂₈¡Awaklhathen, amel tä ahäpehen

wichi tä ihiche honhatil!

¡Akhajyenhen tä lewo aka'tshayajayej Babilonia!

¡Awaklhathen, amel tä ahäpehen

honhat tä Media laka reyes lhäy'e laka niyatey,

lhäy'e häp aniyatfwas tä ihipej han'ohyaj,

lhäy'e nilhokej wichi tä amel aniyatejen!”

₂₉Häp honhat tachetteyejche

lenowayhyaj wet w'ahulhi t'at,

tsi häp tä Lhawuk nech'e imatitche

letichunhayaj p'ante yok,

“Owelanthila ts'anisa Babilonia,

häp tä wichi nemhit ihi.”

₃₀Babilonia laka sip'älis

ileyej tä tatayhlä letayhfwas.

Lhamel ichetchufwi lewukwey tä tach'opwayhen,

nofw lakhajyhayaj, nech'e tet iwoye atsinhay.

Letayhfwas isakanho t'at laka honhates

wet iwunhomche lewukwey.

₃₁Wichi tä iwo silätaye Babilonia laka rey,

elh y'ununche t'at tä inukwe alhoho,

lhamel ifwele tä nilhokej laka hupuy

tä letayhfwas ikalhi.

₃₂Ihiche tewok lhipey tä n'olhijtshanw'etes,

wet iwunhomche hupuy tä ihiche

n'olafwek tä tuntey lepelis

tä häpehen häp sip'älis kasthawtes,

wet sip'älis nichätejchet katsi lenowayhyaj.

₃₃Tsi häp tä Lhawuk tä laj letumfwaya

tä häpe Israel laka Dios, lham yok:

“Babilonia nech'e tet iwoye honhat tä n'osapkanw'et

tä õhw'awlhatejchä n'opach'ol tä õt'äseji,

häpkhilek wak'alh chik nichäte lewhäy

tä õ'fwajejphä n'ofwajnhat yachuyaj tä õ'lanhi.”

_34-35Jerusalén, honhat tä lhey Sión, yok:

“Babilonia laka rey Nabucodonosor

iwo olhipeya wet tujn'o,

wet itech'ayen n'oyej n'olhäkhi tä lhele nofw.

Lham te iwoye alhutaj tä lewomekitaj lhele,

timn'o, yäm iläyej olhip tä ikän,

wet olhip tä imälhehi iwom.

¡Is chik tiskanlatpe m'ak tä iwoyejte n'oye!

¡Is chik Babilonia lheley tiskanlatpe

oka wichi tä lhamel ilänhen!”

₃₆Häp tä tamenej tä Lhawuk yok:

“Olham otch'otla amehen,

owohla lahaya m'ak tä atayhfwas iwoyej amehen.

Oyämla y'im tewokitaj

lhäy'e nilhokej inätw'etes tä ihi Babilonia.

₃₇Ts'ilakhilat hupuy tä õ'wasthiche

lhipey tä ihihila honhatna,

wet häp tä m'awolis iwohla lhokweyahi.

Häpehila honhat tä nemhit wichi ihi,

wet häp tä nilhokhiyeja wichi

tä nowaye lewit'äyna chik hiw'enla,

wet yafwuthichehena lepästey.

₃₈Babilonio lhayis t'änlawethä,

tehlat iwoye t'owalhas tä y'iphen.

₃₉Chik leyi ninofwahi lhät,

wet oyäynhiyeja n'olhät tä w'oknhasej,

wet häp tä itäyhthila letichunhayajay.

Wet nahati nichätla'pe lhamel,

wet lajit lepesa tä imähihena, n'omhihent'ala.

Olham tä amel Awukn'o olhämet täjtso.

₄₀Wet ohänhiyela itshäwet tä õ'länhen lew'et,

otech'aynhiyeja tson'atas

lhäy'e kayla lhayis tä õ'länhen.

₄₁“Babilonia häpe honhat tä letoyaj ihi

tä iyej iyhäj honhatil.

Õ'sakanej, wasi wet tatäy,

lewit'äyhyajna istun iyhäj tä hiw'en.

₄₂Lewomekitaj t'ulhpe Babilonia,

iwo lhetheya inät tä hip'o'pe.

₄₃Laka hupuy õ'welanhat honhat tä ts'anis

tä matche tä ni'isa, tatshäjäy.

Newache m'ak chik yen w'eta,

wet nemhit iche hin'o chik häpe chik inukwe honhattso.

₄₄Olham otasnhila häp n'ocheyä

tä lhey Bel tä ihi Babilonia,

wet och'uyyenhiyejlhila

häp m'ak tä pajchehte lham tim,

wet nemla yachajo chik wichi

tä i'pe honhat ihänhilhila.

Pajche nichätche katsi

häp Babilonia lelafwey tä tuntey.

₄₅“¡Ika wichi, mäch'oye honhatna!

Aelhpej is chik lhaifwayhtej olham owäk

tä tet iwoye itäj lhal, y'oho.

₄₆Yej nuhat amhohen wet yej nowaye

m'ak tä wichi yen lhämtesa tä ihi honhatna.

Nekchäm elhipeja wet äp w'enhahipeja lhamej

m'ak chik wichi yenla lhämtesa.

Lhamel yämhiyejlhila häp wichi tä ihi honhatna

tä fwitsesla, iwohla laka'tshayaja,

wet niyatey tatayhichela lehilähen.

₄₇Häp tä mälhyejtso, wet nek t'at

häp ifwala tä otasnhila

n'ocheyälis tä ihi Babilonia.

Wet imälhehilawek honhatna tä len'äfwlhi ihihila,

wet wichi lep'itseyhay hip'ohla'pe.

₄₈Wet pule lhäy'e honhat,

lhäy'e nilhokej häp m'ak tä ihiche,

lhamel iwohla lakäjyaja chik Babilonia tatäy,

tsi nämhihena letäyhyajwos tä tälh tafwojyhiye.

Olham tä amel Awukn'o olhämet täjtso.

₄₉Matche, wasihila Babilonia.

M'ak tä tamenej häp tä wuj tä ilänhen Israel lhayis,

lhäy'e tä wuj tä ilänhen wichi tä i'pe honhat.

₅₀“Amel tä letefwayej n'oka'tshayaj

tä õknisakana amejen,

mähen, yej takasitwethä.

Tej chik matche tä a'atoschey,

tha tichun n'ohlä tä Awukn'o

wet yej p'ethatlä Jerusalén.

₅₁Amel lhoyaykwe,

Matche tä olhamel on'äfwelhen

tä wichi iläkwlhi n'ohen.

Itpe olhamel ottey tä w'et om'ayhay t'at.

Tsi häp tä wichi tä lew'et honhatna

tä kahäpeya olhamel,

tiyäjtechufwi Lhawuk Lewukwe

tä ihi olhamel oka honhat Jerusalén,

wet pajtha lhamel nichäte t'at

häp lhipey tä matche tä n'ot'amajchetes.

₅₂“Matche amel ämet.

Mat olham tä Awukn'o oyok,

Nek t'at häp ifwala tä otasnhila Babilonia lecheyälis,

wet nilhokla'pe laka honhat tä wichi

tech'ethiyejawethä lelätshay.

₅₃Tejlak Babilonia lhaineyhatphä pajtha nichät puleye,

yäm atoschephä lelafwey tä tuntey,

mat kamaj ochenhiyela letayhfwas häpkhilek iwasthi.

Olham tä Awukn'o olhämet täjtso.”

₅₄Pitsaje wichi tä tumho Babilonia,

lhamel t'änwethä tä laka honhat wasi.

₅₅Lhawuk iwasthi Babilonia

wet nemhit iche huyaj.

Letayhfwas nichätla'pe, tehlat iwoye

inät tä lepak äytaji tä iwo lhetheya.

₅₆Lhamel nekhen tä iwasthi Babilonia,

itsokwethä laka sip'älis tä n'oka'tshayajchal,

wet inäksen lelutses hal'äy.

Tsi Lhawuk häpe Dios tä hiw'enho laha elhpej

mälhyej m'ak tä iwoye.

₅₇Lham häpe Rey,

häpe Lhawuk tä laj letumfwaya.

Wet yäm akalelhäj tä yämla w'oknhas

häp Babilonia kaniyatey,

lhäy'e laka wichi tä ihan m'akejen,

lhäy'e häp hin'ol tä len'ohyajay ihiche,

lhäy'e leniyatfwas,

lhäy'e häp laka sip'älis.

Nahati nichätla'pe lhamel,

wet lajit lepesa tä imähihena, n'omhihent'ala.

₅₈Olham tä ohäpe Israel Lewuk Dios

tä laj letumfwaya oyok,

Matche tä tach'opwayhen

Babilonia lelafwey tä tuntey.

Mat imälhehilatwek chik nichätla kanhi,

wet lepe p'otes tä atoschephä

häp tä õ'wunhihomchela.

Lajit lahaya wichi lechumet,

w'et y'elejen t'at, itäj tä ihämit.