Jer 52

₁Sedequías hiw'en p'ante veintiún nekchämis tä iwo tesa tä lhayen Judá laka niyata, wet once nekchämis tä ihi Jerusalén tä iwoye niyat lechumet. Wet lako atsinha tä lhey Hamutal, häp Jeremías tä lhäse tä lew'et honhat tä lhey Pelaj. ₂Mat Sedequías isit'a m'ak tä iwoye, tet iwoye Joaquim, wet Lhawuk y'ulhanej lakeyistso. ₃Wet Lhawuk wuj tä itiyej lewäk Jerusalén lhäy'e Judá, wet itiyejche kanhi wichi.

Wet tä paj Sedequías nech'e lhaikhajyen p'ante tä tatayhlä Babilonia laka rey.

₄Tä ihi nueve nekchämis tä rey Sedequías ihi leniyatyaj, wet iwel'a tä diez wet ifwala tä diez, wet häp tä Nabucodonosor, Babilonia laka rey, ihoye p'ante Jerusalén, lhäy'e nilhokej laka sip'älis, häpkhilek iwo laka'tshayajayej. Wet lhamel yenlhi laka'tshayajw'et tä itiwhäye hupuy, wet yenlhi let'äsawtes tä ilunkatejlhi hupuy lelafwek tä tuntey häpkhilek inuye wichi tä ihi. ₅Wet lhamel ilunejlhi hupuy pajtha nichäte once nekchämis tä Sedequías ihi leniyatyaj. ₆Wet tä nichäte iwel'a cuatro wet ifwala nueve tä ihi nekchämtso, wuj nehlä tä ihi Jerusalén wet wichi wuj tä nichuyuhen tä nemhit hiw'en lhäk. ₇Wet lhamel ifwoynho hupuy lelafwek, wet honatsi p'ante tä yikhen rey lhäy'e nilhokej laka sip'älis tä lhamel tiyäjche n'äyij tä ihi lepe tä nekche lechowej n'olafwey wet iwhäye rey lelafwek lhip. Wet tej tä Babilonio lhayis kamaj ilunej hupuy, mat rey lhäy'e laka sip'älis lhamel yikhen tä tiyäjche n'äyij tä tataye honhat tä ifwache tewok Jordán. ₈Mat Babilonio lhayis kasip'älis ihän rey Sedequías len'äyij, wet ifwis tä ihi honhat tä w'awulhchä tä atott'aye Jericó. Wet nilhokej laka sip'älis iwom Sedequías, lhamel ifwtsathi. ₉Wet Babilonio lhayis itsoklhi rey Sedequías, wet lhamel ihäne laka rey Nabucodonosor tä ihi Ribla tä ihi honhat lhip tä lhey Hamat. Wet Nabucodonosor ikalelhtej lewit'äyhyaj häp Sedequías, ₁₀wet ne'tek õ'länhen leles tä ihi tä lham tatache. Wet äpte ne'tek õ'länhen nilhokej Judá lheley tä len'ohyajay ihiche. ₁₁Wet õ'lanche Sedequías tatelhoy wet õyäytej chinhas tä õ'chäje Babilonia, wet õ'thatho n'op'onthi pajtha nichäte ifwala tä ileyej honhat.

₁₂Ihi diecinueve nekchämis tä Babilonia laka rey Nabucodonosor ihi leniyatyaj, wet iwel'a tä cinco wet ifwala tä diez, wet häp tä sip'älis kaniyat tä lhey Nebuzaradán tä häpe rey lech'otfwa, lham ihoye p'ante Jerusalén. Wet tä nichätho, ₁₃iwunej Lhawuk Lewukwe, lhäy'e rey lewukwe, lhäy'e nilhokej wichi tä lhamenya lewukwey tä ihi hupuy. ₁₄Wet nilhokej Babilonio lhayis kasip'älis tä iwo lhäy'eya laka niyat tä lhamel iwasthiche hupuy lelafwek tä tuntey tä ilunej Jerusalén. ₁₅Wet Nebuzaradán ichäje Babilonia tä yen kwenkaya wichi tä p'elitses tä niw'ena m'ayek, lhäy'e iyhäj wichi tä imälhehi hupuy, lhäy'e iyhäj tä lhaithate Babilonia laka rey, lhäy'e hin'ol tä imälhehi tä ihanej tä yenlhi m'ayhay. ₁₆Ts'ilak tä hin'äyhchä iyhäj lhamel tä p'elitses tä niw'ena m'ayek, häpkhilek lhamel ichumyenlhi honhat, tutcheyhen, ithatchä uvas lhiley.

₁₇Wet Babilonio lhayis iwasthiche Lhawuk Lewukwe laka ch'utey tä wusche tä bronce, lhäy'e inäthi tä wujtaj tä bronce, lhäy'e inäthis tä niwusa lew'etes. Wet nilhokej bronce tä lhamel ichäje Babilonia. ₁₈Äpte lhamel ichäj mok'otajhis, lhäy'e pala lhayis, lhäy'e lecha tä õyistejpej n'ochäkw lhäk tä y'o, lhäy'e n'olhäthis, lhäy'e lakannhay tä wus, lhäy'e nilhokej m'ayhay tä bronce tä õ'chumyenlhi tä ichufwi Lhawuk Lewukwe. ₁₉Äpte sip'älis kaniyat ichäjen n'olhäthis tä niwusa, lhäy'e fwiyhol his, lhäy'e iyhäj n'olhäthis, lhäy'e mok'otajhis, lhäy'e n'ochäkwhis, lhäy'e lakannhay tä wus, lhäy'e lehis tä õ'tsäyho hat'es tä õyen Lhawuk t'awayhata. Wok oyok, nilhokej m'ayhay tä oro lhäy'e plata tä sip'äl kaniyat ichäjen. ₂₀Häp täkwfwas ch'utey tä wusche tä rey Salomón ne'tep'antek õyenlhi tä itichufwi Lhawuk Lewukwe, matche tä choyhat, lhäy'e inäthi tä wujtaj, lhäy'e tolo lhayis tä bronce tä ihi doce tä inäthitso i'pe, lhäy'e inäthis tä niwusa lew'etes. Nilhokej m'ayhaytso tä bronce, wet iwohiyet'a tä õ'tetshanlä. ₂₁Wet elh weihalhapej ch'ute tä bronce hiw'en ocho metros tä atojphä, wet cinco metros y medio tä wujche, wet chowejche, wet tä tach'opway w'awulho n'ofwus tä ihi cuatro. ₂₂Wet lepes tä tumphä tä bronce hiw'en dos metros tä atojphä. Wet õ'lunkatejlhi p'ante ch'utey lepesey häp chinhas tä tefwoy tä bronce lhäy'e häp hal'ä lhay lepeykas tä bronce tä wus tä itolajen. ₂₃Wet chinhastso iche cien hal'ä lhay peykas tä iyejwethä, wet noventa y seis tä n'äl tä hin'o hiw'en chik iyahnejphä.

₂₄Äpte sip'älis kaniyat Nebuzaradán itsoklhi Sacerdote tä Lhamya tä lhey Seraías, lhäy'e elh sacerdote tä lech'otfwa tä lhey Sofonías, lhäy'e tres hin'ol tä t'uye Lhawuk Lewukwe lepe. ₂₅Äpte itsoklhi sip'älis kaniyat tä ihi hupuy, lhäy'e siete hin'ol tä rey lech'otfwas tä lhamel ihi hupuy, lhäy'e sip'älis kaniyat lech'otfwa tä yen lechumeta tä t'änchehen wichi häpkhilek tach'ote tä iwo laka'tshayaja. Äpte itsoklhi sesenta hin'ol tä lhamenya tä ihi hupuy. _26-27Häp nilhokej lhameltso tä Nebuzaradán tä ihäne Babilonia laka rey Nabucodonosor tä ihi Ribla tä ihi honhat lhip tä lhey Hamat. Wet tä nichäte, wet Nabucodonosor ne'tek õ'länhen.

Wet mälhyejtso p'ante tä õ'soyej Judá lheley häp laka honhat, õ'häne honhat tä atofwe tä kahäpeya laka honhat. ₂₈Wujpey wichi tä Nabucodonosor ichäj tä yen kwenkaya. Häp nekchäm tä siete tä ihi leniyatyaj, ichäj tres mil veintitrés (3.023) lhamel tä Judá lheley. ₂₉Wet tä nichäte p'ante dieciocho nekchämis tä häpe niyat, wet ichäj ochocientos treinta y dos (832) wichi tä itälhtho Jerusalén. ₃₀Wet tä äp nichäte p'ante veintitrés nekchämis tä Nabucodonosor ihi leniyatyaj, wet Nebuzaradán tä sip'älis kaniyat ichäj setecientos cuarenta y cinco (745) wichi tä tälhe Judá. Wet tä nilhok lhamel tä õ'chäj cuatro mil seiscientos (4.600).

₃₁Ihi p'ante treinta y siete nekchämis tä lewit'äy ihi Judá laka rey Joaquín. Wet iwel'a doce wet ifwala veinticinco häp hin'o tä lhey Evil-merodac lhayen niyata tä ihi Babilonia. Wet hip'altsen Joaquín wet itonphä tä ihi n'op'onthi. ₃₂Wet t'uye Joaquín, is m'ak tä iwoyeje, hiw'enho len'ohyaj tä inu'pe nilhokej reyes iyhäj tä iyej lham tä ihi Babilonia. ₃₃Wet mälhyej p'antetso tä Joaquín nech'e ilanche lakhäy tä y'uchehen tä ihi n'op'onthi. Nech'e y'uchehen lakhäy tä nech'ayhis, wet tachufwiyejpej rey tä t'ek nilhokej ifwalas tä kamaj iläy Joaquín. ₃₄Wet nilhokej lewhäy tä hiw'en m'ak tä isej, wet nilhokej ifwalas tä rey hiw'enho lhäk, pajtha nichäte ifwala tä Joaquín ileyej honhat.