Tatäy Jerusalén
1Honhat tä Jerusalén
tä wichi tä wujpey tapoyej mhaji,
nech'e ts'anis t'at.
Honhat tä len'ohyaj inunajpe iyhäj honhates,
nech'e tet iwoye tesa.
Lham tä niyatej mhaji n'oniyatyajay,
nech'e õ'chumyene lechumet tä äytajchey.
2Honajchepej tafwlhi t'at,
tatet'ilis w'elekchetchä.
Wichimhaj lham ihumin,
niwohiyat elh chik ihoye chik ikäjyenlhi.
Lakalay'is mhaji nech'e iwom,
lhamel yen at tayhfwaya.
3Wuj leteläythayaj Judá laka wichi.
Äytajchey lechumet,
wet athana tä äp õyen kwenkaya.
Nech'e äp iyej t'at wichi tä w'enha lhamej,
wet ihi honhat tä kalew'eta.
Letayhfwas tä ihänwethä ifwis naji,
wet hiw'enho leteläythayaj.
4¡Matche tä p'elitses n'äyhitas tä tälhe Jerusalén!
Nemhit ow'en wichi chik nekche
chik ihoye n'okäjyaj tä n'okwiyej Lhawuk.
Jerusalén lepelis ts'anis t'at,
sacerdotes tafwchetchä.
Atsinha lhutshay lelhakli ihi,
wet Jerusalén matche tä leteläythayaj ihi.
5Letayhfwas lhayen niyatayej,
t'aylhatshi t'at lhamel leniyatyaj.
Tsi Lhawuk tä hiw'enho lelhakli Jerusalén,
häp tä wuj lech'isukyaj tä iwoye.
Letayhfwas itsokwethä leles,
wet ihäne lhamel laka honhat.
6Tatäy tä isilataj Sión,
nilhok lesilatyaj tä nofw.
Laka niyatey tet iwoye tson'a lhayis
tä t'ukwe hup mat nilhokhiyet'a.
Fwitaj inu alhoho mat lajit lakhajyhayaja,
pajtha hin'o tä ichowalhlä ifwis.
7Jerusalén nitichunche ifwalasnajtso tä lewit'äyhyaj ihi,
lelhakli ihi wet lefwitajayaj ihi.
Nitichunche lesilatyaj tä ihi naji
ifwalas tä kamaj newache lewit'äyhyaj.
Nitichunche ifwala tä letayhfwas ikalhi,
wet niwohiyat elh chik häpe chik tach'ote.
Tä letayhfwas iyahin,
iläkwlhi tä lewit'äyhyaj ihi.
8Jerusalén wuj tä iwo ch'isukyaja,
wet tamen lhamej tä õy'ulhan.
Wichi tä itiyej mhaji len'ohyaj,
nech'e lhamel y'ulhan.
Tsi lhamel hiw'en tä tet iwoye
atsinha tä kain'oyaj länek.
Häp tä tamenej tä tafwlhi,
tsi len'äfwlhi ihi
wet lechäyi ithat'atlä wichi.
9Matche tä kok'aye lew'uyis.
Yenhit'anaj tichunhayaja
m'ak chik ihiyeja'pe lakey tä iwoye.
Wichi tek yenek nichäthihola m'ak tä ni'isa.
Ihichet'a elh chik tach'ote häpkhilek ikäjyenlhi.
T'änch'oye Lhawuk wet yok:
“¡Iwuk, lhek tetshan olhakli tä ihi!
¡Otayhfwas lhaichäjlhit n'oyej!”
10Letayhfwas lhayen at lewuhuya Jerusalén lakäywet.
Õhw'en wichi tä n'okwiyej lecheyälis
tä lhamel weschufwi Awukwe tä Amajchet,
¡häp wichi tä len'äyejo p'ante chik ihoye aka wichi
chik lhaihutwekchufwi Awukwe!
11Nilhokej wichi tä lew'et Jerusalén tafwlhich'oye lhäk.
Iwom lakäywet,
ithatlä n'olhäk häpkhilek n'ilahen.
T'änch'oye Lhawuk wet yok:
“¡Iwuk, lhek yahin n'ohen
tä matche tä owit'äyhyaj in'oyejen!”
Jerusalén tafwiyejlhi lewit'äyhyaj
12“¡Amel tä lenuyaykwe n'äyij,
lhek yahin wet tetshan,
chik leläte m'ak tä äytaj
chik tet iwoye m'ak tä äytaj tä in'oyej
tä matche tä oteläytej!
¡Lhawuk tä hiw'en n'oho olhaklina,
iwunej n'oho lham lewäkw!
13“Tälh kaphä itäj tä Lhawuk tiyäj n'oyej,
tiyäjo ot'isan pajtha taje olhiley.
Hich'enhi laka trampa tä itihlä opach'ol,
wet yachaj n'okwe tä otälhche.
Iso n'oyej wichi,
wet lajit whäya tä ok'efwhayaj ihi.
14“Lhawuk lham t'at tä hiw'en och'isukyajay,
wet häp tä yäyit n'o'pe.
Tet iwoye hal'ä tä õ'mäyenpe weyis lhayis lech'ul,
choyhat tä in'o'pe.
Nemhit otumlä, nofw okhajyhayaj.
Lhawuk tä itayhat n'ohlä wichi tä n'am tumlä.
15“Lhawuk isonaj n'oyej
nilhokej oka sip'äl tä takhajayhen.
Ichennaj n'oye sip'äl tä otayhfwas
häpkhilek inu n'oye wet tifwej
oka hin'ol tä takhajayhen.
Lhawuk t'äsi Judá lhäse tä häpe Jerusalén,
tet iwoye uvas tä õt'äsi tä õyenlhi hat'es.
16“M'ayhayna häp tä yafwyenlhin'o,
otet'ilis tapokwe ottelhoy.
Ihichet'a n'oelh chik ikäjyenlhin'o.
Ow'enhit'a n'oelh chik tach'ot n'oye
häpkhilek yachajo tä otkhajay.
Lewit'äyhyaj ihi oka wichi,
tsi häp tä otayhfwas ikalh n'ohihen.
17“Opiyenchephä otkweyey,
olhaip'altsench'oye elh chik tach'ot n'oye,
mat ihichet'a elh chik ikäjyenlhin'o.
Lhawuk t'at tä tamenej tä oihi lechowej otayhfwas,
wet lhamel ikokyen n'oye.
18“Is alhoho m'ak tä Lhawuk iwoyej n'oye,
tsi häp tä ottaynajlä lhämtes.
Nilhokej wichi tä i'pe honhat, ch'ahuyay n'oye,
lhek yahinya, oteläythayaj ihi.
Oka mamses lhäy'e oka lhutshay
õ'chäj naji tä õyen kwenkaya.
19“Ot'alhe naji wichimhaj ohumin chik tach'ot n'oye,
wet tajlhamat t'akanyaj tä hiw'en n'oho.
Oka sacerdotes lhäy'e oka thänhäy
y'inhen tä in'oyej tä lhamel fwitaj t'ukwe lhäk.
20“¡Iwuk, lhek yahinn'o tä wuj olhakli tä ihi!
¡Oläte tä tet iwoyek hikw'esche ot'okwe!
Ot'otle tan'ajlhayejphä m'ak tä äytaj,
tsi ow'en tä wuj tä ottaynaj ahilä.
Ihiche hup kawayhil õ'länejen tsonhat oka wichi,
wet hupuy kamaj äp n'op'itseyhay ichetchufwi.
21“Wichi ilät n'oye tä otafwlhi,
mat ihichet'a elh chik ikäjyenlhin'o.
Nilhokej otayhfwas tä ihanej
m'ak tä ni'isa tä in'oyej.
Lhamel akäsejwethä tä am
tä lew'en n'oho owit'äyhyajna.
¡Is chik yokwet näm ifwalahte pajche lhen ämeta,
häpkhilek lhamel tet owoye tä oteläythayaj ihi!
22“Is chik letetshan t'at
nilhokej m'ak tä ni'isa tä lhamel iwoye.
Wo hayayej lech'isukyajay,
mälhyej tä lewo haya n'oyej och'isukyajay.
Tsi äytaj ohusek wet wuj olhafwyhayaj.”
